X ലെ ഒരു പോസ്റ്റ്, വിവാഹത്തിന് വലിയൊരു തുക പണമായി സമ്മാനം ലഭിക്കുന്നത് ആദായനികുതി വകുപ്പിന്റെ ചോദ്യം ചെയ്യലുകൾക്ക് ഇടയാക്കുമോ എന്നതിനെക്കുറിച്ചുള്ള ചർച്ചകൾക്ക് തുടക്കമിട്ടിരിക്കുകയാണ്. പൂജ എന്ന X ഉപയോക്താവ് തന്റെ ബന്ധുവിന്റെ അനുഭവം പങ്കുവെച്ചതോടെയാണ് ഈ ചർച്ച ആരംഭിച്ചത്.
ഇവരുടെ ബന്ധുവിന് വിവാഹസമ്മാനമായി ഏകദേശം 10 ലക്ഷം രൂപ പണമായി ലഭിച്ചു. വിവാഹത്തിൽ പങ്കെടുത്ത 110-ഓളം അതിഥികളാണ് ഈ തുക നൽകിയത്. 500 രൂപയും 2,000 രൂപയും മുതൽ 25,000 രൂപ വരെയും 50,000 രൂപ വരെയുമുള്ള തുകകൾ ഇതിൽ ഉൾപ്പെടുന്നു.
ഇങ്ങനെ ആകെ ലഭിച്ച 10 ലക്ഷത്തോളം രൂപയുടെ ഉറവിടത്തെക്കുറിച്ച് പിന്നീട് ആദായനികുതി അധികൃതർ ചോദ്യം ചെയ്യുമോ എന്നും അത് എങ്ങനെ തെളിയിക്കും എന്നതിനെക്കുറിച്ചും ആ കുടുംബം ആശങ്കയിലാണ്. “സർക്കാർ ജോലി ചെയ്യുന്ന എന്റെ ബന്ധുവിന് വിവാഹസമ്മാനമായി 10 ലക്ഷം രൂപ പണമായി ലഭിച്ചു. ഏകദേശം 110 പേരാണ് അദ്ദേഹത്തിന്റെ വിവാഹത്തിന് പണം സമ്മാനമായി നൽകിയത്. എന്നാൽ ആദായനികുതി വകുപ്പ് ഇതിനെ എങ്ങനെ നോക്കിക്കാണും എന്നോർത്ത് അദ്ദേഹം ഇപ്പോൾ ആശങ്കയിലാണ്,” എന്ന് പൂജ കുറിച്ചു. ഈ പോസ്റ്റ് ഇന്ത്യൻ നികുതി നിയമപ്രകാരം വിവാഹസമ്മാനങ്ങളെ എങ്ങനെ പരിഗണിക്കുന്നു എന്നതിനെക്കുറിച്ചുള്ള ചർച്ചകൾക്ക് വഴിതെളിച്ചു.
ആദായനികുതി നിയമത്തിലെ സെക്ഷൻ 56 പ്രകാരം, ഒരാൾക്ക് തന്റെ വിവാഹത്തോടനുബന്ധിച്ച് ലഭിക്കുന്ന സമ്മാനങ്ങൾക്ക് പൊതുവെ ആദായനികുതി ഇളവുണ്ട്. പണം, സ്വർണം, മറ്റ് സ്വത്തുക്കൾ എന്നിവയ്ക്ക് ഈ ഇളവ് ബാധകമാണ്. കൂടാതെ ബന്ധുക്കളിൽ നിന്ന് ലഭിക്കുന്ന സമ്മാനങ്ങൾക്ക് മാത്രമായി ഇത് പരിമിതപ്പെടുത്തിയിട്ടുമില്ല.
എങ്കിലും, ആവശ്യമായ രേഖകൾ സൂക്ഷിക്കുന്നതിനെക്കുറിച്ചും പണമിടപാടുകളെക്കുറിച്ചും നിരവധി ആളുകൾ സംശയങ്ങൾ ഉന്നയിച്ചു. ഭാവിയിൽ പണത്തിന്റെ ഉറവിടത്തെക്കുറിച്ച് ചോദ്യങ്ങൾ ഉയർന്നാൽ വ്യക്തത വരുത്താൻ പണം നൽകിയ ആളുകളുടെയും തുകയുടെയും വിവരങ്ങൾ അടങ്ങിയ ഒരു റെക്കോർഡ് സൂക്ഷിക്കാൻ ഒരു ഉപയോക്താവ് നിർദ്ദേശിച്ചു. 10 ലക്ഷം രൂപ കൈവശം വെക്കുന്നതിലെ പ്രായോഗിക ബുദ്ധിമുട്ടുകൾ ചൂണ്ടിക്കാണിച്ച മറ്റൊരു ഉപയോക്താവ്, പണത്തിന് കൃത്യമായ കണക്കുണ്ടാക്കിയ ശേഷം അത് നിക്ഷേപ സാധ്യതകളിലേക്ക് മാറ്റാൻ നിർദ്ദേശിച്ചു.
ഈ പണം ഘട്ടംഘട്ടമായി ബാങ്ക് അക്കൗണ്ടുകളിൽ നിക്ഷേപിക്കാനും, ഡിജിറ്റൽ പേയ്‌മെന്റുകൾക്ക് പകരം വീട്ടുചെലവുകൾക്കായി പണമായി തന്നെ ഉപയോഗിക്കാനും മൂന്നാമതൊരാൾ അഭിപ്രായപ്പെട്ടു. “ഈ പണം ബാങ്കിൽ നിക്ഷേപിക്കുന്നതിന് മുമ്പ് ഒരു ടാക്സ് അഡ്വൈസറുടെ സഹായം തേടുക,” എന്ന് മറ്റൊരാളും കൂട്ടിച്ചേർത്തു.
