ലോകമെമ്പാടും ആളുകൾ ധാരാളമായി കുടിക്കുന്ന ഒന്നാണ് കട്ടൻ ചായ. ഇതിന്റെ രുചിയും ശരീരത്തിന് നൽകുന്ന ഉന്മേഷവും ഏറെ പ്രശസ്തമാണ്. കട്ടൻ ചായയിൽ അടങ്ങിയിരിക്കുന്ന ചില ഘടകങ്ങൾക്ക് രോഗപ്രതിരോധശേഷി വർദ്ധിപ്പിക്കാനുള്ള കഴിവുണ്ട്. മധുരം ചേർക്കാതെ കട്ടൻ ചായ കുടിക്കുന്നത് കലോറി കുറഞ്ഞ ഒരു നല്ല പാനീയമാണ്. ദിവസവും കട്ടൻ ചായ കുടിക്കുന്നത് ഹൃദയാരോഗ്യത്തിനും രക്തയോട്ടം മെച്ചപ്പെടുത്തുന്നതിനും ഉപാപചയ പ്രവർത്തനം (metabolism) മെച്ചപ്പെടുത്തുന്നതിനും സഹായിക്കുമെന്ന് ചില പഠനങ്ങൾ വ്യക്തമാക്കുന്നു.
എന്നാൽ ദിവസവും ഒരു കപ്പ് കട്ടൻ ചായ കുടിക്കുന്നത് വണ്ണം കുറയ്ക്കാൻ സഹായിക്കുമോ? കട്ടൻ ചായ നേരിട്ട് കൊഴുപ്പ് കത്തിച്ചുകളയും എന്ന് ലളിതമായി പറയാനാവില്ല. എങ്കിലും, കട്ടൻ ചായയിലുള്ള ചില ഘടകങ്ങൾ ശരീരം ഊർജ്ജവും കൊഴുപ്പും ഉപയോഗിക്കുന്ന രീതിയെ സ്വാധീനിച്ചേക്കാം. ശരീരഭാരത്തിൽ ചെറിയ മാറ്റങ്ങൾ വരുത്താൻ ഇത് സഹായിക്കുമെന്ന് കണ്ടെത്തലുകളുണ്ടെങ്കിലും, കട്ടൻ ചായ ഒരു വണ്ണം കുറയ്ക്കാനുള്ള മരുന്നല്ല. കൂടുതൽ കലോറിയുള്ള പാനീയങ്ങൾക്ക് പകരം കട്ടൻ ചായ കുടിക്കുകയും, അതോടൊപ്പം നല്ല ഭക്ഷണരീതിയും വ്യായാമവും പിന്തുടരുകയും ചെയ്യുമ്പോഴാണ് ഇതിന്റെ പ്രയോജനം ലഭിക്കുന്നത്.
മധുരം ചേർക്കാത്ത കട്ടൻ ചായയിൽ കലോറി വളരെ കുറവാണ്. അതിനാൽ മധുരമുള്ള മറ്റ് പാനീയങ്ങൾക്ക് പകരം കട്ടൻ ചായ തിരഞ്ഞെടുക്കുന്നത് ശരീരത്തിലെത്തുന്ന കലോറിയുടെ അളവ് കുറയ്ക്കാൻ സഹായിക്കും. എന്നാൽ ഇതിലേക്ക് പഞ്ചസാരയോ തേനോ പാലോ ചേർക്കുന്നത് കലോറി കൂട്ടും. കട്ടൻ ചായയിലുള്ള പ്രകൃതിദത്ത ഘടകങ്ങൾ ശരീരത്തിന്റെ ഉപാപചയ പ്രവർത്തനങ്ങളെയും കൊഴുപ്പ് വിഘടിക്കുന്ന പ്രക്രിയയെയും സ്വാധീനിച്ചേക്കാം. എങ്കിലും, ഇത് വേഗത്തിൽ വണ്ണം കുറയ്ക്കുമെന്ന അവകാശവാദങ്ങളിൽ കഴമ്പില്ല.
കട്ടൻ ചായയിലെ ഘടകങ്ങൾ കുടലിലെ നല്ല ബാക്ടീരിയകളുടെ പ്രവർത്തനത്തെ സഹായിക്കുന്നവയാണ്. കുടലിന്റെ ആരോഗ്യം മെച്ചപ്പെടുന്നത് മൊത്തത്തിലുള്ള ആരോഗ്യത്തിന് നല്ലതാണെങ്കിലും, കട്ടൻ ചായ കുടിച്ചതുകൊണ്ട് മാത്രം വണ്ണം കുറയുമെന്ന് പറയാനാകില്ല. മധുരമുള്ള പാനീയങ്ങൾക്ക് പകരം പ്ലെയിൻ കട്ടൻ ചായ കുടിക്കുന്ന ശീലം ദീർഘകാലാടിസ്ഥാനത്തിൽ ശരീരഭാരം നിയന്ത്രിക്കാൻ സഹായിക്കും. കൂടാതെ, ഇതിലടങ്ങിയിരിക്കുന്ന കഫീൻ താൽക്കാലികമായി ഉന്മേഷവും ഊർജ്ജവും നൽകുമെങ്കിലും, സ്ഥിരമായി ഉപയോഗിക്കുമ്പോൾ ഇതിന്റെ സ്വാധീനം കുറഞ്ഞുവരാം.
മൊത്തത്തിലുള്ള ഭക്ഷണക്രമം, വ്യായാമം, ഉറക്കം എന്നിവയ്ക്കൊപ്പം ഒരു ആരോഗ്യകരമായ ജീവതശൈലിയുടെ ഭാഗമായി മാറുമ്പോൾ മാത്രമേ കട്ടൻ ചായയുടെ പ്രയോജനങ്ങൾ പൂർണ്ണമായി ലഭിക്കൂ. അമിതമായി കലോറിയുള്ള ഭക്ഷണം കഴിച്ചുകൊണ്ട് കട്ടൻ ചായ മാത്രം കുടിച്ചാൽ വണ്ണം കുറയില്ല. സാധാരണയായി ആരോഗ്യവാനായ ഒരാൾക്ക് കഫീൻ സഹിക്കാനുള്ള ശേഷി അനുസരിച്ച് ദിവസവും 1 മുതൽ 3 കപ്പ് വരെ കട്ടൻ ചായ കുടിക്കാവുന്നതാണ്. വണ്ണം കുറയ്ക്കുകയാണ് ലക്ഷ്യമെങ്കിൽ മധുരം പൂർണ്ണമായും ഒഴിവാക്കുകയോ വളരെ കുറഞ്ഞ അളവിൽ മാത്രം ഉപയോഗിക്കുകയോ ചെയ്യുന്നതാണ് നല്ലത്.
