പ്ലാസ്റ്റിക് ഡ്രമ്മിനുള്ളിൽ കുടുങ്ങിപ്പോയ തലയുമായി റോഡില് അലഞ്ഞുതിരിയുന്ന പശുവിനെ സാഹസികമായി രക്ഷപ്പെടുത്തുന്ന ദൃശ്യങ്ങൾ സാമൂഹിക മാധ്യമങ്ങളിൽ വൻതോതിൽ പ്രശംസ നേടുന്നു. ഗുജറാത്തില് തിരക്കേറിയ റോഡിലൂടെ തലയിൽ പ്ലാസ്റ്റിക് പാത്രം കുടുങ്ങിയ നിലയിൽ പരിഭ്രാന്തിയോടെ ഓടുന്ന പശുവിന്റെ വീഡിയോയാണ് പ്രചരിക്കുന്നത്. കണ്ണു കാണാത്തതിനാലും പേടിച്ചതിനാലും പശു സ്വയം രക്ഷപ്പെടാൻ ശ്രമിച്ചെങ്കിലും പരാജയപ്പെടുകയായിരുന്നു.
മുഖം ഡ്രം കൊണ്ട് മൂടിയ അവസ്ഥയിൽ പശു റോഡിലൂടെ ഓടിയത് മൃഗത്തിനും പോകുന്ന വാഹനങ്ങൾക്കും ഒരുപോലെ അപകടകരമായ സാഹചര്യമാണ് ഉണ്ടാക്കിയത്. കണ്ണു കാണാത്തതിനാല് പശു പരിഭ്രാന്തയായി ട്രാഫിക്ക് നിറഞ്ഞ റോഡിലേയ്ക്ക് ഓടിക്കയറി വാഹനങ്ങളുമായി കൂട്ടിയിടിക്കാന് സാധ്യതയുണ്ടായിരുന്നതായി അവിടെയുണ്ടായിരുന്നവർ പറഞ്ഞു.
സ്ഥിതി വഷളായതോടെ അപകടസാധ്യത വകവയ്ക്കാതെ വഴിയാത്രക്കാരായ ചിലർ സഹായത്തിനെത്തി. പേടിച്ചിരുന്ന പശുവിനെ അവർ പതുക്കെ സമീപിച്ച് ശാന്തയാക്കാൻ ശ്രമിച്ചു. എല്ലാവരും ചേർന്ന് പ്ലാസ്റ്റിക് ഡ്രമ്മിൽ മുറുകെ പിടിക്കുകയും ഒടുവിൽ പശുവിന്റെ തലയിൽ നിന്ന് ഡ്രം വിജയകരമായി ഊരി മാറ്റുകയും ചെയ്തു.
പശുവിന് പരിക്കുകളൊന്നും പറ്റിയില്ല എന്നത് കണ്ടുനിന്നവർക്ക് വലിയ ആശ്വാസമായി. തിരക്കേറിയ റോഡിൽ ഉണ്ടായേക്കാമായിരുന്ന വലിയൊരു അപകടമാണ് ഇവരുടെ സമയോചിതമായ ഇടപെടലിലൂടെ ഒഴിവായത്.
വീഡിയോ സാമൂഹിക മാധ്യമങ്ങളിൽ വൈറലായതോടെ രക്ഷാപ്രവർത്തനം നടത്തിയവരെ പ്രശംസിച്ച് നിരവധി ആളുകൾ രംഗത്തെത്തി. ട്രാഫിക്കിനിടയിലും ഒട്ടും മടിക്കാതെ പശുവിനെ രക്ഷിക്കാൻ മുന്നോട്ടുവന്ന ഇവരുടെ മനുഷ്യത്വത്തെയും ദയയെയും ആളുകൾ അഭിനന്ദിച്ചു. ചെറിയൊരു കാരുണ്യപ്രവൃത്തിയിലൂടെ വലിയൊരു അപകടം ഒഴിവാക്കാൻ കഴിഞ്ഞതിനെ പലരും പ്രകീർത്തിച്ചു.
