ഗുജറാത്തിലെ മോർബി ജില്ലയിൽ നിന്നുള്ള അസ്വസ്ഥതയുണ്ടാക്കുന്ന ഒരു വീഡിയോ സോഷ്യൽ മീഡിയയിൽ വ്യാപകമായ പ്രതിഷേധത്തിന് കാരണമായിരിക്കുകയാണ്. പ്രായപൂർത്തിയാകാത്ത ഒരു കൊച്ചുബാലൻ പരസ്യമായി സിഗരറ്റ് വലിക്കുന്ന ദൃശ്യങ്ങളാണ് പുറത്തുവന്നത്.
ഒരു പൊതുസ്ഥലത്ത് ഇരിക്കുന്ന കുട്ടിക്ക് ചുറ്റും വലിയൊരു ജനക്കൂട്ടം തടിച്ചുകൂടി നിൽക്കുന്നത് വീഡിയോയിൽ കാണാം. കയ്യിലുള്ള സിഗരറ്റ് കുട്ടി ശാന്തമായി വലിക്കുമ്പോൾ ചുറ്റുമുള്ളവർ ഇത് തടയുന്നതിന് പകരം ഒരു വിനോദമായിട്ടാണ് കാണുന്നത്. ചിലർ കുട്ടിയുടെ നേർക്ക് പണം എറിഞ്ഞുകൊടുക്കുന്നതും ദൃശ്യങ്ങളിലുണ്ട്. നിരവധി മുതിർന്ന പുരുഷന്മാർ അവിടെയുണ്ടായിരുന്നിട്ടും ആരും തന്നെ കുട്ടിയെ അതിൽ നിന്നും പിന്തിരിപ്പിക്കാൻ ശ്രമിച്ചില്ല.
വീഡിയോയുടെ ഇടയിൽ ഒരാൾ കുട്ടിയുടെ അടുത്തേക്ക് വന്ന് മറ്റൊരു സിഗരറ്റ് കൂടി നൽകുന്നുണ്ട്. അത് വാങ്ങുന്ന കുട്ടി ഒരേസമയം രണ്ട് സിഗരറ്റുകൾ വലിക്കുന്നതും വീഡിയോയിൽ കാണാം. കാഴ്ചക്കാർ ഇത് മൊബൈലിൽ പകർത്തുന്നതിലും നോക്കി നിൽക്കുന്നതിലുമാണ് താല്പര്യം കാണിച്ചത്. വീഡിയോയുടെ അവസാനത്തിൽ ഒരാൾ വന്ന് കുട്ടിയുടെ കയ്യിൽ നിന്നും സിഗരറ്റ് പിടിച്ചുവാങ്ങുന്നുണ്ടെങ്കിലും അപ്പോഴേക്കും വലിയൊരു ജനക്കൂട്ടം അവിടെ തടിച്ചുകൂടിയിരുന്നു.
സോഷ്യൽ മീഡിയയിൽ ഈ വീഡിയോ പ്രചരിച്ചതോടെ വലിയ രീതിയിലുള്ള രോഷമാണ് ഉയരുന്നത്. കുട്ടിയുടെ പ്രവൃത്തിയെക്കാൾ ഉപരിയായി, അവിടെയുണ്ടായിരുന്ന മുതിർന്നവരുടെ മനോഭാവത്തെയാണ് ആളുകൾ രൂക്ഷമായി വിമർശിക്കുന്നത്. സഹായം നൽകുന്നതിന് പകരം ഇത്തരം സന്ദർഭങ്ങൾ വീഡിയോയിൽ പകർത്തുന്ന പ്രവണത വർദ്ധിക്കുന്നതിനെതിരെയും വിമർശനങ്ങൾ ഉയർന്നു.
പ്രായപൂർത്തിയാകാത്തവർക്ക് പുകയില ഉൽപ്പന്നങ്ങൾ നൽകുന്നത് നിയമവിരുദ്ധമാണെന്നിരിക്കെ, കുട്ടിയുടെ ആരോഗ്യത്തെയും ഭാവിയെയും ബാധിക്കുന്ന ഇത്തരം പ്രവർത്തികൾ പ്രോത്സാഹിപ്പിക്കപ്പെടുന്നത് വലിയ ആശങ്കയുണ്ടാക്കുന്നു. ഇന്ത്യയിലെ ‘കോട്ട’ നിയമപ്രകാരം 18 വയസ്സിൽ താഴെയുള്ളവർക്ക് പുകയില ഉൽപ്പന്നങ്ങൾ വിൽക്കുന്നത് നിരോധിച്ചിട്ടുള്ളതാണ്. ഇത്തരം സംഭവങ്ങൾ സമൂഹത്തിൽ തെറ്റായ സന്ദേശം നൽകുമെന്ന് ആരോഗ്യവിദഗ്ധരും മുന്നറിയിപ്പ് നൽകുന്നു.
