ഹരിയാനയില് അറ്റുപോയ കൈയുമായി ബീഹാറില് നിന്നുള്ള കൗമാരക്കാരന് വീട്ടിലേക്ക് നടന്നത് 150 കിലോമീറ്റര്. ബിഹാറിലെ കിഷന്ഗഞ്ച് ജില്ലയില് നിന്നുള്ള ആണ്കുട്ടിയെ ചൊവ്വാഴ്ച നൂഹ് പട്ടണത്തില് നിന്ന് രക്ഷപ്പെടുത്തി. ഹരിയാനയിലെ ജിന്ദ് ജില്ലയില് തടവിലാക്കപ്പെട്ട് നിര്ബന്ധിത ജോലിക്ക് വിധേയനാക്കപ്പെട്ടയാളാണ് കുട്ടി.
10,000 രൂപ മാസശമ്പളം നല്കാമെന്ന് പറഞ്ഞ് കബളിപ്പിക്കപ്പെട്ടാണ് ഇവിടെ എത്തിയതെന്ന് കുട്ടി പോലീസിനോട് പറഞ്ഞു. ഒരു ഡയറി ഫാമിലായിരുന്നു കുട്ടിയെ അടിമപ്പണി ചെയ്യിച്ചത്. 15 വയസ്സുള്ള ആണ്കുട്ടി നൂഹില് എത്തിയത് ഒരു കൈ അറ്റ നിലയിലായിരുന്നു. 150 കിലോമീറ്ററാണ് കുട്ടി നടന്നത്. ഒരു മുറിയില് പട്ടിണിക്ക് പൂട്ടിയിടുകയും വേതനവും നിഷേധിക്കുകയും മോട്ടോറൈസ്ഡ് കാലിത്തീറ്റ ഹെലികോപ്റ്റര് ഓടിക്കാന് നിര്ബന്ധിക്കുകയും ചെയ്തു. ഇതില് നിന്നുമായിരുന്നു കൈയ്ക്ക് പരിക്കേറ്റതെന്ന് കുട്ടി പറഞ്ഞു.
അപകടത്തെത്തുടര്ന്ന്, തനിക്ക് മരുന്ന് നല്കിയതിനാല് ബോധരഹിതനായിരുന്നെന്ന് അദ്ദേഹം ആരോപിച്ചു. ഉണര്ന്നപ്പോള്, ഒരു ഡിസ്പെന്സറിയിലായിരുന്നു. കൈവശം കുറച്ച് പണമുണ്ടായിരുന്നു. വീണ്ടും ഉറങ്ങിപ്പോയ ശേഷം, ഉണര്ന്നപ്പോള്, പണവും വസ്ത്രങ്ങളും നഷ്ടപ്പെട്ടതായി കണ്ടെത്തി, ഒരു ഡിസ്പെന്സറി ജീവനക്കാരന് അവനോട് പോകാന് ആവശ്യപ്പെടുകയും ചെയ്തു.
തിരിച്ചറിയല് രേഖകള് ഇല്ലാതെയും ഫാമിന്റെ കൃത്യമായ സ്ഥാനം ഓര്മ്മിക്കാനാകാതെയും ഏകദേശം 1,000 കിലോമീറ്റര് അകലെയുള്ള ബീഹാറിലെ വീട്ടിലേക്ക് നടക്കാന് തുടങ്ങി. നുഹ് ജില്ലയിലെ തൗരുവിന് സമീപത്തുവെച്ച് രണ്ട് സര്ക്കാര് സ്കൂള് അധ്യാപകര് കുട്ടിയെ കാണുകയായിരുന്നു. ഒരു ചെരിപ്പുപോലുമില്ലാതെ കനത്ത മഴയില് നടന്നുപോകുകയായിരുന്നു. പയ്യാന് ആഹാരം കഴിച്ചിട്ടില്ലെന്ന് അദ്ധ്യാപകരില് ഒരാള്ക്ക് തോന്നി. ഭക്ഷണം വാങ്ങിക്കൊടുത്ത ശേഷം അടുത്തുള്ള ഒരു പോലീസ് പോസ്റ്റിലേക്ക് കൊണ്ടുപോയി.
ഒടുവില് നുഹ് സദര് പോലീസ് സ്റ്റേഷനില് എത്തിച്ചു. അസിസ്റ്റന്റ് സബ്-ഇന്സ്പെക്ടര് കമല് സിംഗ് ആണ്കുട്ടിക്ക് വസ്ത്രങ്ങള് വാങ്ങിക്കൊടുക്കുകയും നുഹ് സര്ക്കാര് ആരോഗ്യ കേന്ദ്രത്തില് വൈദ്യസഹായം നല്കുകയും ചെയ്തു. കുട്ടിയെ ചികിത്സിച്ച ഡോക്ടര്മാര് പറഞ്ഞത് മുറിവിന് കുറഞ്ഞത് രണ്ടാഴ്ചയെങ്കിലും പഴക്കമുണ്ടെന്നും അത് കുറച്ച് ദിവസമായി ഡ്രസ്സ് ചെയ്തിട്ടില്ലെന്നുമാണ്.
ബീഹാറിലെ സീമാഞ്ചല് മേഖലയിലെ ഒരു പ്രാദേശിക ഭാഷയില് സംസാരിച്ചിരുന്നതിനാല് ഭാഷാ തടസ്സങ്ങള് കാരണം ആണ്കുട്ടിയുമായി ആശയവിനിമയം നടത്താന് തുടക്കത്തില് ബുദ്ധിമുട്ടായിരുന്നുവെന്ന് പോലീസ് ഉദ്യോഗസ്ഥര് പറഞ്ഞു. എന്നിരുന്നാലും, കിഷന്ഗഞ്ച് പോലീസ് വഴി പോലീസിന് കുടുംബത്തെ കണ്ടെത്താന് കഴിഞ്ഞു. കൈതലില് ദിവസ വേതനക്കാരായി ജോലി ചെയ്യുന്ന സഹോദരനും മറ്റ് ബന്ധുക്കളും അന്ന് വൈകുന്നേരം നൂഹില് എത്തി, റോഹ്തക്കിലെ പിജിഐഎംഎസിലേക്ക് കൊണ്ടുപോയി, വ്യാഴാഴ്ച ശസ്ത്രക്രിയയ്ക്ക് വിധേയനാക്കി.
ഇപ്പോള് കുട്ടിയുടെ ആരോഗ്യനില തൃപ്തികരമാണ്. കേസെടുക്കാന് പോലീസ്് ഒരുങ്ങിയെങ്കിലൂം സാമ്പത്തിക ബുദ്ധിമുട്ട് ചൂണ്ടിക്കാട്ടി ആണ്കുട്ടിയുടെ കുടുംബം ഒടുവില് കേസ് തുടരാന് വിസമ്മതിച്ചുവെന്ന് നൂഹ് പോലീസ് പറഞ്ഞു. കിഷന്ഗഞ്ചിലെ പോലീസ് സൂപ്രണ്ട് സാഗര് കുമാറുമായി ബന്ധപ്പെട്ടപ്പോള്, കേസിനെക്കുറിച്ച് തനിക്ക് യാതൊരു അറിവുമില്ലെന്നാണ് അദ്ദേഹം പറഞ്ഞത്. ആണ്കുട്ടിയുടെ കുടുംബം അതിനുശേഷം ബീഹാറിലേക്ക് മടങ്ങിയോ അതോ പ്രാദേശിക അധികാരികള്ക്ക് പരാതി നല്കിയോ എന്ന് വ്യക്തമല്ല.
