രുചികരവും പലവിധത്തിൽ തയ്യാറാക്കാവുന്നതുമായ ഓട്സ് ഇന്ന് പലരുടെയും പ്രിയപ്പെട്ട പ്രഭാതഭക്ഷണമാണ്. അണ്ടിപ്പരിപ്പുകൾ, പഴങ്ങൾ എന്നിവ ചേർത്ത് ഇത് കൂടുതൽ പോഷകപ്രദമാക്കാം. വിറ്റാമിനുകൾ, മിനറലുകൾ, ആന്റിഓക്സിഡന്റുകൾ എന്നിവയാൽ സമ്പന്നമാണ് ഓട്സ്. ഇതിലടങ്ങിയിരിക്കുന്ന ‘ബീറ്റാ ഗ്ലൂക്കൻ’ എന്ന പ്രത്യേക നാരുകൾ ശരീരത്തിലെ കൊളസ്ട്രോൾ കുറയ്ക്കാനും ഹൃദയാരോഗ്യം മെച്ചപ്പെടുത്താനും സഹായിക്കുന്നു. കൂടാതെ, ഓട്സിലുള്ള കോംപ്ലക്സ് കാർബോഹൈഡ്രേറ്റുകൾ രക്തത്തിലെ പഞ്ചസാരയുടെ അളവ് നിയന്ത്രിച്ചു നിർത്തുകയും രാവിലെ മുഴുവൻ ശരീരത്തിന് ആവശ്യമായ ഊർജ്ജം നൽകുകയും ചെയ്യും.
കൂടിയ അളവിലുള്ള നാരുകൾ വയർ നിറഞ്ഞതായി തോന്നിക്കാനും അമിതമായി ഭക്ഷണം കഴിക്കുന്നത് തടയാനും സഹായിക്കുന്നതിനാൽ ശരീരഭാരം കുറയ്ക്കാൻ ഓട്സ് മികച്ചൊരു മാർഗ്ഗമാണ്. ഓട്സ് കഴിക്കുമ്പോൾ നമ്മുടെ ശരീരം സ്വാഭാവികമായി ‘ജിഎൽപി-1’ (GLP-1) എന്ന ഹോർമോൺ ഉത്പാദിപ്പിക്കുന്നു. ഇത് ദഹനം പതുക്കെയാക്കാനും വയർ നിറഞ്ഞെന്ന സന്ദേശം തലച്ചോറിലെത്തിക്കാനും സഹായിക്കുന്ന ഒന്നാണ്. ശരീരഭാരം കുറയ്ക്കാനുള്ള ഇംഗ്ലീഷ് മരുന്നുകൾ ഈ ഹോർമോണിന്റെ കൃത്രിമ രൂപമാണ് നൽകുന്നതെങ്കിൽ, ഓട്സ് അതിന്റെ ബീറ്റാ ഗ്ലൂക്കൻ എന്ന നാരുകളിലൂടെ ഈ ഹോർമോണിനെ സ്വാഭാവികമായി ഉത്തേജിപ്പിക്കുകയാണ് ചെയ്യുന്നത്.
രണ്ട് ഘട്ടങ്ങളായാണ് ഓട്സ് ശരീരത്തിൽ പ്രവർത്തിക്കുന്നത്. ഓട്സ് കഴിക്കുമ്പോൾ അതിലെ ബീറ്റാ ഗ്ലൂക്കൻ വെള്ളം വലിച്ച് കുടിച്ച് വയറ്റിൽ ഒരു ജെൽ രൂപത്തിലാകുന്നു. ഇത് ഭക്ഷണം ദഹിക്കുന്നത് പതുക്കെയാക്കുകയും കൂടുതൽ സമയം വയർ നിറഞ്ഞതായി തോന്നിക്കുകയും ചെയ്യും. രണ്ടാമതായി, ദഹനം പതുക്കെയാകുന്നതോടെ ഈ നാരുകൾ വൻകുടലിൽ എത്തുകയും അവിടെയുള്ള നല്ല ബാക്ടീരിയകൾ ഇവയെ ചെറു-ചെയിൻ ഫാറ്റി ആസിഡുകളായി മാറ്റുകയും ചെയ്യുന്നു. ഇവ വൻകുടലിലെ കോശങ്ങളെ ഉത്തേജിപ്പിച്ച് വിശപ്പ് കുറയ്ക്കുന്ന ജിഎൽപി-1 ഹോർമോണിനെ സ്വാഭാവികമായി പുറപ്പെടുവിക്കുന്നു.
ഓട്സിൽ നിന്ന് പരമാവധി ഗുണങ്ങൾ ലഭിക്കാൻ ചില കാര്യങ്ങൾ ശ്രദ്ധിക്കാം. ഇൻസ്റ്റന്റ് ഓട്സിന് പകരം ‘സ്റ്റീൽ-കട്ട്’ അല്ലെങ്കിൽ ‘റോൾഡ്’ ഓട്സ് തിരഞ്ഞെടുക്കുക, കാരണം ഇവയിൽ നാരുകൾ കൂടുതലാണ്. ഓട്സിനൊപ്പം തൈര്, ബദാം ബട്ടർ, നട്സ് അല്ലെങ്കിൽ പ്രോട്ടീൻ പൗഡർ എന്നിവ ചേർക്കുന്നത് വിശപ്പ് കുറയ്ക്കാനും രക്തത്തിലെ പഞ്ചസാരയുടെ അളവ് നിലനിർത്താനും സഹായിക്കും.
ചിയാ വിത്തുകൾ, ഫ്ളാക്സ് വിത്തുകൾ, വാൽനട്ട്സ് എന്നിവ ചേർക്കുന്നതിലൂടെ ദഹനം വീണ്ടും പതുക്കെയാകും. സ്വാഭാവിക മധുരത്തിനായി നേന്ത്രപ്പഴം, ബെറികൾ, ആപ്പിൾ തുടങ്ങിയ പഴങ്ങൾ ചേർക്കാം. രാത്രിയിൽ വെള്ളത്തിലോ പാലിലോ കുതിർത്തുവെച്ച് (overnight oats) കഴിക്കുന്നത് ഓട്സ് കൂടുതൽ ദ്രാവകം ആഗിരണം ചെയ്യാൻ സഹായിക്കുകയും ദഹനത്തിന് ഉത്തമമാവുകയും ചെയ്യും. ഈ രീതിയിൽ ഓട്സ് പ്രഭാതഭക്ഷണത്തിൽ ഉൾപ്പെടുത്തുന്നത് ശരീരഭാരം നിയന്ത്രിക്കാനും ആരോഗ്യത്തോടെയിരിക്കാനും സഹായിക്കും.
