വേദിയിൽ എപ്പോഴും പരിപൂർണ്ണത മാത്രം പ്രതീക്ഷിക്കുന്ന ലോകത്ത്, മിസ് ഗ്രാൻഡ് തായ്ലൻഡ് മത്സരാർത്ഥിയായ കമോൾവാൻ ചാനാഗോ തികച്ചും വ്യത്യസ്തമായ ഒരു മാതൃക കാട്ടിയിരിക്കുകയാണ്. കഴിഞ്ഞ ദിവസം മത്സരവേദിയിലുണ്ടായ അപ്രതീക്ഷിത അബദ്ധത്തിന്റെ പേരിൽ തന്നെ പരിഹസിച്ചവർക്ക് മറുപടിയുമായി, അതിലും വലിയ ആത്മവിശ്വാസത്തോടെ കമോൾവാൻ ഫൈനൽ വേദിയിൽ തിളങ്ങി.
പതും താനി (Pathum Thani) പ്രവിശ്യയെ പ്രതിനിധീകരിച്ചെത്തിയ കമോൾവാൻ, തനിക്ക് പറ്റിയ ആ ചെറിയ പിഴവിനെ ഭയപ്പെടുന്നതിന് പകരം അതൊരു ഐക്കോണിക് നിമിഷമാക്കി മാറ്റി. ഫൈനൽ വേദിയിൽ എത്തിയ അവർ എല്ലാവരെയും അത്ഭുതപ്പെടുത്തിക്കൊണ്ട് തന്റെ പല്ലിന്റെ കവറുകൾ (veneers) ഊരി കാണിക്കുകയും, ചിരിച്ചുകൊണ്ട് അവ തിരികെ വെക്കുകയും ചെയ്തു. യാതൊരു പതർച്ചയുമില്ലാതെ അവർ തന്റെ പ്രകടനം തുടർന്നത് കാണികളെ വിസ്മയിപ്പിച്ചു.
നേരത്തെ നടന്ന പ്രിലിമിനറി റൗണ്ടിൽ സ്വയം പരിചയപ്പെടുത്തുന്നതിനിടയിലായിരുന്നു കമോൾവാന്റെ പല്ലിന്റെ കവറുകൾ അപ്രതീക്ഷിതമായി പുറത്തേക്ക് വീണത്. എന്നാൽ പരിഭ്രമിക്കുന്നതിന് പകരം ശാന്തതയോടെ അതൊന്ന് ശരിയാക്കി അവർ പ്രസംഗം തുടർന്നു. നാണക്കേടായി മാറുമായിരുന്ന ഒരു നിമിഷത്തെ തന്റെ ആത്മവിശ്വാസം കൊണ്ട് കമോൾവാൻ നേരിട്ട രീതിയെ സോഷ്യൽ മീഡിയ ഒന്നടങ്കം പ്രശംസിക്കുകയാണ്.
