ഫ്ലോറിഡയിലുണ്ടായ വെടിവെപ്പിൽ ഭർത്താവ് കൊല്ലപ്പെട്ടത് ഓപ്പൺ എഐ (OpenAI)യുടെ അനാസ്ഥയാണെന്ന് ആരോപിച്ച് കമ്പനി ചീഫ് എക്സിക്യൂട്ടീവ് ഓഫീസറായ സാം ആൾട്ട്മാന്റെ കമ്പനിക്കെതിരെ ഇന്ത്യൻ വംശജയായ വനിത കേസ് ഫയൽ ചെയ്തു.
2025 ഏപ്രിലിൽ നടന്ന ആക്രമണത്തിൽ കൊല്ലപ്പെട്ട തിരു ചബ്ബയുടെ ഭാര്യ വന്ദന ജോഷിയാണ് നിയമനടപടിയുമായി രംഗത്തെത്തിയത്. ഈ ആക്രമണത്തിൽ രണ്ട് പേർ കൊല്ലപ്പെടുകയും ആറ് പേർക്ക് പരിക്കേൽക്കുകയും ചെയ്തിരുന്നു.
ഇത്തരമൊരു ദുരന്തം സംഭവിക്കുമെന്ന് ഓപ്പൺ എഐക്ക് നേരത്തെ അറിയാമായിരുന്നുവെന്നും സുരക്ഷാ ക്രമീകരണങ്ങളിൽ കമ്പനി പരാജയപ്പെട്ടുവെന്നും വന്ദന ജോഷി ആരോപിക്കുന്നു. ആക്രമണം നടത്തുന്നതിന് മുൻപ് പ്രതി ചാറ്റ് ജിപിടി (ChatGPT) ഉപയോഗിച്ച് വിവരങ്ങൾ ശേഖരിച്ചതായാണ് കോടതിയിൽ സമർപ്പിച്ച പരാതിയിൽ പറയുന്നത്.
എവിടെ, എപ്പോൾ ആക്രമണം നടത്തിയാലാണ് കൂടുതൽ നാശനഷ്ടങ്ങൾ ഉണ്ടാവുക എന്നതിനെക്കുറിച്ച് പ്രതി ചാറ്റ് ജിപിടിയോട് ചോദിച്ചിരുന്നു. ജനത്തിരക്കുള്ള സ്ഥലങ്ങൾ, സമയക്രമം, ആയുധങ്ങൾ എന്നിവയെക്കുറിച്ചുള്ള പൊതുവായ വിവരങ്ങൾ ചാറ്റ് ബോട്ട് നൽകിയതായി അന്വേഷണ ഉദ്യോഗസ്ഥർ കണ്ടെത്തി. കുട്ടികൾ ഉൾപ്പെടുന്ന ആക്രമണങ്ങൾക്ക് കൂടുതൽ മാധ്യമശ്രദ്ധ ലഭിക്കുമെന്ന് ചാറ്റ് ജിപിടി നിർദ്ദേശിച്ചതായും പരാതിയിൽ പറയുന്നു. ഇത്തരം അപകടകരമായ നീക്കങ്ങൾ തിരിച്ചറിയാനും അധികൃതരെ അറിയിക്കാനുമുള്ള സംവിധാനം കമ്പനിക്കുണ്ടായിരുന്നില്ലെന്ന് വന്ദന ജോഷി കുറ്റപ്പെടുത്തി.
എന്നാൽ ഈ ആരോപണങ്ങൾ ഓപ്പൺ എഐ നിഷേധിച്ചു. ഇന്റർനെറ്റിൽ ലഭ്യമായ പൊതുവായ വിവരങ്ങൾ മാത്രമാണ് ചാറ്റ് ജിപിടി നൽകിയതെന്നും നിയമവിരുദ്ധമായ പ്രവർത്തനങ്ങളെ തങ്ങൾ പ്രോത്സാഹിപ്പിച്ചിട്ടില്ലെന്നും കമ്പനി വക്താവ് ഡ്രൂ പുസറ്റേരി അറിയിച്ചു. നിലവിൽ 21 വയസ്സുകാരനായ പ്രതിക്കെതിരെ കൊലക്കുറ്റം ചുമത്തിയിട്ടുണ്ട്. ഈ സംഭവം ആർട്ടിഫിഷ്യൽ ഇന്റലിജൻസ് ടൂളുകളുടെ സുരക്ഷയെക്കുറിച്ചും ദുരുപയോഗം ചെയ്യപ്പെട്ടാൽ കമ്പനികൾക്ക് എത്രത്തോളം ഉത്തരവാദിത്തമുണ്ടെന്നതിനെക്കുറിച്ചും ആഗോളതലത്തിൽ വലിയ ചർച്ചകൾക്ക് വഴിതെളിച്ചിരിക്കുകയാണ്.
