ഓൺലൈൻ പ്രശസ്തിക്കായി ട്രെയിൻ എഞ്ചിൻ ബൈക്ക് ഉപയോഗിച്ച് വലിച്ചുനീക്കാൻ ശ്രമിക്കുന്ന യുവാവിൻ്റെ വീഡിയോ സോഷ്യൽ മീഡിയയിൽ വ്യാപകമായ പ്രതിഷേധത്തിന് കാരണമാകുന്നു. പശ്ചിമ ബംഗാൾ സ്വദേശിയായ സോഹൽ എന്ന യുവാവാണ് ഇത്തരമൊരു അപകടകരമായ സാഹസത്തിന് മുതിർന്നത്. ഒരു പ്രമുഖ എസ്യുവി (SUV) ട്രെയിൻ വലിച്ചുനീക്കി ഗിന്നസ് വേൾഡ് റെക്കോർഡ് ഇട്ടത് അനുകരിക്കാനായിരുന്നു യുവാവിൻ്റെ ശ്രമം.
പ്രചരിക്കുന്ന വീഡിയോയിൽ, റെയിൽവേ ട്രാക്കിൽ നിർത്തിയിട്ടിരിക്കുന്ന ട്രെയിനുമായി യുവാവ് തൻ്റെ ബൈക്കിനെ വടം ഉപയോഗിച്ച് ബന്ധിപ്പിക്കുന്നത് കാണാം. തുടർന്ന് ബൈക്ക് ഓടിച്ച് ട്രെയിൻ വലിക്കാൻ ശ്രമിച്ചെങ്കിലും ബൈക്കിൻ്റെ ചക്രം ട്രാക്കിൽ കറങ്ങുകയല്ലാതെ ട്രെയിൻ ഒരിഞ്ച് പോലും നീങ്ങിയില്ല. ഈ വീഡിയോ വൈറലായതോടെ യുവാവിനെതിരെ കടുത്ത നിയമനടപടി വേണമെന്ന ആവശ്യം ശക്തമായി.
റെയിൽവേ ട്രാക്കുകളിൽ അനുമതിയില്ലാതെ ഇത്തരം അഭ്യാസങ്ങൾ കാണിക്കുന്നത് അങ്ങേയറ്റം ഉത്തരവാദിത്തമില്ലാത്ത പ്രവൃത്തിയാണെന്നും ഇത് വലിയ അപകടങ്ങൾക്ക് കാരണമാകുമെന്നും സോഷ്യൽ മീഡിയ ഉപയോക്താക്കൾ പ്രതികരിച്ചു. പൊതു സുരക്ഷയ്ക്കും റെയിൽവേ സംവിധാനങ്ങൾക്കും ഭീഷണിയാകുന്ന ഇത്തരം നിയമവിരുദ്ധ പ്രവർത്തനങ്ങൾക്കെതിരെ റെയിൽവേ സംരക്ഷണ സേന (RPF) കർശന നടപടിയെടുക്കണമെന്ന് ജനങ്ങൾ ആവശ്യപ്പെടുന്നു. ഭാവിയിൽ ഇത്തരം വിഡ്ഢിത്തങ്ങൾ ആവർത്തിക്കാതിരിക്കാൻ മാതൃകാപരമായ ശിക്ഷ തന്നെ നൽകണമെന്നാണ് ഭൂരിഭാഗം പേരുടെയും അഭിപ്രായം.
