ലണ്ടൻ: പുറത്തുവരുന്ന വാർത്തകൾ ശരിയാണെങ്കിൽ, ക്രിക്കറ്റിന്റെ മക്കയായ ചരിത്രപ്രസിദ്ധമായ ലോർഡ്സ് മൈതാനത്ത് ഞായറാഴ്ച നടക്കാനിരിക്കുന്ന മത്സരമായിരിക്കും വെറ്ററൻ താരം രോഹിത് ശർമയുടെ കരിയറിലെ അവസാന ഏകദിനം. അടുത്ത വർഷം നടക്കാനിരിക്കുന്ന ഏകദിന ലോകകപ്പിലേക്ക് ഇനി പരിഗണിക്കില്ലെന്ന് മുപ്പത്തിയൊൻപതുകാരനായ രോഹിത്തിനെ സെലക്ടർമാർ വ്യക്തമാക്കിയതായാണ് സൂചന.
നേരത്തെ തന്നെ ടെസ്റ്റ്, ട്വന്റി-20 മത്സരങ്ങളിൽ നിന്ന് വിരമിച്ച ഹിറ്റ്മാൻ നിലവിൽ ഏകദിനത്തിൽ മാത്രമാണ് ഇന്ത്യൻ ജേഴ്സി അണിയുന്നത്. എന്നാൽ ഇംഗ്ലണ്ടിനെതിരായ രണ്ടാം ഏകദിനത്തിലും താരത്തിന് തിളങ്ങാനായില്ല. 47 പന്തിൽ 26 റൺസെടുത്ത് താരം പുറത്താകുകയായിരുന്നു. എഡ്ജ്ബാസ്റ്റണിലെ ആദ്യ മത്സരത്തിലാകട്ടെ വെറും 11 റൺസാണ് നേടാനായത്. ഇതിനു മുൻപ് നടന്ന അഫ്ഗാനിസ്താനെതിരായ ഏകദിന പരമ്പരയിലും 79, 48, 16 എന്നിങ്ങനെയായിരുന്നു താരത്തിന്റെ സ്കോറുകൾ. കഴിഞ്ഞ ഐ.പി.എല്ലിലും രോഹിത്തിന് കാര്യമായ പ്രകടനം പുറത്തെടുക്കാൻ കഴിഞ്ഞിരുന്നില്ല.
ഇംഗ്ലണ്ട് പര്യടനത്തിന് ശേഷം രോഹിത്തിനെ ടീമിലേക്ക് പരിഗണിക്കില്ലെന്നും ഈ പരമ്പരയോടെ അദ്ദേഹത്തെ ഒഴിവാക്കുകയാണെന്നും സെലക്ഷൻ കമ്മിറ്റി താരത്തെ നേരിട്ടറിയിച്ചതായി ബി.സി.സി.ഐ വൃത്തങ്ങളെ ഉദ്ധരിച്ച് ദേശീയ മാധ്യമങ്ങൾ റിപ്പോർട്ട് ചെയ്യുന്നുണ്ട്. മറ്റൊരു സീനിയർ താരമായ വിരാട് കോഹ്ലിയും നിലവിൽ സെലക്ടർമാരുടെ നിരീക്ഷണത്തിലാണ്.
രോഹിത്തിന് പകരം യുവതാരം യശസ്വി ജയ്സ്വാളിന് കൂടുതൽ അവസരങ്ങൾ നൽകാനാണ് ബി.സി.സി.ഐയുടെ ഇപ്പോഴത്തെ തീരുമാനം. 2007-ൽ അയർലൻഡിനെതിരായ ഏകദിനത്തിലൂടെയാണ് രോഹിത് രാജ്യാന്തര ക്രിക്കറ്റിൽ അരങ്ങേറിയത്. പിന്നീട് ഇന്ത്യൻ ടീമിന്റെ നായകസ്ഥാനത്തുമെത്തി. 2024-ൽ ഇന്ത്യ ട്വന്റി-20 ലോകകപ്പ് നേടിയതിന് തൊട്ടുപിന്നാലെ അദ്ദേഹം ആ ഫോർമാറ്റിൽ നിന്നും, 2025 മേയിൽ ടെസ്റ്റ് ക്രിക്കറ്റിൽ നിന്നും വിരമിക്കൽ പ്രഖ്യാപിച്ചിരുന്നു.
ഏകദിന ക്രിക്കറ്റ് ചരിത്രത്തിലെ ഏറ്റവും ഉയർന്ന വ്യക്തിഗത സ്കോറായ 264 റൺസ് ശ്രീലങ്കയ്ക്കെതിരെ അടിച്ചുകൂട്ടിയത് രോഹിത് ശർമയാണ്. ഏകദിനത്തിൽ മൂന്ന് ഇരട്ട സെഞ്ച്വറികൾ നേടിയ ഏക താരം എന്ന പദവിയും അന്താരാഷ്ട്ര ക്രിക്കറ്റിൽ ഏറ്റവും കൂടുതൽ സിക്സറുകൾ പറത്തിയ റെക്കോർഡും അദ്ദേഹത്തിന്റെ പേരിലുണ്ട്. 2007-ലെ ട്വന്റി-20 ലോകകപ്പ്, 2013-ലെ ചാമ്പ്യൻസ് ട്രോഫി, 2024-ലെ ട്വന്റി-20 ലോകകപ്പ് എന്നിവ സ്വന്തമാക്കിയ ഇന്ത്യൻ ടീമുകളിൽ രോഹിത് നിർണായക പങ്കുവഹിച്ചിരുന്നു. കൂടാതെ 2019-ലെ ലോകകപ്പിൽ അഞ്ച് സെഞ്ച്വറികൾ നേടിക്കൊണ്ട് അദ്ദേഹം ലോക റെക്കോർഡും കുറിച്ചിട്ടുണ്ട്.
