ഇന്നത്തെ സാങ്കേതിക ലോകത്തെ ഇന്റർനെറ്റിന്റെ ആദ്യകാലവുമായി ബന്ധിപ്പിക്കുന്ന കൗതുകകരമായ ഒരു വാർത്തയാണ് ഇപ്പോൾ പുറത്തുവരുന്നത്. ആമസോൺ വഴി വിറ്റഴിക്കപ്പെട്ട ലോകത്തിലെ ആദ്യത്തെ ഉൽപ്പന്നം ആർട്ടിഫിഷ്യൽ ഇന്റലിജൻസിനെ (AI) കുറിച്ചുള്ള ഒരു പുസ്തകമായിരുന്നു എന്നതാണ് ഈ പ്രത്യേകത. 1995-ലാണ് ഈ വിൽപന നടന്നത്. ഇന്ന് ലോകം മുഴുവൻ എഐ ചർച്ച ചെയ്യപ്പെടുമ്പോൾ, ആമസോണിന്റെ തുടക്കം തന്നെ ഈ വിഷയത്തിലായിരുന്നു എന്നത് ശ്രദ്ധേയമാണ്.
ഡഗ്ലസ് ഹോഫ്സ്റ്റാഡർ രചിച്ച “ഫ്ലൂയിഡ് കൺസെപ്റ്റ്സ് ആൻഡ് ക്രിയേറ്റീവ് അനലോജീസ്: കമ്പ്യൂട്ടർ മോഡൽസ് ഓഫ് ദി ഫണ്ടമെന്റൽ മെക്കാനിസം ഓഫ് തോട്ട്” എന്ന പുസ്തകമാണ് അന്ന് ജോൺ വെയ്ൻറൈറ്റ് എന്ന ഉപഭോക്താവ് വാങ്ങിയത്. ഇതേക്കുറിച്ച് ജോൺ എർലിക്മാൻ പങ്കുവെച്ച കുറിപ്പും പഴയ ഇൻവോയ്സും ആമസോൺ സ്ഥാപകൻ ജെഫ് ബെസോസ് തന്നെ സോഷ്യൽ മീഡിയയിൽ വീണ്ടും പങ്കുവെച്ചു.
ചിരിക്കുന്ന ഒരു ഇമോട്ടിക്കോണോടെയാണ് അദ്ദേഹം ഈ പഴയ ഓർമ്മയെ സ്വീകരിച്ചത്. ഇതിനോട് പ്രതികരിച്ചുകൊണ്ട് ടെസ്ല മേധാവി ഇലോൺ മസ്ക്, “അതൊരു വലിയ കാര്യത്തിന്റെ തുടക്കമായിരുന്നു” എന്ന് കുറിക്കുകയും ചെയ്തു. മുപ്പത് വർഷങ്ങൾക്ക് മുമ്പ് ഇന്റർനെറ്റ് ശൈശവാവസ്ഥയിലായിരുന്ന കാലത്തെ ഈ ചെറിയ തുടക്കം, ഇന്ന് ലോകത്തെ മാറ്റിമറിക്കുന്ന സാങ്കേതിക വിപ്ലവമായി മാറിയിരിക്കുകയാണ്.
