നൂറ്റാണ്ടുകളായി ഏഷ്യൻ രാജ്യങ്ങളിൽ ചർമ്മസൗന്ദര്യത്തിനായി ഉപയോഗിച്ചുവരുന്ന ഒന്നാണ് കഞ്ഞിപ്പാല് അഥവാ അരി കഴുകിയ വെള്ളം. ആധുനിക ചർമ്മസംരക്ഷണ രീതികൾ വരുന്നതിനും എത്രയോ മുൻപ് തന്നെ വിറ്റാമിനുകളും ആന്റിഓക്സിഡന്റുകളും അമിനോ ആസിഡുകളും അടങ്ങിയ ഈ പാനീയം ചർമ്മത്തെ ഉള്ളിൽ നിന്ന് പോഷിപ്പിക്കാൻ സഹായിക്കുമെന്ന് കണ്ടെത്തിയിരുന്നു. ചർമ്മത്തിന്റെ ആരോഗ്യത്തിന് കഞ്ഞിപ്പാല് കുടിക്കുന്നത് കൊണ്ടുള്ള അഞ്ച് പ്രധാന ഗുണങ്ങൾ താഴെ പറയുന്നവയാണ്.
അരിയിലെ പ്രകൃതിദത്തമായ അന്നജവും സെറാമൈഡുകളും ചർമ്മത്തിന്റെ ഈർപ്പം നിലനിർത്താനും ചർമ്മത്തെ കൂടുതൽ മൃദുവാക്കാനും സഹായിക്കുന്നു. ഇത് ചർമ്മത്തിന്റെ സ്വാഭാവികമായ പ്രതിരോധ ശേഷി വർദ്ധിപ്പിക്കുകയും മലിനീകരണത്തിൽ നിന്നും വരൾച്ചയിൽ നിന്നും സംരക്ഷണം നൽകുകയും ചെയ്യുന്നു. ഇതിലടങ്ങിയിരിക്കുന്ന ഫെറുലിക് ആസിഡ് പോലുള്ള ആന്റിഓക്സിഡന്റുകൾ ചർമ്മത്തിലെ കോശങ്ങളുടെ നാശം തടയുകയും പ്രായമാകുന്നതിന്റെ ലക്ഷണങ്ങളായ ചുളിവുകളും ചർമ്മം തൂങ്ങുന്നതും കുറയ്ക്കുകയും ചെയ്യുന്നു. കൂടാതെ, ചർമ്മത്തിലെ അമിതമായ മെലാനിൻ ഉൽപ്പാദനം നിയന്ത്രിക്കുന്നതിലൂടെ ചർമ്മത്തിന് സ്വാഭാവികമായ തിളക്കം നൽകാനും നിറവ്യത്യാസങ്ങൾ മാറ്റാനും ഇത് സഹായിക്കും.
മുഖക്കുരു, ചുവന്ന പാടുകൾ എന്നിവയ്ക്ക് കാരണമാകുന്ന വീക്കം (Inflammation) കുറയ്ക്കാൻ ഇതിലടങ്ങിയിരിക്കുന്ന അലന്റോയിൻ സഹായിക്കുന്നു. ചർമ്മത്തിലെ കൊളാജൻ ഉൽപ്പാദനം വർദ്ധിപ്പിക്കുന്നതിലൂടെ ചർമ്മത്തിന്റെ ദൃഢത നിലനിർത്താനും കേടുപാടുകൾ വേഗത്തിൽ പരിഹരിക്കാനും കഞ്ഞിപ്പാല് കുടിക്കുന്നത് ഗുണകരമാണ്.
എങ്കിലും ചിലർ കഞ്ഞിപ്പാല് കുടിക്കുന്നത് ഒഴിവാക്കണം. ഗർഭിണികൾ, കുട്ടികൾ എന്നിവർ അരിയിലുണ്ടാകാൻ സാധ്യതയുള്ള ആർസെനിക് അംശം ഭയന്ന് ഇത് ഒഴിവാക്കുന്നതാണ് നല്ലത്. കഞ്ഞിപ്പാലിൽ അന്നജം കൂടുതൽ അടങ്ങിയിരിക്കുന്നതിനാൽ പ്രമേഹരോഗികൾക്കും ദഹനപ്രശ്നങ്ങൾ ഉള്ളവർക്കും ഇത് അമിതമായി ഉപയോഗിക്കുന്നത് ദോഷകരമാകും. ശരിയായ രീതിയിൽ തയ്യാറാക്കാത്തതോ പുളിപ്പിച്ചതോ ആയ വെള്ളം കുടിക്കുന്നത് അണുബാധയ്ക്കും കാരണമായേക്കാം. അതിനാൽ മിതമായ അളവിൽ കൃത്യമായ രീതിയിൽ ഉപയോഗിച്ചാൽ മാത്രമേ ഇതിന്റെ പൂർണ്ണഫലം ലഭിക്കുകയുള്ളൂ.
