ഓരോ വേനൽക്കാലത്തും ഞാവൽപഴം നമ്മുടെ വീടുകളിലും വഴിയോരക്കച്ചവടങ്ങളിലും സോഷ്യൽ മീഡിയയിലെ ആരോഗ്യ ചർച്ചകളിലും സജീവമാകാറുണ്ട്. അതിന്റെ കളറും പുളിപ്പും മധുരവുമേറിയ രുചിയും മികച്ച പോഷകഗുണങ്ങളും എന്നും ജനപ്രിയമാണ്. എന്നാൽ അടുത്തിടെയായി ഞാവൽപഴം കഴിക്കുന്നത് പല്ലുകൾക്ക് വെൺമ നൽകുമെന്നൊരു വാദം ഉയർന്നു വരുന്നുണ്ട്. ഇതിന്റെ ലളിതമായ ഉത്തരം ‘ഇല്ല’ എന്ന് മാത്രമാണ്.
യഥാർത്ഥത്തിൽ നിങ്ങൾ എപ്പോഴെങ്കിലും കുറച്ച് ഞാവൽപഴം കഴിച്ചിട്ടുണ്ടെങ്കിൽ ഇതിന് നേരെ വിപരീതമായ കാര്യമായിരിക്കും ശ്രദ്ധിച്ചിട്ടുണ്ടാവുക. ഈ പഴം കഴിക്കുമ്പോൾ നാവും ചുണ്ടുകളും പല്ലുകളുമെല്ലാം താൽക്കാലികമായി പർപ്പിൾ- നീല നിറമാകാറുണ്ട്. അങ്ങനെയെങ്കിൽ പല്ല് വെളുപ്പിക്കുമെന്ന ഈ വാദം എവിടെ നിന്നാണ് വന്നത്?
പരമ്പരാഗത വൈദ്യശാസ്ത്രത്തിൽ ഞാവൽപഴത്തിനുള്ള വലിയ സ്ഥാനമായിരിക്കാം ഈ തെറ്റിദ്ധാരണയ്ക്ക് കാരണം. ദഹനആരോഗ്യത്തിനും രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിനും ഈ പഴവും അതിന്റെ കുരുവും മരത്തൊലിയുമെല്ലാം പണ്ടുമുതലേ ഉപയോഗിച്ചു വരുന്നുണ്ട്. ആരോഗ്യത്തിന് നല്ലതായതുകൊണ്ട് ഇത് പല്ലിന്റെ ഭംഗിക്കും നല്ലതായിരിക്കുമെന്ന് ചിലർ കരുതുന്നു. എന്നാൽ പല്ലിന്റെ വെൺമയും വായുടെ ആരോഗ്യവും രണ്ട് വ്യത്യസ്ത കാര്യങ്ങളാണ്.
പാരമ്പര്യം, പ്രായമാകൽ, ഭക്ഷണരീതി, പുകവലി, മരുന്നുകളുടെ ഉപയോഗം, പല്ലിന്റെ ഇനാമലിനുണ്ടാകുന്ന തേയ്മാനം എന്നിവയെല്ലാം പല്ലിന്റെ നിറത്തെ ബാധിക്കുന്ന ഘടകങ്ങളാണ്. പല്ലിന്റെ ഉപരിതലത്തിലെ കറകൾ നീക്കം ചെയ്യുമ്പോഴോ അല്ലെങ്കിൽ ബ്ലീച്ചിംഗ് പദാർത്ഥങ്ങൾ ഇനാമലിലേക്ക് ഇറങ്ങി കടുത്ത നിറങ്ങളെ ഇല്ലാതാക്കുമ്പോഴോ ആണ് പല്ലുകൾ വെളുക്കുന്നത്.
ഞാവൽപഴത്തിന് ഇതിലൊന്നും ഒരു പങ്കുമില്ല. ഈ പഴത്തിന് കടും പർപ്പിൾ നിറം നൽകുന്നത് ‘ആന്തോസയാനിനുകൾ’ (Anthocyanins) എന്ന പ്രകൃതിദത്ത ഘടകങ്ങളാണ്. ഈ ആന്റിഓക്സിഡന്റുകൾ ആരോഗ്യത്തിന് നല്ലതാണെങ്കിലും ഇവയ്ക്ക് ബ്ലീച്ചിംഗ് ഗുണങ്ങളൊന്നുമില്ല. കടും നിറമുള്ള ഇത്തരം ഭക്ഷണങ്ങൾ അമിതമായി കഴിക്കുന്നത് പല്ലിൽ താൽക്കാലികമായി കറയുണ്ടാക്കാനാണ് സാധ്യതയെങ്കിലും സാധാരണയായി ബ്രഷ് ചെയ്യുന്നതിലൂടെ ഇത് മാറിപ്പോകും. എങ്കിലും പല്ലിന്റെ ആരോഗ്യത്തിന് ഞാവൽപഴം ഒട്ടും നല്ലതല്ലെന്ന് പറയാനാകില്ല.
