മെറ്റാ കമ്പനിയിൽ സോഫ്റ്റ്വെയർ എഞ്ചിനീയറായി ജോലി ചെയ്യുകയും വർഷത്തിൽ 3 കോടി രൂപ ($306,500) ശമ്പളം വാങ്ങുകയും ചെയ്യുന്ന യുവാവ് തന്റെ ലളിതമായ ജീവിതരീതിയെക്കുറിച്ചും നേരത്തെയുള്ള വിരമിക്കൽ പദ്ധതിയെക്കുറിച്ചും തുറന്നുപറയുന്നു. സ്വന്തമായി വീടോ കാറോ ടിവിയോ പോലുമില്ലാത്ത ഒരു ജീവിതമാണ് താൻ നയിക്കുന്നതെന്ന് ബിസിനസ് ഇൻസൈഡറിന് നൽകിയ അഭിമുഖത്തിൽ 24 കാരനായ റെയ്മണ്ട് സെങ് വെളിപ്പെടുത്തി.
എട്ട് മാസം മുമ്പാണ് ടെക്സാസിലെ ഡാളസിൽ നിന്ന് സെങ് സാൻ ഫ്രാൻസിസ്കോ ബേ ഏരിയയിലേക്ക് മാറിയത്. എങ്കിലും തന്റെ ഇപ്പോഴത്തെ ജീവിതസാഹചര്യത്തിൽ അദ്ദേഹം പൂർണ്ണ തൃപ്തനാണ്. വരുമാനത്തിന്റെ വലിയൊരു പങ്കും സമ്പാദ്യമായി മാറ്റിവെക്കാനും നിക്ഷേപിക്കാനുമാണ് അദ്ദേഹം താല്പര്യപ്പെടുന്നത്.
ബോണസും ഓഹരി വിഹിതവുമടക്കം പ്രതിമാസം ഏകദേശം 7.6 ലക്ഷം രൂപയാണ് സെങ് സമ്പാദിക്കുന്നത്. നികുതിയും വിരമിക്കൽ ഫണ്ടിലേക്കുള്ള വിഹിതവും കിഴിച്ച് ഏകദേശം 4 ലക്ഷം രൂപയാണ് അദ്ദേഹത്തിന്റെ കയ്യിൽ കിട്ടുന്ന തുക. ബോണസും കമ്പനി ഓഹരികളുടെ ലഭ്യതയും അനുസരിച്ച് ഓരോ മാസവും 5 ലക്ഷം മുതൽ 19 ലക്ഷം രൂപ വരെ സമ്പാദിക്കാൻ അദ്ദേഹത്തിന് സാധിക്കുന്നുണ്ട്.
തന്റെ ലളിതമായ ജീവിതരീതി കണ്ട് സുഹൃത്തുക്കൾ പലപ്പോഴും അതിശയപ്പെടാറുണ്ടെന്ന് സെങ് പറയുന്നു. തനിക്ക് ഒരു കാറോ, സോഫയോ, ടിവിയോ പോലുമില്ല. പക്ഷേ, ഇത് താൻ അറിഞ്ഞുകൊണ്ട് തിരഞ്ഞെടുത്ത ജീവിതരീതിയാണ്. ആഗ്രഹമുണ്ടെങ്കിൽ കൂടുതൽ ഫർണിച്ചറുകൾ വാങ്ങാനോ ആഡംബരമായി ജീവിക്കാനോ തനിക്ക് സാധിക്കും. എന്നാൽ നിലവിൽ ഉപയോഗമില്ലാത്ത സാധനങ്ങൾ വാരിക്കൂട്ടി വീട് നിറയ്ക്കുന്നതിനേക്കാൾ നിക്ഷേപങ്ങൾക്കും യാത്രകൾക്കും തന്റെ വിനോദങ്ങൾക്കുമാണ് താൻ മുൻഗണന നൽകുന്നത്.
മുപ്പതാം വയസ്സിൽ ജോലിയിൽ നിന്ന് വിരമിക്കുക എന്നതാണ് സെങ്ങിന്റെ ലക്ഷ്യം. ഇതിനായി വിരമിക്കൽ അക്കൗണ്ടുകളിലേക്ക് പരമാവധി തുക മാറ്റിവെക്കുന്നതിനൊപ്പം ഷെയർ മാർക്കറ്റിലും മറ്റും അദ്ദേഹം വൻതോതിൽ നിക്ഷേപം നടത്തുന്നുണ്ട്. സ്വന്തമായി തയ്യാറാക്കിയ ഒരു സ്പ്രെഡ്ഷീറ്റ് (spreadsheet) വഴിയാണ് അദ്ദേഹം തന്റെ ചെലവുകൾ കൃത്യമായി നിരീക്ഷിക്കുന്നത്. എല്ലാ മാസവും ഈ ബഡ്ജറ്റ് ഷീറ്റ് ആവശ്യാനുസരണം മാറ്റങ്ങൾ വരുത്തി അദ്ദേഹം പുതുക്കാറുണ്ട്.
എല്ലാം വിചാരിച്ചതുപോലെ നടന്നാൽ മുപ്പതാം വയസ്സാകുമ്പോഴേക്കും 19 കോടിയിലധികം രൂപയുടെ നിക്ഷേപം അദ്ദേഹത്തിനുണ്ടാകും. ഇത് 40 വയസ്സാകുമ്പോഴേക്കും 67 കോടിയായി വളർന്നേക്കാം. സാമ്പത്തിക സ്വാതന്ത്ര്യം നേടി നേരത്തെ വിരമിക്കുക (FIRE) എന്ന ആശയത്തിൽ നിന്നാണ് താൻ ഇത് ഉൾക്കൊണ്ടതെന്നും ഭാവിയിൽ സാഹചര്യങ്ങൾ മാറിയാൽ അതിനനുസരിച്ച് തന്റെ പദ്ധതികളിൽ മാറ്റം വരുത്തുമെന്നും സെങ് വ്യക്തമാക്കുന്നു.
