ക്ലൈമാക്സില്‍ കളി മറന്ന് പഞ്ചാബ് കിങ്സ്, തുടർച്ചയായ നാലാം തോൽവി, ചേസിങ്ങിൽ മുട്ടുകുത്തിച്ച്’ ഡൽഹി, മൂന്ന് വിക്കറ്റ് വിജയം

ധരംശാലയിൽ നടന്ന ആവേശകരമായ മത്സരത്തിൽ പഞ്ചാബ് കിങ്സിനെ മൂന്ന് വിക്കറ്റിന് തോൽപിച്ച് ഡൽഹി ക്യാപിറ്റൽസ്. പ്ലേ ഓഫ് ലക്ഷ്യമിട്ടിറങ്ങിയ പഞ്ചാബിന് ഡൽഹിയേറ്റുവാങ്ങിയ ഈ തോൽവി കനത്ത തിരിച്ചടിയായി. ടൂർണമെന്റിലെ പഞ്ചാബിന്റെ തുടർച്ചയായ നാലാം തോൽവിയാണിത്. നിലവിൽ 13 പോയിന്റുമായി നാലാം സ്ഥാനത്താണ് പഞ്ചാബ്. ഈ കളി ജയിച്ചിരുന്നെങ്കിൽ 15 പോയിന്റോടെ അവർക്ക് ഒന്നാം സ്ഥാനത്ത് എത്താമായിരുന്നു. പഞ്ചാബ് ഉയർത്തിയ 211 റൺസ് എന്ന വലിയ ലക്ഷ്യം 19 ഓവറിൽ ഏഴ് വിക്കറ്റ് നഷ്ടത്തിൽ ഡൽഹി മറികടന്നു. ധരംശാലയിലെ മൈതാനത്ത് വിജയകരമായി പിന്തുടർന്ന് ജയിക്കുന്ന ഏറ്റവും ഉയർന്ന സ്കോറാണിത്.

തുടക്കത്തിൽ 33 റൺസിനിടെ മൂന്ന് വിക്കറ്റുകൾ നഷ്ടമായി തകർച്ചയിലായിരുന്ന ഡൽഹിയെ ക്യാപ്റ്റൻ അക്ഷർ പട്ടേലും ഡേവിഡ് മില്ലറും ചേർന്ന് അർധ സെഞ്ചറികളിലൂടെ കരകയറ്റി. കെ.എൽ. രാഹുൽ (9), അഭിഷേക് പൊറേൽ (5), സഹിൽ പരാഖ് (13) എന്നിവർ നേരത്തെ മടങ്ങിയത് ഡൽഹിയെ സമ്മർദ്ദത്തിലാക്കിയിരുന്നു. പവർപ്ലേയിൽ 47 റൺസ് നേടിയ ഡൽഹിക്ക് വേണ്ടി അക്ഷർ പട്ടേൽ 30 പന്തിൽ 56 റൺസും ഡേവിഡ് മില്ലർ 28 പന്തിൽ 51 റൺസുമെടുത്ത് മികച്ച അടിത്തറ നൽകി. അവസാന ഘട്ടത്തിൽ പത്ത് പന്തിൽ 24 റൺസ് നേടിയ അശുതോഷ് ശർമയുടെ ബാറ്റിങ്ങും വിജയത്തിൽ നിർണായക പങ്കുവഹിച്ചു.

വിജയിക്കാൻ അവസാന രണ്ടോവറിൽ 17 റൺസ് വേണ്ടിയിരുന്ന ഘട്ടത്തിൽ യഷ് താക്കൂർ എറിഞ്ഞ പത്തൊൻപതാം ഓവറിൽ അശുതോഷ് പുറത്തായെങ്കിലും ഡൽഹി പതറിയില്ല. അക്വിബ് നബി (10), മാധവ് തിവാരി (18) എന്നിവർ ചേർന്ന് ആറ് പന്തുകൾ ബാക്കിനിൽക്കെ ടീമിനെ വിജയതീരത്തെത്തിച്ചു. നേരത്തെ ടോസ് നഷ്ടപ്പെട്ട് ബാറ്റിങ്ങിന് ഇറങ്ങിയ പഞ്ചാബ് നിശ്ചിത 20 ഓവറിൽ അഞ്ച് വിക്കറ്റ് നഷ്ടത്തിലാണ് 210 റൺസെടുത്തത്. ക്യാപ്റ്റൻ ശ്രേയസ് അയ്യർ (59 നോട്ടൗട്ട്), പ്രിയൻഷ് ആര്യ (56) എന്നിവരുടെ അർധ സെഞ്ചറികളാണ് പഞ്ചാബിന് കൂറ്റൻ സ്കോർ സമ്മാനിച്ചത്.

പഞ്ചാബിന് വേണ്ടി കൂപ്പർ കോണോലി 38 റൺസും സുര്യാൻഷ് ഷെഡ്ഗെ 21 റൺസും നേടി. വിക്കറ്റ് നഷ്ടമില്ലാതെ 72 റൺസെടുത്ത പവർപ്ലേ പഞ്ചാബിന് മികച്ച തുടക്കമാണ് നൽകിയത്. പിന്നീട് പ്രഭ്സിമ്രാൻ സിങ്ങിനെയും പ്രിയൻഷ് ആര്യയെയും ഡൽഹി ബൗളർമാർ പുറത്താക്കി. തുടർന്ന് ഒത്തുചേർന്ന ശ്രേയസ് അയ്യരും കോണോലിയും ചേർന്ന് സ്കോർ വേഗത്തിൽ ഉയർത്തി. മിച്ചൽ സ്റ്റാർക്ക് എറിഞ്ഞ പത്തൊൻപതാം ഓവറിൽ സ്റ്റോയ്നിസും ശശാങ്ക് സിങ്ങും തുടർച്ചയായ പന്തുകളിൽ പുറത്തായെങ്കിലും അവസാന ഓവറുകളിൽ തകർത്തടിച്ച സുര്യാൻഷ് ഷെഡ്ഗെ പഞ്ചാബിനെ 210 എന്ന മികച്ച സ്കോറിൽ എത്തിക്കുകയായിരുന്നു.