ഈ പഴത്തിൽ അടങ്ങിയിരിക്കുന്ന വിറ്റാമിൻ സി, ആന്റിഓക്സിഡന്റുകൾ, മറ്റ് സസ്യഘടകങ്ങൾ എന്നിവ സമീകൃതാഹാരത്തിന്റെ ഭാഗമാക്കുമ്പോൾ പല്ലിന്റെ ഈറുകളുടെ ആരോഗ്യത്തിന് ഏറെ നല്ലതാണ്. പല്ലിന്റെ ഭംഗി നിലനിർത്താൻ ആരോഗ്യമുള്ള ഈറുകൾ വളരെ പ്രധാനമാണ്. ഈറുകളിലെ വീക്കവും മോശം ശുചിത്വവും പല്ലുകളുടെ ആരോഗ്യം നശിപ്പിക്കുകയും അവയുടെ ഭംഗി കുറയ്ക്കുകയും ചെയ്യും. കൂടാതെ ഇത്തരം പഴങ്ങൾ കഴിക്കുമ്പോൾ വായിൽ ഉമിനീര് കൂടുതൽ ഉത്പാദിപ്പിക്കപ്പെടുന്നു. ഇത് പല്ലുകളിൽ ഒട്ടിപ്പിടിക്കുന്ന ഭക്ഷണാവശിഷ്ടങ്ങൾ കഴുകിക്കളയാനും പല്ല് ദ്രവിക്കുന്നതിന് കാരണമാകുന്ന ആസിഡുകളെ പ്രതിരോധിക്കാനും സഹായിക്കും.
എന്നാൽ ഈ ഗുണങ്ങളൊന്നും പല്ലുകൾക്ക് വെൺമ നൽകാൻ സഹായിക്കുന്നില്ല. പല്ലുകൾക്ക് തിളക്കം കൂട്ടാൻ ആഗ്രഹിക്കുന്നവർ കൃത്യമായ വഴികളാണ് സ്വീകരിക്കേണ്ടതെന്ന് ദന്തവിദഗ്ദ്ധർ നിർദ്ദേശിക്കുന്നു. ഫ്ലൂറൈഡ് അടങ്ങിയ ടൂത്ത് പേസ്റ്റ് ഉപയോഗിച്ച് ദിവസവും രണ്ടുനേരം ബ്രഷ് ചെയ്യുക, പുകവലി ഒഴിവാക്കുക, പല്ലിൽ കറയുണ്ടാക്കുന്ന ചായ, കാപ്പി തുടങ്ങിയ പാനീയങ്ങളുടെ ഉപയോഗം കുറയ്ക്കുക, കൃത്യമായ ഇടവേളകളിൽ ഡോക്ടറെ കണ്ട് പല്ലുകൾ വൃത്തിയാക്കുക എന്നിവയാണ് ഏറ്റവും ഫലപ്രദമായ മാർഗ്ഗങ്ങൾ. സോഷ്യൽ മീഡിയയിലെ ഇത്തരം വ്യാജ വിദ്യകളേക്കാൾ സുരക്ഷിതവും ഫലപ്രദവും ഡോക്ടറുടെ മേൽനോട്ടത്തിൽ ചെയ്യുന്ന പല്ല് വെളുപ്പിക്കൽ ചികിത്സകളാണ്.
എങ്കിലും നാരുകളും ആന്റിഓക്സിഡന്റുകളും അവശ്യ പോഷകങ്ങളും അടങ്ങിയ ഞാവൽപഴം വേനൽക്കാലത്ത് ആരോഗ്യത്തിനായി തീർച്ചയായും ഭക്ഷണത്തിൽ ഉൾപ്പെടുത്താം. പല്ല് വെളുപ്പിക്കാൻ ഇത് സഹായിക്കുമെന്നത് വെറുമൊരു മിഥ്യ മാത്രമാണ്.
