ലോകകപ്പ് ഗ്രൂപ്പ് ജെയിലെ നിർണായക മത്സരത്തിൽ സൂപ്പർ താരം ലയണൽ മെസ്സിയുടെ ഇരട്ട ഗോൾ മികവിൽ ഓസ്ട്രിയയെ തകർത്ത് അർജന്റീന. ഏകപക്ഷീയമായ രണ്ട് ഗോളുകൾക്കായിരുന്നു അർജന്റീനയുടെ വിജയം. മത്സരത്തിന്റെ തുടക്കത്തിൽ ഒരു പെനാൽറ്റി പാഴാക്കിയെങ്കിലും, പിന്നീട് രണ്ട് തകർപ്പൻ ഗോളുകൾ നേടി മെസ്സി അതിന് പ്രായശ്ചിത്തം ചെയ്യുകയായിരുന്നു. 38, 90+5 മിനിറ്റുകളിലായിരുന്നു മെസ്സിയുടെ ഗോളുകൾ പിറന്നത്. ഈ ജയത്തോടെ ആറ് പോയിന്റുമായി അർജന്റീന ഗ്രൂപ്പിൽ ഒന്നാമതെത്തുകയും നോക്കൗട്ട് റൗണ്ടിലേക്ക് യോഗ്യത നേടുകയും ചെയ്തു.
മത്സരത്തിന്റെ രണ്ടാം പകുതിയിൽ ലീഡ് ഉയർത്താൻ മികച്ച പല അവസരങ്ങളും അർജന്റീനയ്ക്ക് ലഭിച്ചെങ്കിലും അവയൊന്നും ലക്ഷ്യത്തിലെത്തിക്കാൻ സാധിച്ചില്ല. 63–ാം മിനിറ്റിൽ മെസ്സിക്ക് ലഭിച്ച ഒരു ഗോൾ അവസരം നേരിയ വ്യത്യാസത്തിലാണ് പോസ്റ്റിന് പുറത്തേക്ക് പോയത്. പിന്നീട് 73-ാം മിനിറ്റിൽ മെസ്സി എടുത്ത കോർണർ കിക്ക് നികോ ഗോൺസാലസ് തലകൊണ്ട് പോസ്റ്റിലേക്ക് തിരിച്ചുവിട്ടെങ്കിലും അതും പുറത്തേക്ക് പോയി. 85-ാം മിനിറ്റിലും അർജന്റീനയ്ക്ക് മികച്ചൊരു അവസരം നഷ്ടമായി. ഒടുവിൽ ഇഞ്ചുറി ടൈമിന്റെ അവസാന മിനിറ്റിലാണ് മെസ്സി ടീമിന്റെ രണ്ടാം ഗോൾ നേടിയത്.
ഈ മത്സരത്തോടെ ലോകകപ്പ് ചരിത്രത്തിൽ ഏറ്റവും കൂടുതൽ ഗോൾ നേടുന്ന താരമെന്ന റെക്കോർഡും ലയണൽ മെസ്സി സ്വന്തമാക്കി. ഓസ്ട്രിയയ്ക്കെതിരായ മത്സരത്തിന്റെ 38-ാം മിനിറ്റിലായിരുന്നു മെസ്സിയുടെ ആ ചരിത്ര ഗോൾ പിറന്നത്. ബോക്സിന്റെ ഇടതുവിങ്ങിൽ നിന്നും ഫക്കുന്തോ മെഡിന നൽകിയ പാസ് സ്വീകരിച്ച് മെസ്സി പന്ത് കൃത്യമായി വലയിലെത്തിക്കുകയായിരുന്നു. ജർമനിയുടെ ഇതിഹാസ താരം മിറോസ്ലാവ് ക്ലോസെയുടെ (16 ഗോൾ) റെക്കോർഡാണ് ലോകകപ്പിലെ തന്റെ 17–ാം ഗോളിലൂടെ മെസ്സി തകർത്തത്. തുടർന്ന് മത്സരത്തിന്റെ അവസാന നിമിഷം നേടിയ ഗോളോടെ മെസ്സിയുടെ ആകെ ലോകകപ്പ് ഗോൾനേട്ടം 18 ആയി ഉയർന്നു.
നേരത്തെ, കളിയുടെ ഒൻപതാം മിനിറ്റിൽ അർജന്റീനയ്ക്ക് അനുകൂലമായി ലഭിച്ച ഒരു സുപ്രധാന പെനാൽറ്റി മെസ്സി കൈവിട്ടിരുന്നു. അർജന്റീനയുടെ ലൗറ്റാരോ മാർട്ടിനെസിനെ ബോക്സിനുള്ളിൽ വച്ച് ഓസ്ട്രിയൻ പ്രതിരോധ നിരക്കാർ ഫൗൾ ചെയ്ത് വീഴ്ത്തിയതിനാണ് റഫറി പെനാൽറ്റി അനുവദിച്ചത്. ‘വാർ’ പരിശോധനയ്ക്ക് ശേഷമായിരുന്നു ഈ തീരുമാനം. എന്നാൽ പെനാൽറ്റി കിക്കെടുത്ത മെസ്സിയുടെ ഷോട്ട് പോസ്റ്റിന് പുറത്തേക്കാണ് പോയത്.
