നീറ്റ് യു.ജി. 2026 ചോദ്യക്കടലാസ് ചോർച്ചയുമായി ബന്ധപ്പെട്ട് ഞെട്ടിക്കുന്ന വിവരങ്ങളാണ് ഇപ്പോൾ പുറത്തുവരുന്നത്. അറസ്റ്റിലായ യുവമോർച്ച-ബിജെപി നേതാവ് ദിനേഷ് ബിവാൾ, പന്ത്രണ്ടാം ക്ലാസ് കഷ്ടിച്ച് കടന്നുകൂടിയ തന്റെ മകന് വേണ്ടിയാണ് ചോദ്യക്കടലാസ് ചോർത്തിയതെന്ന് അന്വേഷണത്തിൽ വ്യക്തമായി.
രാജസ്ഥാൻ ബോർഡ് പരീക്ഷയിൽ ഗ്രേസ് മാർക്കിന്റെ സഹായത്തോടെ രണ്ടാം ഡിവിഷൻ മാത്രം നേടിയ മകൻ ഋഷി ബിവാളിന് വേണ്ടിയായിരുന്നു ഈ നീക്കം. 500-ൽ വെറും 254 മാർക്ക് മാത്രമാണ് ഋഷിക്ക് ലഭിച്ചിരുന്നത്. ഈ വർഷത്തെ നീറ്റ് പരീക്ഷ എഴുതിയ മകനെ എങ്ങനെയെങ്കിലും വിജയിപ്പിക്കാനാണ് ദിനേഷ് ചോദ്യക്കടലാസ് സംഘടിപ്പിച്ചത്.
ഈ കേസിൽ ദിനേഷ് ബിവാളിനൊപ്പം സഹോദരൻ മംഗിലാൽ ബിവാളിനെയും സി.ബി.ഐ. അറസ്റ്റ് ചെയ്തിട്ടുണ്ട്. ഹരിയാന സ്വദേശിയായ ഒരാളിൽ നിന്ന് 15 ലക്ഷം രൂപയ്ക്കാണ് ഇവർ ചോദ്യക്കടലാസ് വാങ്ങിയത്. സ്വന്തം മകന് വേണ്ടി മാത്രമല്ല, സിക്കറിലെ നിരവധി വിദ്യാർത്ഥികൾക്കും ഇവർ ഈ ചോദ്യക്കടലാസ് മറിച്ചുവിറ്റതായി അന്വേഷണ സംഘം കണ്ടെത്തിയിട്ടുണ്ട്. ഇതോടെ ചോദ്യക്കടലാസ് ചോർച്ചയിൽ ഒരു വലിയ മാഫിയ തന്നെ പ്രവർത്തിച്ചിട്ടുണ്ടെന്നാണ് സൂചന.
ദിനേഷിന്റെയും മംഗിലാലിന്റെയും കുടുംബത്തിലെ മറ്റ് അംഗങ്ങളുടെ വിജയവും ഇപ്പോൾ സംശയനിഴലിലാണ്. കഴിഞ്ഞ വർഷം ഈ ഒരൊറ്റ കുടുംബത്തിൽ നിന്നുള്ള അഞ്ച് പേരാണ് നീറ്റ് പരീക്ഷയിൽ ഒന്നിച്ച് വിജയിച്ചത്. ഇവരെല്ലാവരും നിലവിൽ വിവിധ സർക്കാർ മെഡിക്കൽ കോളേജുകളിൽ പഠിച്ചുവരികയാണ്. ഒരു സാധാരണ കുടുംബത്തിലെ അഞ്ച് പേർ ഒരേസമയം വിജയിച്ചത് ഉദ്യോഗസ്ഥരിൽ സംശയമുണ്ടാക്കി. മുൻ വർഷങ്ങളിലും ഇവർ ചോദ്യക്കടലാസ് ചോർത്തിയിട്ടുണ്ടാകാമെന്ന നിഗമനത്തിലാണ് സി.ബി.ഐ. ഇപ്പോൾ.
ദിനേഷിന്റെയും മംഗിലാലിന്റെയും മക്കളും ബന്ധുക്കളും ബനാറസ്, മുംബൈ, ദൗസ തുടങ്ങിയ സ്ഥലങ്ങളിലെ മെഡിക്കൽ കോളേജുകളിലാണ് പഠിക്കുന്നത്. സിക്കറിലെ കോച്ചിംഗ് സെന്ററുകൾ കേന്ദ്രീകരിച്ചും സി.ബി.ഐ. അന്വേഷണം വ്യാപിപ്പിച്ചിട്ടുണ്ട്. പരീക്ഷയ്ക്ക് 15 മണിക്കൂർ മുമ്പ് തന്നെ സിക്കറിലെ പല വിദ്യാർത്ഥികൾക്കും ചോദ്യക്കടലാസ് ലഭിച്ചതായാണ് വിവരം. ഈ അന്തർസംസ്ഥാന ശൃംഖലയിലെ പ്രധാന കണ്ണി എന്ന് കരുതുന്ന രാകേഷ് മണ്ഡവാരിയയെ അന്വേഷണസംഘം ചോദ്യം ചെയ്തുവരികയാണ്.
കേസുമായി ബന്ധപ്പെട്ട് കസ്റ്റഡിയിലെടുത്ത രണ്ട് ഡസനോളം വിദ്യാർത്ഥികളെയും രക്ഷിതാക്കളെയും ചോദ്യം ചെയ്ത ശേഷം വിട്ടയച്ചു. ഇവരെ ആവശ്യമെങ്കിൽ വീണ്ടും വിളിപ്പിക്കുമെന്ന് ഉദ്യോഗസ്ഥർ അറിയിച്ചിട്ടുണ്ട്. രാഷ്ട്രീയ സ്വാധീനവും പണവും ഉപയോഗിച്ച് നടന്ന ഈ വലിയ ക്രമക്കേട് മെഡിക്കൽ പ്രവേശന പരീക്ഷയുടെ വിശ്വാസ്യതയെ തന്നെ ചോദ്യം ചെയ്യുന്നതാണ്. വരും ദിവസങ്ങളിൽ ഈ കേസിൽ കൂടുതൽ അറസ്റ്റുകൾ ഉണ്ടാകാനാണ് സാധ്യത.
