അഖിൽ മാരാറുടെ പ്രസവത്തെക്കുറിച്ചുള്ള വിവാദ പരാമർശങ്ങൾക്കെതിരെ രൂക്ഷമായ പ്രതികരണവുമായി നടി മഞ്ജു പത്രോസ്. പഴയകാലത്തെ സ്ത്രീകൾക്ക് മികച്ച ശാരീരിക ആരോഗ്യം ഉണ്ടായിരുന്നിരിക്കാമെന്നും എന്നാൽ അത് വെച്ച് ഇന്നത്തെ സ്ത്രീകളെ താരതമ്യം ചെയ്യരുതെന്നും മഞ്ജു പറഞ്ഞു. തത്വചിന്ത പറയുന്നവർക്ക് കാര്യങ്ങൾ എളുപ്പത്തിൽ പറയാമെന്നും എന്നാൽ സഹജീവികളെ മനുഷ്യനായി കാണാൻ പഠിക്കണമെന്നും താരം കൂട്ടിച്ചേർത്തു.
തന്റെ അമ്മ വെള്ളം കോരുന്നതിനിടയിൽ ആശുപത്രിയിൽ പോയി തന്നെ പ്രസവിച്ച് മടങ്ങി വന്ന കഥകൾ കേട്ടിട്ടുണ്ടെന്ന് മഞ്ജു ഓർമ്മിച്ചു. അക്കാലത്ത് ആധുനിക സൗകര്യങ്ങളോ യന്ത്രങ്ങളോ ഇല്ലാത്തതിനാൽ സ്ത്രീകൾക്ക് വലിയ ശാരീരിക ശേഷി ഉണ്ടായിരുന്നിരിക്കാം. എന്നാൽ ഇന്നത്തെ സാഹചര്യം അങ്ങനെയല്ലെന്നും ജനിച്ചത് മുതൽ യന്ത്രങ്ങളെ ആശ്രയിക്കുന്നതിനാൽ പഴയ ആരോഗ്യം ഇന്നത്തെ സ്ത്രീകൾക്കില്ലെന്നും മഞ്ജു ചൂണ്ടിക്കാട്ടി. പ്രസവം ലളിതമായ ഒന്നാണെന്ന് ആരും പറയരുതെന്നും മഞ്ജു ആവശ്യപ്പെട്ടു.
തന്റെ സിസേറിയൻ അനുഭവവും താരം പങ്കുവെച്ചു. സർക്കാർ ആശുപത്രിയിൽ മികച്ച സൗകര്യങ്ങളോടെയാണ് പ്രസവം നടന്നതെങ്കിലും ആ വേദന ഇപ്പോഴും ഓർമ്മയുണ്ടെന്ന് മഞ്ജു പറഞ്ഞു. ശ്വാസം വിടാൻ പോലും കഴിയാത്ത അവസ്ഥയായിരുന്നു അന്ന്. അടുത്ത ദിവസം തന്നെ എഴുന്നേൽപ്പിച്ചു നടത്തിയപ്പോഴുള്ള പ്രയാസങ്ങളും മറന്നിട്ടില്ല. ഇത്തരം യാഥാർത്ഥ്യങ്ങൾ മനസ്സിലാക്കാതെ വിഡ്ഢിത്തങ്ങൾ പറയുന്നത് ശരിയല്ലെന്നും സഹജീവികളോട് സഹാനുഭൂതി വേണമെന്നും മഞ്ജു പത്രോസ് വ്യക്തമാക്കി.
