നമ്മുടെ ദൈനംദിന ജീവിതത്തിൽ അടുക്കളയ്ക്ക് വലിയ പ്രാധാന്യമുണ്ട്, എന്നാൽ അവിടെ നമ്മൾ പതിവായി ഉപയോഗിക്കുന്ന പല വസ്തുക്കൾക്കും വേണ്ടത്ര ശ്രദ്ധ ലഭിക്കാറില്ല. പാത്രങ്ങൾ, കട്ടിംഗ് ബോർഡുകൾ, ക്ലീനിംഗ് ഉൽപ്പന്നങ്ങൾ എന്നിവ മാറ്റിസ്ഥാപിക്കുന്നതിനെക്കുറിച്ച് ചിന്തിക്കാതെ വർഷങ്ങളോളം ആളുകൾ അവ ഉപയോഗിക്കാറുണ്ട്. ഇത്തരത്തിൽ അടുക്കളയിൽ സ്ഥിരമായി ഉപയോഗിക്കുന്ന അഞ്ച് വസ്തുക്കളും അവയ്ക്ക് പകരം ഉപയോഗിക്കാവുന്ന ലളിതമായ മാർഗ്ഗങ്ങളും ചൂണ്ടിക്കാണിക്കുകയാണ് ന്യൂട്രീഷ്യനിസ്റ്റ് രാശി ചൗധരി.
പഴകിപ്പാലായ നോൺ-സ്റ്റിക്ക് പാത്രങ്ങൾ, മങ്ങിത്തുടങ്ങിയ പ്ലാസ്റ്റിക് പാത്രങ്ങൾ, സ്ഥിരമായി ദുർഗന്ധം വമിക്കുന്ന കട്ടിംഗ് ബോർഡുകൾ എന്നിവ നമ്മൾ ചോദ്യം ചെയ്യാതെ ഉപയോഗിക്കുകയാണെന്ന് അവർ ഇൻസ്റ്റാഗ്രാം പോസ്റ്റിൽ പറയുന്നു. ഇത്തരത്തിൽ മാറ്റേണ്ട അഞ്ച് പ്രധാന കാര്യങ്ങൾ ഇതാ:
- സാധാരണ സ്ക്രബ്ബറുകൾ: പാത്രം കഴുകാൻ ഉപയോഗിക്കുന്ന സാധാരണ യെല്ലോ സ്ക്രബ്ബറുകൾ ഉപയോഗിക്കുമ്പോൾ പ്ലാസ്റ്റിക് കണികകൾ പാത്രങ്ങളിൽ പറ്റിപ്പിടിക്കാൻ സാധ്യതയുണ്ട്. ഇതിന് പകരം നാടൻ ചിരട്ട നാരുകൾ കൊണ്ടുള്ള (Coconut coir) സ്ക്രബ്ബറുകൾ ഉപയോഗിക്കാം.
- പ്ലാസ്റ്റിക്/മര കട്ടിംഗ് ബോർഡുകൾ: പ്ലാസ്റ്റിക്, മരം എന്നിവ കൊണ്ടുള്ള കട്ടിംഗ് ബോർഡുകളിൽ പച്ചക്കറികളും മറ്റും വെട്ടുമ്പോൾ വീഴുന്ന വരകളിൽ ബാക്ടീരിയകൾ തങ്ങിനിൽക്കാൻ സാധ്യതയുണ്ട്. ഇത് പൂർണ്ണമായി കഴുകിപ്പോകാൻ ബുദ്ധിമുട്ടാണ്. അതിനാൽ ഇവയ്ക്ക് പകരം സ്റ്റീൽ കട്ടിംഗ് ബോർഡുകൾ ഉപയോഗിക്കുക.
- നോൺ-സ്റ്റിക്ക് പാത്രങ്ങൾ: വര വീണ നോൺ-സ്റ്റിക്ക് പാത്രങ്ങൾ ഉപയോഗിക്കുന്നത് ഒഴിവാക്കണം. ഇവയുടെ കേടായ കോട്ടിംഗ് ഭക്ഷണത്തിൽ കലരാൻ സാധ്യതയുണ്ട്. ഇതിന് പകരമായി കാസ്റ്റ് അയൺ (Cast-iron) പാത്രങ്ങൾ ഉപയോഗിക്കാം.
- പ്ലാസ്റ്റിക് കണ്ടെയ്നറുകൾ: ചൂടുള്ള ഭക്ഷണം പ്ലാസ്റ്റിക് പാത്രങ്ങളിൽ നേരിട്ട് സൂക്ഷിക്കുന്നത് ഒഴിവാക്കണം. ചൂടുള്ള ഭക്ഷണം വെയ്ക്കാൻ സ്റ്റീൽ പാത്രങ്ങൾ ഉപയോഗിക്കുന്നതാണ് സുരക്ഷിതം.
- അടുക്കളയിലെ അഴുക്ക് മാറ്റാൻ ബാത്ത്റൂം ക്ലീനറുകൾ: കേറ്റിലുകളിലും ടാപ്പുകളിലും അടിയുന്ന വെള്ളക്കറകൾ മാറ്റാൻ നീല നിറത്തിലുള്ള ബാത്ത്റൂം ക്ലീനറുകൾ ഉപയോഗിക്കരുത്. ഇവയിലെ രാസവസ്തുക്കൾ ശ്വസിക്കുന്നത് ആരോഗ്യത്തിന് ഹാനികരമാണ്. ഇതിന് പകരം വിനാഗിരി (White vinegar) രാത്രി മുഴുവൻ പുരട്ടി വെച്ച ശേഷം തുടച്ചു മാറ്റുന്നത് അഴുക്ക് എളുപ്പത്തിൽ പോകാൻ സഹായിക്കും.
