പൂനെയിൽ നടന്ന വാർഷിക വാരി തീർത്ഥാടന ഘോഷയാത്രയിൽ നിന്നുള്ള ഹൃദയസ്പർശിയായ ഒരു ദൃശ്യം സോഷ്യൽ മീഡിയയിൽ വ്യാപകമായ ശ്രദ്ധ നേടുകയാണ്. പതിനായിരക്കണക്കിന് വാർക്കരി ഭക്തർ ഒരു ആംബുലൻസിന് കടന്നുപോകാൻ ശാന്തമായി വഴിമാറിക്കൊടുക്കുന്ന ഡ്രോൺ ദൃശ്യങ്ങളാണ് വൈറലായത്. ജനക്കൂട്ടത്തിന്റെ അച്ചടക്കത്തെയും ഏകോപനത്തെയും ഉത്തരവാദിത്തബോധത്തെയും പ്രശംസിച്ചുകൊണ്ട് നിരവധി പേരാണ് രംഗത്തെത്തിയത്.
പ്രീതം ബങ്കർ എന്നയാൾ ഇൻസ്റ്റാഗ്രാമിൽ പങ്കുവെച്ച ഈ വീഡിയോ ഇതിനോടകം അഞ്ച് ലക്ഷത്തിലധികം ആളുകൾ കണ്ടുകഴിഞ്ഞു. വൻ ജനക്കൂട്ടമായിരുന്നിട്ടും ആളുകൾ വളരെ വേഗത്തിൽ പ്രതികരിച്ച രീതി സോഷ്യൽ മീഡിയയിൽ വലിയ അഭിനന്ദനങ്ങൾക്ക് കാരണമായി.
ആകാശത്തുനിന്നുള്ള മനോഹരമായ ദൃശ്യങ്ങളോടെയാണ് വീഡിയോ ആരംഭിക്കുന്നത്. ആയിരക്കണക്കിന് വാർക്കരികൾ പരമ്പരാഗത തീർത്ഥാടനത്തിന്റെ ഭാഗമായി ഒരുമിച്ച് നടക്കുന്നത് ഇതിൽ കാണാം. ഘോഷയാത്രയ്ക്ക് ഇടയിലേക്ക് ആംബുലൻസ് എത്തിയതോടെ, തടിച്ചുകൂടിയ ജനക്കൂട്ടം തൊട്ടടുത്ത നിമിഷങ്ങളിൽ ഇരുവശങ്ങളിലേക്കും മാറി കൃത്യമായ ഒരു വഴി ഒരുക്കിക്കൊടുത്തു. ഒട്ടും സമയം കളയാതെ അടിയന്തര വാഹനത്തിന് മുന്നോട്ട് പോകാൻ ഇത് സഹായകരമായി. ഇത്തരം അടിയന്തര ഘട്ടങ്ങളിൽ കൂട്ടായ സഹകരണവും ബോധവൽക്കരണവും എത്രത്തോളം മാറ്റമുണ്ടാക്കുമെന്ന് ഈ സംഭവം തെളിയിക്കുന്നു. ആംബുലൻസിന് വഴിമാറിക്കൊടുക്കുന്നത് ഒരു ഉപകാരമല്ല, മറിച്ച് നമ്മുടെ ഉത്തരവാദിത്തമാണെന്നാണ് വീഡിയോയ്ക്ക് ഒപ്പം എഴുതിയിരിക്കുന്നത്.
വൈറലായ ഈ ദൃശ്യങ്ങൾക്ക് സോഷ്യൽ മീഡിയയിൽ വലിയ പിന്തുണയാണ് ലഭിക്കുന്നത്. പൗരബോധത്തിന്റെ മികച്ച ഉദാഹരണമാണിതെന്ന് പലരും കുറിച്ചപ്പോൾ, ഇത്രയും വലിയൊരു ജനക്കൂട്ടത്തിൽ പോലും അച്ചടക്കം പാലിച്ചതിന് വാർക്കരികളെ മറ്റു ചിലർ അഭിനന്ദിച്ചു. കൃത്യമായ അച്ചടക്കവും പരസ്പരമുള്ള സഹാനുഭൂതിയും ഉണ്ടെങ്കിൽ വലിയ ജനക്കൂട്ടത്തെപ്പോലും എങ്ങനെ നിയന്ത്രിക്കാമെന്ന് ഈ വീഡിയോ കാണിച്ചുതരുന്നു. ദൈനംദിന ജീവിതത്തിലും ആംബുലൻസുകൾക്ക് മടി കൂടാതെ വഴിമാറിക്കൊടുക്കാൻ ഈ സംഭവം എല്ലാവർക്കും ഒരു പ്രചോദനമാകുമെന്നാണ് ഭൂരിഭാഗം ആളുകളുടെയും പ്രതീക്ഷ.
മഹാരാഷ്ട്രയിലെ ഏറ്റവും പ്രധാനപ്പെട്ട ആത്മീയ പാരമ്പര്യങ്ങളിൽ ഒന്നാണ് വാരി തീർത്ഥാടനം. ഓരോ വർഷവും ലക്ഷക്കണക്കിന് ഭക്തരാണ് ഇതിൽ പങ്കെടുക്കുന്നത്. ഭഗവാൻ വിഠോബയെ (വിഷ്ണു രൂപം) പ്രാർത്ഥിക്കുന്നതിനായി വാർക്കരികൾ ദിവസങ്ങളോളം കാൽനടയായി പന്ഢർപൂർ എന്ന ക്ഷേത്രനഗരത്തിലേക്ക് യാത്ര ചെയ്യുന്നു. ഈ വാർഷിക ഘോഷയാത്ര അതിന്റെ ആത്മീയ പ്രാധാന്യത്തിന് മാത്രമല്ല, ഭക്തി, സാമൂഹിക സേവനം, സമത്വം, അച്ചടക്കമുള്ള പങ്കാളിത്തം എന്നിവയ്ക്കും ഏറെ പ്രശസ്തമാണ്.
