ദുബായിലെ ഒരു വിയറ്റ്നാമീ സ്വദേശിയായ വനിതാ സംരംഭക തന്റെ നഖാലങ്കാര (nail art) അഭിരുചിയെ മികച്ചൊരു ബിസിനസ്സാക്കി മാറ്റിയിരിക്കുകയാണ്. ‘ദി നാഷണൽ’ പത്രത്തിന്റെ റിപ്പോർട്ട് അനുസരിച്ച്, ആറ് വർഷം മുമ്പ് ദുബായിലെത്തിയ 32 കാരിയായ ന്യൂയെൻ ഫുവോങ് അൻഹ് (ഫുള്ള) ഒരു സാധാരണ നഖാലങ്കാര വിദഗ്ദ്ധയായാണ് ജോലി തുടങ്ങിയത്. ഇന്ന് ജുമൈറ വില്ലേജ് സർക്കിളിൽ (JVC) ‘ബ്യൂട്ടി ബൈ ഫുള്ള’ എന്ന പേരിൽ ഒരു സലൂൺ സ്വന്തമായി നടത്തുന്ന ഇവർ, പ്രതിമാസം 30,000 മുതൽ 40,000 ദിർഹം (ഏകദേശം 7 ലക്ഷം മുതൽ 10 ലക്ഷം രൂപ വരെ) സമ്പാദിച്ചിരുന്നു.
പന്ത്രണ്ട് വർഷം മുമ്പ് വിയറ്റ്നാമിൽ കരിയർ ആരംഭിച്ച ഫുള്ള, പൂക്കൾ, മൃഗങ്ങൾ എന്നിവയുടെ 3D നഖാലങ്കാര ഡിസൈനുകളിൽ വിദഗ്ദ്ധയാണ്. ദുബായിൽ ആദ്യത്തെ രണ്ടു വർഷ കരാറിൽ പ്രതിമാസം 3,500 ദിർഹം ശമ്പളത്തിനാണ് ഇവർ ഒരു ചെറിയ സലൂണിൽ ജോലി ചെയ്തത്. കരാർ കഴിഞ്ഞതോടെ ഫുള്ള ഫ്രീലാൻസായി (സ്വതന്ത്രമായി) ജോലി ചെയ്യാൻ തുടങ്ങി. അവധിയില്ലാതെ കഠിനാധ്വാനം ചെയ്തതോടെ ഉപഭോക്താക്കളുടെ എണ്ണം കൂടുകയും വരുമാനം വലിയ രീതിയിൽ വർദ്ധിക്കുകയും ചെയ്തു. കുറഞ്ഞ നിരക്കിൽ ആകർഷകമായ ഡിസൈനുകൾ നൽകിയതിനാൽ ചെറുപ്പക്കാരായ ആളുകൾ ഇവരെ തേടിയെത്തി.
2026 ജൂണിൽ ഇവർ സ്വന്തമായി പുതിയ സലൂൺ ആരംഭിച്ചു. നിലവിൽ സലൂണിൽ നിന്നുള്ള വരുമാനം മുഴുവൻ ബിസിനസ്സ് വളർത്താനായി വീണ്ടും നിക്ഷേപിക്കുന്നതിനാൽ ഫുള്ള ഇപ്പോൾ ശമ്പളമൊന്നും എടുക്കുന്നില്ല. അടുത്ത മൂന്ന് മാസത്തിനുള്ളിൽ ജീവനക്കാർക്ക് ശമ്പളം നൽകുന്നതോടൊപ്പം സ്വന്തമായി പഴയതുപോലെ വരുമാനം ഉണ്ടാക്കാൻ സാധിക്കുമെന്നാണ് ഇവരുടെ പ്രതീക്ഷ. വലിയ വരുമാനമുണ്ടായിട്ടും ഫുള്ള വളരെ ലളിതമായാണ് ജീവിക്കുന്നത്. വാടകയും വണ്ടിക്കൂലിയും ഭക്ഷണച്ചെലവും ഉൾപ്പെടെ പ്രതിമാസം 6,000 ദിർഹം മാത്രമാണ് ഇവർക്ക് ചെലവ് വരുന്നത്. ഇതിൽ 5,000 ദിർഹം വിയറ്റ്നാമിലേക്ക് നിക്ഷേപങ്ങൾക്കായി അയക്കുന്നുണ്ട്. നിലവിൽ അവിടെ രണ്ടു വീടുകൾ ഇവർ സ്വന്തമാക്കി കഴിഞ്ഞു. ബാക്കി തുക സലൂണിന്റെ ആവശ്യങ്ങൾക്കായി മാറ്റിവെയ്ക്കുന്നു.
ബിസിനസ്സ് വിപുലീകരിച്ച് ഒരു മികച്ച ടീമിനെ കെട്ടിപ്പടുക്കുന്നതിലൂടെ, തന്റെ 50-കളിൽ തന്നെ വിരമിക്കാനുള്ള ഒരു വരുമാനമാർഗ്ഗം ഉണ്ടാക്കുകയാണ് ഫുള്ളയുടെ ലക്ഷ്യം. ദുബായിൽ മാത്രമല്ല, അബുദാബി, ഫുജൈറ തുടങ്ങിയ മറ്റ് എമിറേറ്റുകളിലും കൂടി ചേർത്ത് ആകെ അഞ്ചോളം ബ്രാഞ്ചുകൾ തുടങ്ങാൻ ഇവർ ആഗ്രഹിക്കുന്നു. അടുത്ത 20 വർഷത്തിനുള്ളിൽ ജോലിയിൽ നിന്ന് വിരമിച്ച ശേഷം വിയറ്റ്നാമിൽ കൂടുതൽ വീടുകളും ഒരു ഫാമും വാങ്ങി, പ്രകൃതിയോട് ഇണങ്ങി ജീവിച്ച് പച്ചക്കറികളും മൃഗങ്ങളുമൊക്കെയുമായി സമാധാനപരമായ ഒരു ജീവിതം നയിക്കാനാണ് ഫുള്ള പദ്ധതിയിടുന്നത്.
