ഒരു ഇന്ത്യൻ വീട്ടുജോലിക്കാരിയുടെ ഒറ്റയ്ക്കുള്ള തായ്ലൻഡ് യാത്ര സോഷ്യൽ മീഡിയയിൽ പലരുടെയും കണ്ണുനിറയ്ക്കുകയും ഒപ്പം മനസ്സ് നിറയ്ക്കുകയും ചെയ്യുകയാണ്. പ്രമുഖ ഡിജിറ്റൽ ക്രിയേറ്ററായ അനിഷ് ഭഗത്തിന്റെ വീട്ടിൽ ജോലി ചെയ്യുന്ന രേഷ്മയാണ് അദ്ദേഹത്തോടൊപ്പം തായ്ലൻഡിലേക്ക് യാത്ര ചെയ്തത്. “ഒരു വീട്ടുജോലിക്കാരി ആദ്യമായാണ് ഇന്ത്യയ്ക്ക് പുറത്തേക്ക് വരുന്നത്,” തന്റെ പല ആദ്യകാല അനുഭവങ്ങളും കോർത്തിണക്കിയ വീഡിയോയിൽ രേഷ്മ പറയുന്നു.
അനിഷിനൊപ്പമാണ് രേഷ്മ വിമാനത്തിൽ കയറിയത്. തായ്ലൻഡിൽ എത്തിയപ്പോൾ, ഒരു ദിവസം മുഴുവൻ ഒറ്റയ്ക്ക് ചെലവഴിക്കാൻ അനിഷ് അവളോട് ആവശ്യപ്പെട്ടു. “ഞാൻ വെറുമൊരു വീട്ടുജോലിക്കാരിയാണ്; എനിക്ക് ഇവിടെ ആരെയും അറിയില്ല, അവരുടെ ഭാഷ മനസ്സിലാകില്ല, വായിക്കാനും അറിയില്ല,” എന്ന് പറഞ്ഞ രേഷ്മ, ഒപ്പം ഒരു കാര്യം കൂടി കൂട്ടിച്ചേർത്തു, “പക്ഷേ എനിക്ക് നന്നായി പാചകം ചെയ്യാൻ അറിയാം. അതുകൊണ്ട് കൂട്ടുകാരെ ഉണ്ടാക്കാൻ ഞാൻ ‘പുരൻപോളി’ (ഒരു തരം മധുര പലഹാരം) ഉണ്ടാക്കിയിട്ടുണ്ട്.”
തനിക്ക് ഏറ്റവും ഇഷ്ടപ്പെട്ട സാരി ധരിച്ചാണ് രേഷ്മ തായ്ലൻഡ് കാണാൻ ഇറങ്ങിയത്. പുതിയ സുഹൃത്തുക്കളെ കണ്ടെത്താനായി പുരൻപോളി നിറച്ച ഒരു ടിഫിൻ ബോക്സും കൈയിൽ കരുതിയിരുന്നു. തന്റെ ആദ്യത്തെ വ്ലോഗിൽ രേഷ്മ പറഞ്ഞത്, തനിക്ക് താല്പര്യമുള്ള കാര്യങ്ങൾ ചെയ്യാൻ അനിഷ് ആവശ്യപ്പെട്ടിരുന്നു എന്നാണ്. എന്നാൽ, “എന്റെ താല്പര്യം എന്താണെന്ന് ഞാൻ ഇതുവരെ ചിന്തിച്ചിട്ടേയില്ല. അതിനൊന്നും എനിക്ക് സമയം കിട്ടിയിരുന്നില്ല,” എന്നായിരുന്നു രേഷ്മയുടെ മറുപടി.
ബാങ്കോക്കിലെ ഒരു മനോഹരമായ ക്ഷേത്രത്തിൽ എത്തിയ രേഷ്മ, അവിടെയുണ്ടായിരുന്ന ഒരു ജർമ്മൻകാരന് പുരൻപോളി നൽകി തന്റെ ആദ്യത്തെ സുഹൃത്താക്കി മാറ്റി. “എനിക്ക് വലിയ പേടിയുണ്ടായിരുന്നു. ഒരു പുരുഷന്റെ തുണയില്ലാതെ ഞാൻ ഇതുവരെ പുറത്തുപോയിട്ടില്ല,” രേഷ്മ പറഞ്ഞു.
