മഹാരാഷ്ട്രയിലെ ചന്ദ്രപൂർ ജില്ലയിലുള്ള തഡോബ-അന്ധാരി ടൈഗർ റിസർവിന് സമീപം അമ്മപ്പുലിയും കുഞ്ഞുങ്ങളും റോഡിലൂടെ നടന്നുപോകുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വൈറലായിരിക്കുകയാണ്. പ്രശസ്തമായ ഈ വന്യജീവി സങ്കേതത്തിന് അടുത്തുള്ള മോഹർലി റോഡിലൂടെ ശാന്തരായി നടന്നുപോകുന്ന കടുവ കുടുംബത്തിന്റെ അപൂർവ്വ ദൃശ്യങ്ങളാണ് വഴിയാത്രക്കാരിലൊരാൾ ക്യാമറയിൽ പകർത്തിയത്. പ്രകൃതിദത്തമായ ചുറ്റുപാടിൽ കടുവ കുടുംബത്തെ കണ്ടത് നിരവധി പേരുടെ മനം കവർന്നു.
മഴക്കാലമായതിനാൽ കഴിഞ്ഞ മൂന്ന് മാസത്തോളമായി തഡോബ വന്യജീവി സങ്കേതത്തിലേക്ക് വിനോദസഞ്ചാരികൾക്ക് പ്രവേശനമില്ല. മനുഷ്യരുടെയും വാഹനങ്ങളുടെയും സാന്നിധ്യം കുറഞ്ഞതോടെ കാട്ടുമൃഗങ്ങൾ കൂടുതൽ സ്വതന്ത്രമായി വനമേഖലകളിലും സമീപത്തെ റോഡുകളിലും സഞ്ചരിക്കാൻ തുടങ്ങിയിട്ടുണ്ട്. മഴക്കാലത്ത് ഭക്ഷണവും വെള്ളവും സുരക്ഷിതമായ വഴികളും തേടി മൃഗങ്ങൾ ഇതുപോലെ പുറത്തുവരുന്നത് സാധാരണയാണെന്ന് വിദഗ്ധർ വ്യക്തമാക്കുന്നു.
വീഡിയോ വൈറലായതിനെ തുടർന്ന് കാട്ടുപാതകളിലൂടെ യാത്ര ചെയ്യുന്നവർ ജാഗ്രത പാലിക്കണമെന്ന് വനംവകുപ്പ് അധികൃതർ നിർദ്ദേശിച്ചിട്ടുണ്ട്. ഇത്തരം മേഖലകളിൽ അമിതവേഗത ഒഴിവാക്കാനും, അനാവശ്യമായി വാഹനം നിർത്താതിരിക്കാനും, മൃഗങ്ങളെ കാണുമ്പോൾ അവയെ ശല്യപ്പെടുത്താനോ അടുത്തുപോകാനോ ശ്രമിക്കരുതെന്നും യാത്രക്കാരോട് അഭ്യർത്ഥിച്ചിട്ടുണ്ട്.
മഹാരാഷ്ട്രയിലെ ചന്ദ്രപൂർ ജില്ലയിൽ സ്ഥിതി ചെയ്യുന്ന തഡോബ-അന്ധാരി ടൈഗർ റിസർവ് സംസ്ഥാനത്തെ ഏറ്റവും പഴക്കമുള്ളതും ഇന്ത്യയിലെ തന്നെ പ്രധാനപ്പെട്ടതുമായ കടുവാ സങ്കേതങ്ങളിലൊന്നാണ്. ബംഗാൾ കടുവകൾക്ക് പുറമെ പുള്ളിപ്പുലികൾ, കരടികൾ, കാട്ടുനായ്ക്കൾ, കാട്ടുപോത്തുകൾ, വിവിധതരം മാനുകൾ, അപൂർവ്വ പക്ഷികൾ എന്നിവയുടെ സങ്കേതം കൂടിയാണിത്.
