ഇറാൻ വിഷയത്തിൽ അമേരിക്കൻ പ്രസിഡന്റ് ഡൊണാൾഡ് ട്രംപ് എടുത്ത നിർണ്ണായകമായ ഒരു പിന്മാറ്റത്തിന് മിനിറ്റുകൾക്ക് മുൻപ് ആഗോള വിപണിയിലുണ്ടായ അസാധാരണമായ ഇടപാടുകൾ വലിയ ചർച്ചയാവുകയാണ്. ട്രംപിന്റെ ഔദ്യോഗിക പ്രഖ്യാപനം വരുന്നതിന് വെറും 20 മിനിറ്റ് മുൻപ് നടന്ന രഹസ്യ ബെറ്റിംഗിലൂടെ ഏതാണ്ട് 840 കോടി രൂപയുടെ ലാഭമാണ് ഒരു അജ്ഞാത നിക്ഷേപകൻ കൊയ്തത്. തിങ്കളാഴ്ച രാവിലെ ന്യൂയോർക്ക് സമയം 6:50-ഓടെയാണ് വിപണിയിൽ പെട്ടെന്ന് വലിയ തോതിലുള്ള വ്യാപാരം നടന്നത്. സാധാരണഗതിയിൽ വ്യാപാരം കുറഞ്ഞ ഈ സമയത്ത് ഇത്രയും വലിയ തുകയുടെ വിനിമയം നടന്നത് വിദഗ്ധരെ അമ്പരപ്പിച്ചു.
ഏതാണ്ട് 15 മിനിറ്റുകൾക്ക് ശേഷം 7:05-ഓടെയാണ് ഇറാനുമായുള്ള ചർച്ചകളെത്തുടർന്ന് അവിടെയുള്ള ഊർജ്ജ നിലയങ്ങൾക്ക് നേരെ നടത്താനിരുന്ന ആക്രമണങ്ങൾ അഞ്ച് ദിവസത്തേക്ക് നിർത്തിവെക്കുകയാണെന്ന് ട്രംപ് തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യൽ’ വഴി അറിയിച്ചത്. എന്നാൽ ഈ വാർത്ത പുറത്തുവരുന്നതിന് മുൻപേ തന്നെ കൃത്യമായ കണക്കുകൂട്ടലുകളോടെ വലിയ തുക വിപണിയിൽ നിക്ഷേപിക്കപ്പെട്ടിരുന്നു. എസ് ആന്റ് പി 500 ഫ്യൂച്ചേഴ്സിൽ ലാഭം പ്രതീക്ഷിച്ചും, എണ്ണവില ഇടിയുമെന്ന് മുൻകൂട്ടി കണ്ട് ഓയിൽ ഫ്യൂച്ചേഴ്സ് വിറ്റഴിച്ചുമാണ് ഈ തുക സമ്പാദിച്ചത്. ട്രംപിന്റെ പ്രഖ്യാപനത്തിന് പിന്നാലെ ഓഹരി വിപണി കുതിച്ചുയരുകയും എണ്ണവില ആറ് ശതമാനത്തോളം ഇടിയുകയും ചെയ്തു.
യാതൊരുവിധ മുൻസൂചനകളും ഇല്ലാതിരുന്ന സമയത്ത് ഇത്രയും വലിയ തുക നിക്ഷേപിച്ചത് ഇൻസൈഡർ ട്രേഡിംഗ് (അതായത് ഔദ്യോഗിക വിവരങ്ങൾ ചോരുന്നത്) ആണോ എന്ന സംശയം ഉയർത്തുന്നുണ്ട്. 25 വർഷത്തെ വിപണി നിരീക്ഷണത്തിനിടയിൽ ഇത്രയും അസ്വാഭാവികമായ ഒരു നീക്കം കണ്ടിട്ടില്ലെന്ന് പല സാമ്പത്തിക വിദഗ്ധരും അഭിപ്രായപ്പെട്ടു. എന്നാൽ വൈറ്റ് ഹൗസ് വക്താവ് കുഷ് ദേശായി ഈ ആരോപണങ്ങളെ നിഷേധിച്ചു. അമേരിക്കൻ ജനതയ്ക്ക് നല്ലത് ചെയ്യുക മാത്രമാണ് പ്രസിഡന്റിന്റെ ലക്ഷ്യമെന്നും തെളിവുകളില്ലാതെ ഇത്തരം കാര്യങ്ങൾ പ്രചരിപ്പിക്കുന്നത് ഉത്തരവാദിത്തമില്ലായ്മയാണെന്നും അദ്ദേഹം പറഞ്ഞു. അതേസമയം, അമേരിക്കയുമായി ചർച്ചകൾ നടത്തിയെന്ന വാർത്ത ഇറാന്റെ പാർലമെന്റ് സ്പീക്കർ മുഹമ്മദ് ബാഗർ ഗാലിബാഫ് നിഷേധിച്ചു. വിപണികളെ തങ്ങൾക്കനുകൂലമായി മാറ്റാൻ അമേരിക്ക നടത്തുന്ന വ്യാജപ്രചരണമാണിതെന്നാണ് ഇറാന്റെ പക്ഷം.
