എപ്പോഴും ഗൗരവത്തോടെ കാണപ്പെടാറുള്ള മമ്മൂട്ടിയുടെ തമാശ നിറഞ്ഞ നിമിഷങ്ങൾ ആരാധകർക്ക് വലിയ സന്തോഷമാണ് നൽകാറുള്ളത്. സോഷ്യൽ മീഡിയയിൽ ഇത്തരം വിഡിയോകൾ പെട്ടെന്ന് തന്നെ വൈറലാകാറുമുണ്ട്. ഇപ്പോഴിതാ വേദിയിൽ പാട്ടുപാടുന്ന ഗായകൻ എം.ജി. ശ്രീകുമാറിനെ മമ്മൂട്ടി രസകരമായി അനുകരിക്കുന്ന ഒരു പുതിയ വിഡിയോയാണ് ഇന്റർനെറ്റിൽ തരംഗമാകുന്നത്. ഇതുകണ്ട് സദസ്സിലുള്ളവർ പൊട്ടിച്ചിരിക്കുന്നതും വിഡിയോയിൽ ദൃശ്യമാണ്.
ലണ്ടനിൽ വെച്ച് നടന്ന ആനന്ദ് ടിവി അവാർഡ് ചടങ്ങിലാണ് ഈ രസകരമായ സംഭവം ഉണ്ടായതെന്നാണ് വിവരം. എം.ജി. ശ്രീകുമാറിനൊപ്പം വേദിയിൽ നിൽക്കുന്ന മമ്മൂട്ടിയെയാണ് വിഡിയോയുടെ തുടക്കത്തിൽ കാണാൻ കഴിയുക. പെട്ടെന്ന് തന്നെ എം.ജിയുടെ പാട്ടിലെ ശരീരഭാഷ മമ്മൂട്ടി വളരെ തമാശയോടെ അനുകരിക്കുകയായിരുന്നു. ‘വീണുടഞ്ഞ താഴികക്കുടം’ എന്ന വരികൾ പാടുമ്പോഴുള്ള എം.ജിയുടെ ആക്ഷനുകൾ മമ്മൂട്ടി അതേപടി കാണിച്ചപ്പോൾ കാണികൾ വലിയ കയ്യടിയോടെയാണ് അതിനെ വരവേറ്റത്.
ഈ വിഡിയോ സോഷ്യൽ മീഡിയയിൽ പ്രചരിച്ചതോടെ മമ്മൂക്ക നല്ല ഫൺ മൂഡിലാണെന്ന കമന്റുകളുമായി ആരാധകർ രംഗത്തെത്തി. മമ്മൂട്ടിയുടെ ഇത്തരം കൊച്ചു കൊച്ചു തമാശകൾ മലയാളികൾക്ക് എപ്പോഴും വലിയ ഇഷ്ടമാണ്. ഇതിനോടകം തന്നെ ലണ്ടനിൽ നിന്നുള്ള അദ്ദേഹത്തിന്റെ മറ്റ് ചിത്രങ്ങളും സോഷ്യൽ മീഡിയയിൽ ശ്രദ്ധ നേടിയിട്ടുണ്ട്. പ്രായമേറുന്തോറും മമ്മൂക്ക കൂടുതൽ സുന്ദരനും സ്റ്റൈലിഷുമായി മാറിക്കൊണ്ടിരിക്കുകയാണെന്നാണ് ആരാധകർ ഒരേ സ്വരത്തിൽ പറയുന്നത്.
