തിരുവനന്തപുരം: പതിനേഴുകാരനായ പ്ലസ് വൺ വിദ്യാർഥിയെ കൊലപ്പെടുത്തി ചാക്കിൽക്കെട്ടി തള്ളിയ സംഭവത്തിൽ പെൺസുഹൃത്തിനെയും പ്രായപൂർത്തിയാകാത്ത മറ്റൊരാളെയും പൊലീസ് കസ്റ്റഡിയിലെടുത്തു. മൃതദേഹം ഒളിപ്പിക്കാൻ ഇവർ സഹായം തേടിയ ക്രിമിനൽ പശ്ചാത്തലമുള്ള ഉമർ എന്നയാളെയും പിടികൂടിയിട്ടുണ്ട്. പെൺകുട്ടിയെച്ചൊല്ലിയുള്ള തർക്കമാണ് കൊലപാതകത്തിൽ കലാശിച്ചതെന്നാണ് പൊലീസിന്റെ നിഗമനം. ബെൽറ്റ് ഉപയോഗിച്ച് കഴുത്തു മുറുക്കിയാണ് കൊല നടത്തിയതെന്ന് കസ്റ്റഡിയിലുള്ള കൗമാരക്കാരൻ പൊലീസിനോട് സമ്മതിച്ചു.
അച്ഛനും മുത്തശ്ശിക്കുമൊപ്പമാണ് കൊല്ലപ്പെട്ട അഭിരാം താമസിച്ചിരുന്നത്. അമ്മയും സഹോദരിയും വിദേശത്ത് ജോലി ചെയ്യുകയാണ്. അഭിരാമും പെൺസുഹൃത്തും തമ്മിലുള്ള സോഷ്യൽ മീഡിയ ചാറ്റുകൾ പെൺകുട്ടിയുടെ സുഹൃത്തായ പതിനേഴുകാരനും കാണാറുണ്ടായിരുന്നു. പെൺസുഹൃത്തിന്റെ അക്കൗണ്ടിൽനിന്ന് എന്ന വ്യാജേന അഭിരാമിന് സന്ദേശങ്ങൾ അയച്ചിരുന്നത് ഈ പ്രതിയാണെന്നാണ് സൂചന. പെൺകുട്ടിയെച്ചൊല്ലിയുണ്ടായ തർക്കമാണ് ഒടുവിൽ കൊലപാതകത്തിൽ കലാശിച്ചത്.
ഇതൊരു ആസൂത്രിത കൊലപാതകമാണെന്ന് പൊലീസ് ഇതുവരെ ഉറപ്പിച്ചിട്ടില്ല. അഭിരാമിനെ ഭയപ്പെടുത്താനായി വിളിച്ചുവരുത്തുകയും തുടർന്നുണ്ടായ കൈയേറ്റത്തിനിടെ മരണം സംഭവിക്കുകയുമായിരുന്നുവെന്നാണ് പ്രാഥമിക നിഗമനം. ശ്വാസകോശ സംബന്ധമായ രോഗമുള്ള ആളായിരുന്നു അഭിരാമെന്ന് ബന്ധുക്കൾ വ്യക്തമാക്കിയിട്ടുണ്ട്.
ഞായറാഴ്ച മുതൽ കാണാതായ എം.ഡി. അഭിരാമിന്റെ മൃതദേഹം ഇന്നലെ വൈകിട്ടാണ് ശ്രീകാര്യം പാങ്ങപ്പാറ കമുകിൻകോട് ക്ഷേത്രത്തിന് സമീപത്തെ ഒഴിഞ്ഞ പറമ്പിൽനിന്ന് ചാക്കിൽക്കെട്ടിയ നിലയിൽ കണ്ടെത്തിയത്. പാങ്ങപ്പാറ ഭഗത്‌സിങ് നഗർ പുതുവൽ പുത്തൻ വീട്ടിൽ മധുകുമാറിന്റെയും ധർമജയുടെയും മകനായ അഭിരാം നാലാഞ്ചിറയിലെ സ്കൂളിലാണ് പഠിക്കുന്നത്. ഞായറാഴ്ച ഉച്ചയ്ക്ക് മൂന്നുമണിയോടെയാണ് താരം വീട്ടിൽനിന്നിറങ്ങിയത്.
രാത്രി ഏഴുമണിയോടെ വീട്ടിലേക്ക് വിളിച്ച് ഉടൻ എത്തുമെന്ന് പറഞ്ഞെങ്കിലും പിന്നീട് ഫോൺ സ്വിച്ച് ഓഫ് ആകുകയായിരുന്നു എന്ന് പിതാവ് മധുകുമാർ പറഞ്ഞു. തുടർന്ന് ബന്ധുക്കൾ ശ്രീകാര്യം പൊലീസിൽ പരാതി നൽകി. കാണാതായ കേസിലെ അന്വേഷണത്തിനിടെയാണ് പെൺസുഹൃത്തും കൗമാരക്കാരനും കസ്റ്റഡിയിലാകുന്നത്. അഭിരാം വീട്ടിൽനിന്നിറങ്ങുന്നതിന് തൊട്ടുമുമ്പ് പെൺകുട്ടിയുടെ അക്കൗണ്ടിൽനിന്ന് മെസ്സേജ് വന്നിരുന്നതായി പൊലീസ് കണ്ടെത്തി. കൂടാതെ പ്രതിയായ കൗമാരക്കാരനൊപ്പം അഭിരാം കാറിൽ പോകുന്ന സിസിടിവി ദൃശ്യങ്ങളും ലഭിച്ചു. ഇവരെ വിശദമായി ചോദ്യം ചെയ്തതോടെയാണ് കൊലപാതക വിവരം പുറത്തുവന്നതും മൃതദേഹം കണ്ടെത്തിയതും. മൃതദേഹം ഒളിപ്പിക്കാനാണ് പരിചയക്കാരനായ ഉമറിന്റെ സഹായം തേടിയതെന്ന് പ്രതികൾ മൊഴി നൽകിയിട്ടുണ്ട്.
