പ്രണയബന്ധം തകരുമ്പോൾ ചിലർ കവിതയെഴുതും, ചിലർ ഫോൺ നമ്പർ ബ്ലോക്ക് ചെയ്യും, മറ്റുചിലർ ഇൻസ്റ്റഗ്രാമിൽ പോസ്റ്റുകളിടും. എന്നാൽ ഇന്ത്യയിൽ ഇപ്പോൾ പ്രണയനൈരാശ്യം തീർക്കാൻ മൊബൈൽ ടവറിന് മുകളിൽ കയറി നിൽക്കുന്നവരുടെ എണ്ണം കൂടിവരികയാണ്. സിനിമാരംഗങ്ങളെ വെല്ലുന്ന തരത്തിലുള്ള ഈ പ്രവണത രാജ്യത്തിന്റെ വിവിധ ഭാഗങ്ങളിൽ ഒരു പതിവായി മാറിക്കഴിഞ്ഞു.
പങ്കാളിയുമായുള്ള വഴക്ക്, വീട്ടുകാർ വിവാഹത്തിന് സമ്മതിക്കാത്തത്, അല്ലെങ്കിൽ ഒരുപക്ഷേ പ്രണയനൈരാശ്യം—ഇങ്ങനെയുള്ള കാരണങ്ങളാൽ മൊബൈൽ ടവറിന് മുകളിൽ കയറി ആത്മഹത്യാ ഭീഷണി മുഴക്കുന്നവർ പോലീസിനും നാട്ടുകാർക്കും വലിയ തലവേദനയാണ് സൃഷ്ടിക്കുന്നത്. മണിക്കൂറുകളോളം നീളുന്ന ചർച്ചകൾക്കും ഉറപ്പുകൾക്കും ശേഷമാണ് പലരും താഴെയിറങ്ങാൻ തയ്യാറാകുന്നത്.
കഴിഞ്ഞ കുറച്ചു വർഷങ്ങളായി ഇത്തരത്തിലുള്ള നിരവധി സംഭവങ്ങളാണ് റിപ്പോർട്ട് ചെയ്യപ്പെട്ടിട്ടുള്ളത്. ഉത്തർപ്രദേശിൽ സഹോദരിപുത്രിയെ വിവാഹം കഴിക്കാൻ അനുവദിക്കണമെന്ന് ആവശ്യപ്പെട്ട് ഒരാൾ ഏഴു മണിക്കൂറോളം ടവറിന് മുകളിൽ ഇരുന്നു. ബല്ലിയയിൽ കാമുകൻ വിവാഹത്തിന് വിസമ്മതിച്ചതിനെത്തുടർന്ന് ഒരു യുവതി ടവറിൽ കയറി.
ചത്തീസ്ഗഢിൽ വിവാഹാഭ്യർത്ഥന നിരസിക്കപ്പെട്ടതിനെത്തുടർന്ന് മറ്റൊരാളും ഇതേ വഴി സ്വീകരിച്ചു. ഭാര്യ പിണങ്ങിപ്പോയതും ഓൺലൈൻ കാമുകി ചതിച്ചതുമെല്ലാം ടവർ കയറ്റത്തിന് കാരണങ്ങളാകുന്നുണ്ട്. പ്രയാഗ്രാജിൽ തന്റെ കാമുകനെ അടുത്തെത്തിച്ചാലേ താഴെയിറങ്ങൂ എന്ന് വാശിപിടിച്ച 18 വയസ്സുകാരിയെ ഒടുവിൽ കാമുകനെ അവിടെ എത്തിച്ചാണ് അധികൃതർ താഴെയിറക്കിയത്.
എന്തുകൊണ്ടാണ് ആളുകൾ ഇത്തരം പ്രവൃത്തികളിലേക്ക് തിരിയുന്നത് എന്നത് ചിന്തിക്കേണ്ട വിഷയമാണ്. ശ്രദ്ധ പിടിച്ചുപറ്റാനുള്ള എളുപ്പവഴിയായാണ് പലരും ഇതിനെ കാണുന്നത്. ടവറിന് മുകളിൽ ഒരാൾ കയറി നിൽക്കുമ്പോൾ നാട്ടുകാർ തടിച്ചുകൂടും, വീഡിയോകൾ സോഷ്യൽ മീഡിയയിൽ വൈറലാകും, ഒടുവിൽ അധികൃതർ ഇടപെട്ട് പ്രശ്നപരിഹാരത്തിന് ശ്രമിക്കും. തന്റെ ശബ്ദം കേൾക്കാൻ ആരുമില്ലെന്ന് തോന്നുമ്പോൾ സമൂഹത്തിന് മുന്നിൽ സ്വയം പ്രദർശിപ്പിക്കാനുള്ള ഒരു വേദിയായി മൊബൈൽ ടവറുകൾ മാറുന്നു.
സോഷ്യൽ മീഡിയയിൽ ഇതിനെതിരെ തമാശകളും പരിഹാസങ്ങളും ഉയരുന്നുണ്ടെങ്കിലും, സംഗതി അത്ര നിസ്സാരമല്ല. വൈകാരികമായ തകർച്ചയും ശരിയായ മാനസിക പിന്തുണയുടെ അഭാവവുമാണ് ഇത്തരം അതിവൈകാരികമായ തീരുമാനങ്ങളിലേക്ക് ആളുകളെ എത്തിക്കുന്നത്. ഒരു ചെറിയ അശ്രദ്ധ മതി വലിയൊരു അപകടം സംഭവിക്കാൻ. മിക്കവാറും കേസുകൾ സുരക്ഷിതമായി അവസാനിക്കാറുണ്ടെങ്കിലും, സ്നേഹബന്ധങ്ങളിലെ തകർച്ചകൾ പരിഹരിക്കാൻ ഇത്തരം അപകടകരമായ വഴികൾ തിരഞ്ഞെടുക്കുന്നത് ആശങ്കാജനകമായ ഒരു പ്രവണതയായി തുടരുകയാണ്.
