രുചിയുള്ള ഭക്ഷണമെല്ലാം ശുചിത്വമുള്ള സാഹചര്യത്തിലാണോ നിർമ്മിക്കുന്നത് എന്ന ചോദ്യം ഉയർത്തുന്ന ഭയാനകമായ ഒരു വീഡിയോ സോഷ്യൽ മീഡിയയിൽ പ്രചരിക്കുകയാണ്. ഉരുളക്കിഴങ്ങ് ചിപ്സ് പ്രേമികളെ ഒന്നടങ്കം ഞെട്ടിക്കുന്നതാണ് ഈ ദൃശ്യങ്ങൾ. അടിവസ്ത്രം മാത്രം ധരിച്ച ഒരാൾ, പച്ച ഉരുളക്കിഴങ്ങ് കഷണങ്ങൾ നിറച്ച സോപ്പുലായനി കലക്കിയ ടാങ്കിൽ ഇറങ്ങിനിന്ന് പുകവലിക്കുന്നതാണ് വീഡിയോയിലുള്ളത്. ഒരു ചിപ്സ് നിർമ്മാണ യൂണിറ്റിലെ തൊഴിലാളിയാണെന്ന് തോന്നിപ്പിക്കുന്ന ഇയാൾ, വറുക്കുന്നതിന് മുൻപായി ഉരുളക്കിഴങ്ങ് കഴുകുന്നതായാണ് ദൃശ്യങ്ങളിൽ കാണുന്നത്.
തൊഴിലാളിയുടെ വസ്ത്രധാരണം മാത്രമല്ല, ആ ടാങ്കിലെ വെള്ളവും അങ്ങേയറ്റം വൃത്തിഹീനമായിരുന്നു. യാതൊരു മടിയുമില്ലാതെ ക്യാമറയ്ക്ക് നേരെ നോക്കി ചിരിച്ചുകൊണ്ട് പുകവലിക്കുന്ന ഇയാളുടെ രീതി ആളുകളിൽ വലിയ അമർഷമുണ്ടാക്കി. ‘ഫാക്ട് ഫ്ലോ ഇന്ത്യ’ എന്ന ഇൻസ്റ്റാഗ്രാം പേജിലൂടെ പങ്കുവെക്കപ്പെട്ട ഈ വീഡിയോ ഇതിനോടകം പതിനായിരക്കണക്കിന് ആളുകൾ കണ്ടു കഴിഞ്ഞു. ഇത് വലിയൊരു ആരോഗ്യപ്രശ്നമാണെന്നും ഭക്ഷണത്തിന്റെ സുരക്ഷയിൽ വിട്ടുവീഴ്ച ചെയ്യുകയാണെന്നും സോഷ്യൽ മീഡിയയിൽ വിമർശനമുയരുന്നു.
വീഡിയോ കണ്ട പലരും ഈ ചിപ്സ് ബ്രാൻഡ് ഏതാണെന്ന് ചോദിക്കുമ്പോൾ, മറ്റുചിലർ ഇത്തരം ജങ്ക് ഫുഡുകൾ പൂർണ്ണമായും ഒഴിവാക്കണമെന്നാണ് അഭിപ്രായപ്പെടുന്നത്. “ഈ വീഡിയോ കണ്ടപ്പോൾ തന്നെ എനിക്ക് ഓക്കാനം വരുന്നു” എന്നും, “ഇത്രയും വൃത്തികെട്ട സാഹചര്യത്തിൽ നിർമ്മിക്കുന്ന ചിപ്സ് ആരോഗ്യത്തിന് ദോഷകരമാണ്” എന്നും പലരും കമന്റ് ചെയ്തു.
പാക്കറ്റിൽ വരുന്ന പലഹാരങ്ങളും ചിപ്സുകളും കുട്ടികൾക്ക് നൽകുന്നത് നിർത്തണമെന്നും, പേരും ബ്രാൻഡും ഇല്ലാത്ത ഇത്തരം സാധനങ്ങൾ വിപണിയിൽ വരുന്നത് തടയാൻ അധികൃതർ അന്വേഷണം നടത്തണമെന്നും ആവശ്യമുയരുന്നുണ്ട്. മിക്കവാറും ഏതെങ്കിലും പ്രാദേശിക വിപണികളിൽ വിൽക്കുന്ന ബ്രാൻഡ് ഇല്ലാത്ത ചിപ്സുകൾ ആയിരിക്കാം ഇതെന്നും ചിലർ സംശയിക്കുന്നു.
