ഹൂസ്റ്റൺ ∙ ജപ്പാനെതിരെ ആദ്യം ഒരു ഗോളിന് പിന്നിൽ പോയ ശേഷം, തുടർച്ചയായി രണ്ട് ഗോളുകൾ തിരിച്ചടിച്ച് ബ്രസീൽ ആവേശകരമായ വിജയം സ്വന്തമാക്കി. കളിയുടെ 29-ാം മിനിറ്റിൽ കൈഷു സാനോയിലൂടെ ജപ്പാനാണ് ആദ്യം മുന്നിലെത്തിയത്. എന്നാൽ 56-ാം മിനിറ്റിൽ കാസെമിറോ നേടിയ മനോഹരമായ ഹെഡർ ഗോളിലൂടെ ബ്രസീൽ സമനില പിടിച്ചു.
മത്സരം സമനിലയിലായി എക്സ്ട്രാ ടൈമിലേക്ക് നീങ്ങുമെന്ന് കരുതിയിരിക്കെ, ഇഞ്ചുറി ടൈമിന്റെ അവസാന നിമിഷങ്ങളിൽ (90+5′) ഗബ്രിയേൽ മാർട്ടിനെല്ലി ബ്രസീലിന്റെ വിജയഗോൾ കുറിച്ചു. മുൻപ് 2006 ലോകകപ്പിൽ ഇരുടീമുകളും ഏറ്റുമുട്ടിയപ്പോഴും സമാനമായ രീതിയിൽ പിന്നിൽ നിന്ന ശേഷമാണ് ബ്രസീൽ ജപ്പാനെ ഒന്നിനെതിരെ നാല് ഗോളുകൾക്ക് തോൽപ്പിച്ചത്. അന്ന് ജർമനിയിൽ നടന്ന കളിയിൽ കെയ്ജി തമദയിലൂടെ ജപ്പാൻ ആദ്യം മുന്നിലെത്തിയെങ്കിലും റൊണാൾഡോയുടെ ഇരട്ട ഗോളുകളും ജുനിഞ്ഞോ, ഗിൽബർട്ടോ മെലോ എന്നിവരുടെ ഗോളുകളും ബ്രസീലിന് വൻ വിജയം സമ്മാനിക്കുകയായിരുന്നു.
മത്സരത്തിന്റെ തുടക്കത്തിൽ 57 ശതമാനം സമയവും പന്ത് കൈവശം വെച്ച് ബ്രസീൽ തന്നെയാണ് മേധാവിത്വം പുലർത്തിയത്. പത്താം മിനിറ്റിൽ ജപ്പാൻ ഗോൾമുഖത്ത് ബ്രസീൽ നടത്തിയ ശക്തമായ മുന്നേറ്റം കൂട്ടപ്പൊരിച്ചിലിൽ കലാശിച്ചെങ്കിലും ജാപ്പനീസ് ഗോൾകീപ്പർ സിയോൺ സുസുക്കി പന്ത് സുരക്ഷിതമായി കൈക്കലാക്കി. തൊട്ടുപിന്നാലെ 14-ാം മിനിറ്റിൽ മത്തേയുസ് കുഞ്ഞ തൊടുത്ത ഷോട്ട് ജപ്പാൻ കീപ്പർ തട്ടിയകറ്റി രക്ഷപ്പെടുത്തി. ആ റീബൗണ്ടിൽ നിന്ന് ബ്രൂണോ ഗിമാരയസ് നടത്തിയ ശ്രമവും പരാജയപ്പെട്ടു. തുടർന്ന് കാസെമിറോ വരുത്തിയ ഫൗളിനെ തുടർന്ന് ജപ്പാന് ബ്രസീൽ ബോക്സിന് മുന്നിൽ വെച്ച് ഒരു ഫ്രീകിക്ക് ലഭിച്ചെങ്കിലും അത് ഗോളാക്കി മാറ്റാൻ അവർക്ക് കഴിഞ്ഞില്ല. ആദ്യത്തെ ഹൈഡ്രേഷൻ ബ്രേക്ക് വരെ ഇരുടീമുകൾക്കും ലക്ഷ്യത്തിലേക്ക് കൃത്യമായ ഒരു ഷോട്ടുപോലും ഉതിർക്കാൻ സാധിച്ചിരുന്നില്ല.
എന്നാൽ 29-ാം മിനിറ്റിൽ ബ്രസീൽ താരങ്ങളുടെ ഒരു പാസിങ് പിഴവ് മുതലെടുത്ത് ജപ്പാൻ ആദ്യ ഗോൾ നേടി. പന്തുമായി കുതിച്ച കൈഷു സാനോ ബോക്സിന് വെളിയിൽ നിന്ന് തൊടുത്ത ലോങ് ഷോട്ട് ബ്രസീൽ ഗോൾകീപ്പർ അലിസനെ മറികടന്ന് വലയിൽ കയറുകയായിരുന്നു. ഗോൾ വഴങ്ങിയതോടെ സമനിലയ്ക്കായി ബ്രസീൽ കഠിനമായി ശ്രമിച്ചെങ്കിലും ആദ്യ പകുതിയിൽ ലക്ഷ്യം കണ്ടില്ല. ആദ്യ പകുതിയിൽ ബ്രസീൽ ലക്ഷ്യത്തിലേക്ക് രണ്ട് ഷോട്ടുകൾ അടിച്ചപ്പോൾ, ജപ്പാൻ എടുത്ത ഏക ഷോട്ട് തന്നെ ഗോളായി മാറുകയായിരുന്നു.
രണ്ടാം പകുതിയിൽ കൂടുതൽ ആക്രമിച്ച് കളിച്ച ബ്രസീൽ 56-ാം മിനിറ്റിൽ കാസെമിറോയുടെ തകർപ്പൻ ഹെഡറിലൂടെ കളിയിൽ ഒപ്പമെത്തി. ഇതിനു മുൻപ് 52, 53 മിനിറ്റുകളിൽ ഗോളെന്നുറച്ച രണ്ട് വലിയ അവസരങ്ങൾ ബ്രസീലിന് നഷ്ടമായിരുന്നു. പ്രത്യേകിച്ച് 53-ാം മിനിറ്റിൽ കാസെമിറോ നടത്തിയ ഗോൾശ്രമം ജപ്പാന്റെ പ്രതിരോധ താരം താകെഹിറോ ടോമിയാസു ഗോൾവരയ്ക്ക് തൊട്ടുമുന്നിൽ വെച്ചാണ് തട്ടിയകറ്റിയത്. ഒടുവിൽ കളി അവസാനിക്കാൻ നിമിഷങ്ങൾ മാത്രം ബാക്കിയുള്ളപ്പോൾ ഗബ്രിയേൽ മാർട്ടിനെല്ലി നേടിയ ഗോളിലൂടെ ബ്രസീൽ തങ്ങളുടെ ആവേശവിജയം ഉറപ്പിച്ചു.
