യൂട്യൂബിന്റെ 2025-ലെ ഇന്ത്യ ഇംപാക്ട് റിപ്പോർട്ട് പുറത്തുവന്നു. യൂട്യൂബ് രാജ്യത്തിന്റെ സമ്പദ്‌വ്യവസ്ഥയിലേക്ക് 18,000 കോടി രൂപ സംഭാവന ചെയ്തതായും ഏകദേശം പത്ത് ലക്ഷത്തോളം പൂർണ്ണസമയ തൊഴിലവസരങ്ങൾ സൃഷ്ടിച്ചതായും റിപ്പോർട്ടിൽ പറയുന്നു.
ഈ കണക്കുകൾ അതിശയിപ്പിക്കുന്നതാണെങ്കിലും കഥ ഇവിടെ തീരുന്നില്ലെന്നും ഇതിനുപുറമെ നിരവധി അനുബന്ധ നേട്ടങ്ങൾ വേറെയുമുണ്ടെന്നും യൂട്യൂബ് ഇന്ത്യ മാനേജിംഗ് ഡയറക്ടർ ഗുഞ്ചൻ സോണി എൻ.ഡി.ടി.വിയോട് സംസാരിക്കവേ പറഞ്ഞു. ഒറ്റമുറിയിൽ നിന്ന് തുടങ്ങി നാല് വർഷത്തിനുള്ളിൽ 35 പേർക്ക് വരെ ജോലി നൽകുന്ന നിലയിലേക്ക് വളർന്ന ക്രിയേറ്റർമാരുടെ കഥകൾ പങ്കുവെച്ച അവർ, യൂട്യൂബിലെ കണ്ടന്റ് ക്രിയേഷൻ ഇപ്പോൾ ഒരു മികച്ച കരിയറായി മാറിക്കൊണ്ടിരിക്കുകയാണെന്ന് ചൂണ്ടിക്കാട്ടി.
ഈ വലിയ കണക്കുകൾക്ക് പിന്നിൽ യുവാക്കൾക്ക് ലഭിക്കുന്ന സാമ്പത്തിക, തൊഴിൽ അവസരങ്ങളാണ് തങ്ങളെ കൂടുതൽ ആവേശഭരിതരാക്കുന്നതെന്ന് യൂട്യൂബ് ഇന്ത്യ മേധാവി പറഞ്ഞു. ഏകദേശം പത്ത് ലക്ഷത്തോളം പൂർണ്ണസമയ ജോലികൾക്ക് പുറമെ, ക്രിയേറ്റർമാർ വഴി ട്രെയിനികളായി മറ്റൊരു മൂന്ന് ലക്ഷം പേർക്ക് കൂടി അവസരം ലഭിച്ചിട്ടുണ്ടെന്നും ഇതെല്ലാം കൃത്യമായ വിവരങ്ങളുടെ അടിസ്ഥാനത്തിലുള്ളതാണെന്നും അവർ കൂട്ടിച്ചേർത്തു.
സെൽഫി സ്റ്റിക്കും വെബ്‌ക്യാമും ഉപയോഗിച്ച് വീഡിയോ എടുക്കുന്നവരാണ് ക്രിയേറ്റർമാർ എന്ന് മുൻപ് ആളുകൾ കരുതിയിരുന്നെങ്കിൽ, ഇന്ന് അവരിൽ പലരും സ്വന്തം നിലയിൽ മാധ്യമ സ്ഥാപനങ്ങളുടെ സി.ഇ.ഒമാരായി മാറിയിരിക്കുകയാണെന്ന് സോണി വ്യക്തമാക്കി. വീടുകളിലെ ഉപയോഗത്തിനുള്ള സാധനങ്ങൾ മികച്ച രീതിയിൽ തിരഞ്ഞെടുക്കാൻ ആളുകളെ സഹായിക്കുക എന്ന ലക്ഷ്യത്തോടെ 2022-ൽ ആരംഭിച്ച ‘സിമ്പിൾ ഘർ’ എന്ന ചാനലിന്റെ ഉദാഹരണവും അവർ പങ്കുവെച്ചു. ഒരു ചെറിയ ക്യാമറയുമായി ഒരു ചെറിയ മുറിയിൽ നിന്ന് തുടങ്ങിയ അവർക്കിന്ന് 35 ജീവനക്കാരുണ്ടെന്നും ഏഴിലധികം ഭാഷകളിൽ അവർ ഉള്ളടക്കങ്ങൾ നിർമ്മിക്കുന്നുണ്ടെന്നും സോണി പറഞ്ഞു. ഇത് ഒറ്റപ്പെട്ട സംഭവമല്ലെന്നും ഇതാണ് ഇപ്പോഴത്തെ രീതിയെന്നും സമ്പദ്‌വ്യവസ്ഥയിൽ ഇത്രയും വലിയ കണക്കുകൾ കാണുന്നതിന് പിന്നിലെ കാരണം ഇതാണെന്നും അവർ കൂട്ടിച്ചേർത്തു.
തങ്ങളുടെ പ്രാഥമിക വരുമാന മാർഗ്ഗം യൂട്യൂബ് ആണെന്ന് 73 ശതമാനം ക്രിയേറ്റർമാരും അഭിപ്രായപ്പെട്ടതായി റിപ്പോർട്ടിൽ പറയുന്നു. പ്ലാറ്റ്‌ഫോം ഇതിനെ വളരെ ഗൗരവത്തോടെയാണ് കാണുന്നതെന്ന് വ്യക്തമാക്കിയ സോണി, ഈ മേഖലയെ വളർത്തിയെടുക്കുന്നതിനും വരുമാന മാർഗ്ഗങ്ങൾ വർദ്ധിപ്പിക്കുന്നതിനും തുടർന്നും നിക്ഷേപങ്ങൾ നടത്തുമെന്നും വ്യക്തമാക്കി.
യൂട്യൂബ് ഇത്രയും വലിയൊരു മേഖലയായിരുന്നിട്ടും കഴിഞ്ഞ വർഷം മാത്രം രണ്ട് ലക്ഷത്തോളം പുതിയ ചാനലുകൾക്ക് ആദ്യമായി വരുമാനം ലഭിച്ചു തുടങ്ങിയത് തന്നിൽ ആശ്ചര്യം ഉണ്ടാക്കിയതായി മാനേജിംഗ് ഡയറക്ടർ പറഞ്ഞു. പുതിയ ആളുകൾക്ക് ഇനിയും ഇതിലേക്ക് വരാൻ വലിയ അവസരങ്ങളുണ്ടെന്നും സർഗ്ഗാത്മക സമ്പദ്‌വ്യവസ്ഥയിൽ പങ്കാളികളാകാൻ ആളുകൾ പുതിയ വഴികൾ കണ്ടെത്തുന്നുണ്ടെന്നും ഇത് വ്യക്തമാക്കുന്നു. കൂടാതെ, ഇന്ത്യൻ സാഹചര്യത്തിലും പരമ്പരാഗത ജോലികളിലും ഏറെ പ്രിയപ്പെട്ട ഏഴക്ക ശമ്പളം (Seven figures) യൂട്യൂബിലൂടെ നേടുന്ന ക്രിയേറ്റർമാരുടെ എണ്ണത്തിൽ പ്രതിവർഷം 20 ശതമാനം വർദ്ധനവുണ്ടായതായും അവർ എടുത്തുപറഞ്ഞു.
