ഓരോ കുറച്ചു മാസങ്ങൾ കൂടുമ്പോഴും പ്രണയബന്ധങ്ങളുമായി ബന്ധപ്പെട്ട് പുതിയ ചില വാക്കുകൾ ഇന്റർനെറ്റിൽ പ്രത്യക്ഷപ്പെടാറുണ്ട്. 2026-ൽ സോഷ്യൽ മീഡിയയിൽ ഇത്തരത്തിൽ ചർച്ചയാകുന്ന ഒന്നാണ് ‘ടോളിയാമറി’ . പ്രണയത്തെയും വിശ്വസ്തതയെയും കുറിച്ചുള്ള നമ്മുടെ ധാരണകളെ ചോദ്യം ചെയ്യുന്ന ഈ വാക്ക് യഥാർത്ഥത്തിൽ പുതിയൊരു കാര്യമാണോ അതോ പഴയൊരു സ്വഭാവത്തിന് നൽകിയ പുതിയ പേരാണോ എന്നത് പ്രസക്തമാണ്.
പ്രശസ്ത റിലേഷൻഷിപ്പ് കോളം എഴുത്തുകാരനായ ഡാൻ സാവേജ് ആണ് ‘ടോളിയാമറി’ എന്ന വാക്ക് പരിചയപ്പെടുത്തിയത്. ‘ടോളറേറ്റ്’ (സഹിക്കുക), ‘പോളിയാമറി’ (ഒരേസമയം ഒന്നിലധികം പേരുമായി പ്രണയത്തിലാകുക) എന്നീ രണ്ട് വാക്കുകൾ ചേർത്താണ് ഇത് നിർമ്മിച്ചിരിക്കുന്നത്. പങ്കാളികളിൽ ഒരാൾ മറ്റൊരാളുമായി ബന്ധം പുലർത്തുന്നുണ്ടെന്ന് അറിഞ്ഞിട്ടും, അത് കണ്ടില്ലെന്ന് നടിക്കുകയോ സഹിക്കുകയോ ചെയ്യുന്ന അവസ്ഥയെയാണ് ഇത് സൂചിപ്പിക്കുന്നത്. ഇവിടെ രഹസ്യങ്ങളില്ല, കാര്യങ്ങൾ പങ്കാളിക്ക് അറിയാം. എങ്കിലും ആ ബന്ധം മുന്നോട്ട് പോകുന്നു. ഈ രീതി പണ്ട് മുതലേ സമൂഹത്തിൽ നിലവിലുണ്ടെങ്കിലും ഇപ്പോഴാണ് ഇതിന് ഒരു പേര് ലഭിക്കുന്നത്.
പലപ്പോഴും ടോളിയാമറിയെ പോളിയാമറിയുമായി ആളുകൾ തെറ്റിദ്ധരിക്കാറുണ്ട്. എന്നാൽ ഇവ രണ്ടും തമ്മിൽ വലിയ വ്യത്യാസമുണ്ട്. പോളിയാമറിയിൽ ബന്ധത്തിലുള്ള എല്ലാവരും പരസ്പര സമ്മതത്തോടെയും വ്യക്തമായ ആശയവിനിമയത്തോടെയുമാണ് മുന്നോട്ട് പോകുന്നത്. അവിടെ എല്ലാവരുടെയും താല്പര്യങ്ങൾ സംരക്ഷിക്കപ്പെടുന്നു. എന്നാൽ ടോളിയാമറിയിൽ കാര്യങ്ങൾ അങ്ങനെയല്ല. ഇവിടെ ഒരാൾ തന്റെ പങ്കാളിയുടെ ചതി അല്ലെങ്കിൽ പരബന്ധം മനസ്സില്ലാമനസ്സോടെ സഹിക്കുകയാണ് ചെയ്യുന്നത്. ഇത് ബന്ധത്തിലെ വൈകാരിക തുല്യതയെ തകർക്കുന്നു.
ടോളിയാമറി ഒരു ‘റെഡ് ഫ്ലാഗ്’ അല്ലെങ്കിൽ അപകടസൂചനയായാണ് വിദഗ്ധർ കാണുന്നത്. കാരണം, ഇത് പങ്കാളികളിൽ ഒരാൾ മാത്രം വിട്ടുവീഴ്ച ചെയ്യാൻ നിർബന്ധിതനാകുന്ന അവസ്ഥയുണ്ടാക്കുന്നു. പരസ്പര സമ്മതത്തിന് പകരം, സങ്കടം ഉള്ളിലൊതുക്കി ബന്ധം നിലനിർത്താൻ വേണ്ടി മാത്രം മറ്റൊരാളുടെ തെറ്റായ പെരുമാറ്റത്തെ അംഗീകരിക്കേണ്ടി വരുന്നത് മാനസികമായ പ്രയാസങ്ങൾ ഉണ്ടാക്കും. ചതിയെ ലഘൂകരിക്കാനും കൃത്യമായ ആശയവിനിമയത്തിലൂടെ പ്രശ്നങ്ങൾ പരിഹരിക്കുന്നതിന് തടസ്സമാകാനും ഇത്തരം പ്രവണതകൾ കാരണമാകുന്നു.
