പ്രശസ്ത ആഡംബര വാച്ച് നിർമ്മാതാക്കളായ ജേക്കബ് ആന്റ് കോയുമായി (Jacob & Co.) കൈകോർത്ത് ബോളിവുഡ് താരം സൽമാൻ ഖാൻ പുറത്തിറക്കിയ പുതിയ വാച്ചാണ് ഇപ്പോൾ വാർത്തകളിൽ നിറയുന്നത്. “ദി വേൾഡ് ഈസ് യുവേഴ്സ് ഡ്യുവൽ ടൈം സോൺ സൽമാൻ ഖാൻ എഡിഷൻ” എന്ന് പേരിട്ടിരിക്കുന്ന ഈ അപൂർവ്വ വാച്ചിന്റെ അൺബോക്സിംഗ് വീഡിയോ ബ്രാൻഡ് തന്നെയാണ് സോഷ്യൽ മീഡിയയിലൂടെ പുറത്തുവിട്ടത്.
ബ്ലൂ, ബ്ലാക്ക് നിറങ്ങളിലുള്ള ആഡംബര പെട്ടി തുറന്ന് വാച്ച് പുറത്തെടുക്കുന്ന വീഡിയോയിൽ, “ഇത് വളരെ പ്രത്യേകതകൾ ഉള്ള ഒന്നാണ്… മൈ ബ്രദർ ജേക്കബ്, നീ വീണ്ടും അത്ഭുതപ്പെടുത്തിയിരിക്കുന്നു, ശരിക്കും മനോഹരമായിട്ടുണ്ട്,” എന്ന് സൽമാൻ ഖാൻ സന്തോഷത്തോടെ പറയുന്നത് കാണാം.
ആഡംബരവും സൽമാൻ ഖാന്റെ വ്യക്തിത്വവും ഇന്ത്യൻ സംസ്കാരവും സമന്വയിപ്പിച്ചാണ് ഈ വാച്ച് ഡിസൈൻ ചെയ്തിരിക്കുന്നത്. വാച്ചിനുള്ളിലെ ലോക ഭൂപടത്തിൽ ഇന്ത്യൻ ദേശീയപതാകയിൽ നിന്നുള്ള പ്രചോദനം ഉൾക്കൊണ്ട് കാവി, പച്ച നിറങ്ങളിലുള്ള ഘടകങ്ങൾ ഉൾപ്പെടുത്തിയിട്ടുണ്ട്. വാച്ചിലെ ആറുമണിയുടെ സ്ഥാനത്ത് സൽമാൻ ഖാന്റെ പേരും ‘S.K.’ എന്ന ഇനിഷ്യലും കൊത്തിവെച്ചിട്ടുണ്ട്. വാട്ടർ പ്രതിരോധശേഷിയുള്ള സ്റ്റെയിൻലെസ്സ് സ്റ്റീൽ കേസ്, സഫൈർ ക്രിസ്റ്റൽ ഗ്ലാസ്, നീല നിറത്തിലുള്ള ലതർ സ്ട്രാപ്പ് എന്നിവയാണ് ഇതിന്റെ പ്രധാന സവിശേഷതകൾ.
തന്റെ പിതാവിൽ നിന്ന് ലഭിച്ച പ്രചോദനവും സൽമാൻ ഖാന്റെ പാരമ്പര്യവുമാണ് ഈ വാച്ചിന്റെ രൂപകൽപ്പനയ്ക്ക് പിന്നിലെന്ന് കമ്പനി വ്യക്തമാക്കുന്നു. ഇതിലെ ‘ഡ്യുവൽ ടൈം സോൺ’ സംവിധാനം ഉപയോഗിച്ച് രണ്ട് വെവ്വേറെ സമയ മേഖലകളിലെ സമയം (ഉദാഹരണത്തിന് ഇന്ത്യയിലെ GMT+5:30 സമയവും മറ്റൊരു രാജ്യത്തെ സമയവും) ഒരേസമയം എളുപ്പത്തിൽ അറിയാൻ സാധിക്കും.
എത്തോസ് ഇന്ത്യ (Ethos India) വഴി ലഭ്യമാകുന്ന ഈ പ്രത്യേക എഡിഷൻ വാച്ചിന് ഏകദേശം 41 ലക്ഷം രൂപയാണ് വില വരുന്നത്.