പിന്നീട് ഒരു സെവൻ-ഇലവൻ (7-Eleven) സ്റ്റോർ സന്ദർശിച്ച രേഷ്മ, അവിടെ വെച്ച് പോപ്പോ എന്ന വനിതാ ഇൻഫ്ലുവൻസറെ പരിചയപ്പെട്ടു. പോപ്പോ രേഷ്മയെ തന്റെ വീട്ടിലേക്ക് ഉച്ചഭക്ഷണത്തിനായി ക്ഷണിച്ചു. അവർ ഒന്നിച്ച് യാത്ര ചെയ്യുകയും ഒരുമിച്ച് ഭക്ഷണം കഴിക്കുകയും ചെയ്തു. “ഉത്തരവാദിത്തങ്ങൾക്കിടയിൽ നമ്മൾ സ്ത്രീകൾ എന്തുകൊണ്ടാണ് നമ്മളെത്തന്നെ മറന്നുപോകുന്നത് എന്ന് അറിയില്ല,” എന്ന് യാത്രയ്ക്കിടയിൽ രേഷ്മ ഓർത്തു.
സിനിമകളിലേതുപോലെ ഒരു പുസ്തകം വായിച്ചുകൊണ്ടും, ‘മാംഗോ സ്റ്റിക്കി റൈസ്’ എന്ന വിഭവം കഴിച്ചുകൊണ്ടുമാണ് രേഷ്മ ആ ദിവസം അവസാനിപ്പിച്ചത്. ആ അനുഭവത്തെക്കുറിച്ച് ഓർത്ത് “രേഷ്മ, എനിക്ക് നിന്നെയോർത്ത് അഭിമാനമുണ്ട്,” എന്ന് അവൾ സ്വയം പറഞ്ഞു.
ഈ വ്ലോഗ് പുറത്തുവന്നതോടെ സോഷ്യൽ മീഡിയയിൽ നിന്ന് വലിയ സ്നേഹമാണ് രേഷ്മയ്ക്ക് ലഭിച്ചുകൊണ്ടിരിക്കുന്നത്. “ഇത് വളരെ മനോഹരമാണ്” എന്നാണ് ഒരാൾ കമന്റ് ചെയ്തത്. മറ്റൊരു വ്യക്തി കുറിച്ചത് ഇങ്ങനെയാണ്, “ചേച്ചി കാറിലിരുന്ന് മുടി അഴിച്ചിട്ടപ്പോൾ എന്റെ കണ്ണുകൾ നിറഞ്ഞുപോയി. ഈ യാത്രയിൽ നിങ്ങൾക്ക് ഒരുപാട് സന്തോഷിക്കാൻ കഴിയട്ടെ, ഒരു പുതിയ നിങ്ങളെത്തന്നെ കണ്ടെത്താൻ സാധിക്കട്ടെ എന്ന് ആശംസിക്കുന്നു.”
“ഇതുവരെ കണ്ടതിൽ വെച്ച് ഏറ്റവും ഹൃദയസ്പർശിയായ ട്രാവൽ വ്ലോഗ്,” എന്ന് മറ്റൊരാൾ പറഞ്ഞപ്പോൾ, “ഇത് വളരെ മധുരമുള്ള ഒന്നാണ്, എനിക്ക് ഇഷ്ടപ്പെട്ട ഒരേയൊരു വ്ലോഗും ഇതാണ്,” എന്ന് വേറൊരാൾ കുറിച്ചു. “അവർ കാറിൽ വെച്ച് മുടി അഴിച്ചിട്ട രീതി… ഒരു സ്വതന്ത്ര ശലഭത്തെപ്പോലെ തോന്നിപ്പിച്ചു,” എന്നാണ് അഞ്ചാമതൊരാൾ അഭിപ്രായപ്പെട്ടത്.
