കറാച്ചി ∙ സോഷ്യൽ മീഡിയയിലൂടെ പ്രണയിച്ച്, വീഡിയോ കോളിലൂടെ വിവാഹിതനായ ശേഷം വിവാഹബന്ധം വേർപെടുത്തിയ പാക്കിസ്ഥാൻ മുൻ മന്ത്രി, മുൻഭാര്യയ്‌ക്കെതിരെ നിയമനടപടിയുമായി കോടതിയിൽ. സിന്ധ് പ്രവിശ്യയിലെ മുൻ മന്ത്രി ഗുലാം റസൂൽ ഉന്നാർ, തന്റെ മുൻഭാര്യ റസിയ അർബാബിനെതിരെ ഇലക്ട്രോണിക് കുറ്റകൃത്യങ്ങൾ തടയൽ നിയമം (PECA) പ്രകാരം എഫ്‌ഐ‌ആർ റജിസ്റ്റർ ചെയ്യണമെന്ന് ആവശ്യപ്പെട്ട് കറാച്ചിയിലെ സെഷൻസ് കോടതിയിൽ ഹർജി ഫയൽ ചെയ്തു.
എഐ സാങ്കേതികവിദ്യ ഉപയോഗിച്ച് നിർമിച്ച വ്യാജ ചിത്രങ്ങൾ കാണിച്ചാണ് റസിയ അർബാബ് ഗുലാം റസൂൽ ഉന്നാറിനെ പ്രണയക്കുരുക്കിൽപ്പെടുത്തിയതെന്ന് അദ്ദേഹത്തിന്റെ അഭിഭാഷകൻ വാദിച്ചു. തുടർന്ന് സാക്ഷികളുടെ സാന്നിധ്യത്തിൽ ഇരുവരും വീഡിയോ കോളിലൂടെ വിവാഹിതരാവുകയായിരുന്നു. എന്നാൽ വിവാഹശേഷം നേരിൽ കണ്ടപ്പോഴാണ് ചിത്രത്തിൽ കണ്ട ആളല്ല യഥാർത്ഥ വ്യക്തിയെന്ന് മനസിലായതെന്നും, താൻ വഞ്ചിക്കപ്പെടുകയാണെന്ന് തിരിച്ചറിഞ്ഞതോടെ ഉന്നാർ ഉടൻതന്നെ വിവാഹമോചനം നേടുകയായിരുന്നുവെന്നും അഭിഭാഷകൻ വ്യക്തമാക്കി. തന്ന തെറ്റിദ്ധരിപ്പിക്കാനാണ് വ്യാജ ചിത്രങ്ങൾ ഉപയോഗിച്ചതെന്നും അദ്ദേഹം കൂട്ടിപ്പങ്കുവെച്ചു.
വിവാഹമോചനത്തിന് ശേഷവും റസിയ അർബാബ് വ്യാജ വാർത്തകളും തിരുത്തിയ ചിത്രങ്ങളും സോഷ്യൽ മീഡിയയിൽ പ്രചരിപ്പിച്ച് തന്നെ ലക്ഷ്യം വെക്കുകയാണെന്ന് ഉന്നാർ ആരോപിച്ചു. ആവശ്യപ്പെട്ട പണം നൽകിയില്ലെങ്കിൽ സ്വകാര്യ വീഡിയോകൾ പുറത്തുവിടുമെന്നും വധിക്കുമെന്നും ഭീഷണിപ്പെടുത്തി സന്ദേശങ്ങൾ അയച്ചതായും ഹർജിയിൽ പറയുന്നുണ്ട്. സംഭവത്തിൽ ഇരുവിഭാഗങ്ങളോടും ഓഗസ്റ്റ് 17-നകം മറുപടി സമർപ്പിക്കാൻ സെഷൻസ് കോടതി നിർദേശം നൽകി.
