നമ്മുടെ ശരീരത്തിലെ ഓരോ ആരോഗ്യപ്രശ്നവും അവയവങ്ങളുടെ പ്രവർത്തനത്തെ ബാധിക്കാറുണ്ട്. ഉറക്കത്തെ വല്ലാതെ തടസ്സപ്പെടുത്തുന്ന സ്ലീപ് അപ്നിയ എന്ന അവസ്ഥ ഹൃദയാരോഗ്യത്തെയും ഗുരുതരമായി ബാധിക്കും. ഉറക്കത്തിൽ ശ്വാസോച്ഛ്വാസം തുടർച്ചയായി തടസ്സപ്പെടുകയും വീണ്ടും പുനരാരംഭിക്കുകയും ചെയ്യുന്ന അവസ്ഥയാണ് സ്ലീപ് അപ്നിയ. തൊണ്ടയിലെ പേശികളും മൃദുവായ കോശങ്ങളും അയഞ്ഞ് ശ്വാസതടസ്സം ഉണ്ടാകുന്നതാണ് ഇതിൽ ഏറ്റവും സാധാരണമായി കാണുന്ന ഒബ്സ്ട്രക്ടീവ് സ്ലീപ് അപ്നിയ. ഉറക്കത്തിലെ ഉച്ചത്തിലുള്ള കൂർക്കംവലി, ശ്വാസം മുട്ടൽ, ഉറക്കത്തിനിടയിലെ ശ്വാസം നിലയ്ക്കൽ, രാവിലെയുള്ള തലവേദന, വായ ഉണങ്ങിപ്പോകുക, ശ്രദ്ധക്കുറവ്, പകൽ സമയത്തെ കഠിനമായ ക്ഷീണവും ഉറക്കത്തൂക്കവും എന്നിവ ഇതിന്റെ പ്രധാന ലക്ഷണങ്ങളാണ്.
ഉറക്കത്തിൽ ശ്വാസം തടസ്സപ്പെടുമ്പോൾ രക്തത്തിലെ ഓക്സിജന്റെ അളവ് കുറയുകയും ശരീരം വലിയ സമ്മർദ്ദത്തിലാകുകയും ചെയ്യുന്നു. ഇത് പലപ്പോഴും വ്യക്തികൾ അറിയണമെന്നില്ല. തുടർച്ചയായ ഓക്സിജൻ കുറവും രക്തസമ്മർദ്ദത്തിലെ വ്യതിയാനങ്ങളും രക്തക്കുഴലുകളിൽ വീക്കമുണ്ടാക്കുകയും ഹൃദയമിടിപ്പ് വർദ്ധിപ്പിക്കുകയും ചെയ്യുന്നു. കൃത്യമായി ചികിത്സിച്ചില്ലെങ്കിൽ ഇത് അമിത രക്തസമ്മർദ്ദം, ഹൃദ്രോഗം, സ്ട്രോക്ക്, ക്രമരഹിതമായ ഹൃദയമിടിപ്പ്, ഉപാപചയ പ്രശ്നങ്ങൾ എന്നിവയ്ക്ക് കാരണമാകും. കൂടാതെ പകൽ സമയത്തെ ഉറക്കം കാരണം അപകട സാധ്യതകളും വർദ്ധിക്കുന്നു.
അമിതവണ്ണം, പ്രമേഹം, അമിത രക്തസമ്മർദ്ദം എന്നിവയുള്ളവരിൽ ഈ രോഗസാധ്യത കൂടുതലാണ്. അതിനാൽ തുടർച്ചയായ കൂർക്കംവലിയോ ശ്വാസതടസ്സമോ അവഗണിക്കാതെ തുടക്കത്തിലേ വൈദ്യസഹായം തേടേണ്ടതുണ്ട്. ശരീരഭാരം കുറയ്ക്കുക, പുകവലിയും മദ്യപാനവും ഉറക്ക ഗുളികകളുടെ ഉപയോഗവും ഒഴിവാക്കുക, മലർന്നു കിടക്കാതെ ചരിഞ്ഞു കിടന്നു ഉറങ്ങുക എന്നിവ ശ്വാസതടസ്സം കുറയ്ക്കാൻ സഹായിക്കും.
സ്ഥിരമായ ഉറക്കക്രമം പാലിക്കുന്നതും അമിത രക്തസമ്മർദ്ദവും പ്രമേഹവും നിയന്ത്രിച്ചു നിർത്തുന്നതും അത്യന്താപേക്ഷിതമാണ്. ഡോക്ടറുടെ നിർദ്ദേശപ്രകാരം സി-പാപ് (CPAP) തെറാപ്പി പോലുള്ള ചികിത്സകളോ മൂക്കിലെയും തൊണ്ടയിലെയും ഘടനാപരമായ തടസ്സങ്ങൾ പരിഹരിക്കാനുള്ള ഇ.എൻ.ടി ചികിത്സകളോ സ്വീകരിക്കാം. കൃത്യമായ പരിശോധനയിലൂടെയും ലളിതമായ ജീവിതശൈലി മാറ്റങ്ങളിലൂടെയും സ്ലീപ് അപ്നിയ പൂർണ്ണമായും നിയന്ത്രിച്ച് ഹൃദയാരോഗ്യം സംരക്ഷിക്കാൻ സാധിക്കും.
