യുഗാണ്ടയുടെ സൈനിക മേധാവി ജനറൽ മുഹൂസി കൈനെരുഗാബ തുർക്കിക്ക് നേരെ ഉയർത്തിയ വിചിത്രമായ ആവശ്യങ്ങളും ഭീഷണികളുമാണ് ഇപ്പോൾ നയതന്ത്ര ലോകത്ത് ചർച്ചയാകുന്നത്. തുർക്കിയുമായുള്ള നയതന്ത്രബന്ധം തകരാതിരിക്കാൻ പ്രധാനമായും രണ്ട് ആവശ്യങ്ങളാണ് അദ്ദേഹം മുന്നോട്ടുവെച്ചിരിക്കുന്നത്. സൊമാലിയയിലെ തീവ്രവാദ വിരുദ്ധ പോരാട്ടങ്ങളിൽ യുഗാണ്ടൻ സൈന്യം നൽകിയ ദീർഘകാല സംഭാവനകൾക്ക് പകരമായി ഒരു ബില്യൺ ഡോളർ നൽകണമെന്നതാണ് ആദ്യത്തെ ആവശ്യം. എന്നാൽ രണ്ടാമത്തെ ആവശ്യമാണ് ഏറെ വിവാദമായത്; തുർക്കിയിലെ ഏറ്റവും സുന്ദരിയായ സ്ത്രീയെ തനിക്ക് വിവാഹം കഴിച്ചു നൽകണമെന്നാണ് അദ്ദേഹം ആവശ്യപ്പെട്ടിരിക്കുന്നത്. 30 ദിവസത്തിനുള്ളിൽ ഈ നിബന്ധനകൾ അംഗീകരിച്ചില്ലെങ്കിൽ കംപാലയിലെ തുർക്കി എംബസി അടച്ചുപൂട്ടുന്നത് ഉൾപ്പെടെയുള്ള കടുത്ത നടപടികൾ നേരിടേണ്ടി വരുമെന്നും അദ്ദേഹം എക്സിലൂടെ മുന്നറിയിപ്പ് നൽകി.
യുഗാണ്ടൻ പ്രസിഡന്റ് യോവേരി മുസേവേണിയുടെ മകനായ കൈനെരുഗാബ, സൊമാലിയയിലെ അൽ-ഷബാബ് ഭീകരരെ നേരിടുന്നതിൽ യുഗാണ്ടൻ സേന വഹിക്കുന്ന പങ്കിനെ ഒരു ‘സെക്യൂരിറ്റി ഡിവിഡന്റ്’ ആയിട്ടാണ് കാണുന്നത്. സൊമാലിയയിലെ അടിസ്ഥാന സൗകര്യ വികസനത്തിലൂടെയും വിമാനത്താവള-തുറമുഖ പ്രവർത്തനങ്ങളിലൂടെയും തുർക്കി വലിയ സാമ്പത്തിക ലാഭം കൊയ്യുന്നുണ്ടെന്ന് അദ്ദേഹം ആരോപിക്കുന്നു. ഒരു ബില്യൺ ഡോളറിന് പുറമെ തുർക്കി സുന്ദരിയെ ഭാര്യയായി വേണമെന്ന അദ്ദേഹത്തിന്റെ പ്രസ്താവന വലിയ രീതിയിലുള്ള പ്രതിഷേധങ്ങൾക്ക് കാരണമായിട്ടുണ്ട്. അന്താരാഷ്ട്ര തലത്തിൽ ശ്രദ്ധിക്കപ്പെട്ട ഈ ട്വീറ്റുകൾ നയതന്ത്ര മര്യാദകളുടെ ലംഘനമാണെന്നാണ് വിലയിരുത്തപ്പെടുന്നത്.
തന്റെ ആവശ്യങ്ങൾ അംഗീകരിച്ചില്ലെങ്കിൽ തുർക്കി എയർലൈൻസിനെ യുഗാണ്ടൻ വ്യോമാതിർത്തിയിൽ നിന്ന് വിലക്കുമെന്നും ഇരുരാജ്യങ്ങളും തമ്മിലുള്ള എല്ലാ ബന്ധങ്ങളും അവസാനിപ്പിക്കുമെന്നും കൈനെരുഗാബ ഭീഷണിപ്പെടുത്തി. ഈ ഭീഷണിയെ ഗൗരവമായി കാണണമെന്നും ചതിക്കുന്ന സുഹൃത്തുക്കളെ തനിക്ക് ആവശ്യമില്ലെന്നും അദ്ദേഹം കുറിച്ചു. കൂടാതെ സ്വന്തം രാജ്യത്തെ പൗരന്മാരോട് തുർക്കിയിലേക്കുള്ള യാത്രകൾ ഒഴിവാക്കാനും അദ്ദേഹം നിർദ്ദേശിച്ചു. തുർക്കിയെ കൂടാതെ ഇസ്രയേലിന് പിന്തുണ പ്രഖ്യാപിച്ച അദ്ദേഹം, വിശുദ്ധ ഭൂമിയെ സംരക്ഷിക്കാൻ ഒരു ലക്ഷം സൈനികരെ അയക്കാൻ തയ്യാറാണെന്നും വ്യക്തമാക്കിയിട്ടുണ്ട്.
കൈനെരുഗാബ ഇത്തരത്തിലുള്ള വിചിത്രമായ ആവശ്യങ്ങൾ ഉന്നയിക്കുന്നത് ഇതാദ്യമല്ല. 2022-ൽ ഇറ്റാലിയൻ പ്രധാനമന്ത്രി ജോർജ മെലോനിയെ വിവാഹം കഴിക്കാൻ 100 പശുക്കളെ വാഗ്ദാനം ചെയ്തതും അല്ലാത്തപക്ഷം ഇറ്റലി പിടിച്ചടക്കുമെന്ന് ഭീഷണിപ്പെടുത്തിയതും വലിയ വാർത്തയായിരുന്നു. അന്ന് മകന്റെ പരാമർശത്തിൽ പിതാവായ പ്രസിഡന്റ് മുസേവേണി പരസ്യമായി ക്ഷമാപണം നടത്തിയിരുന്നു. കെനിയയെ ആക്രമിക്കുമെന്ന് ഭീഷണിപ്പെടുത്തിയതിനെ തുടർന്ന് ഒരിക്കൽ അദ്ദേഹത്തെ സൈനിക സ്ഥാനത്ത് നിന്ന് മാറ്റുകയും ചെയ്തിരുന്നു. എന്നാൽ ഇത്തവണത്തെ തുർക്കി വിരുദ്ധ പരാമർശങ്ങളിൽ യുഗാണ്ടൻ ഭരണകൂടമോ തുർക്കി അധികൃതരോ ഇതുവരെ ഔദ്യോഗികമായി പ്രതികരിച്ചിട്ടില്ല.
