പന്തെടുത്ത് നല്‍കാന്‍ കുനിഞ്ഞ പാക്ക് താരത്തെ റൺഔട്ടാക്കി ബംഗ്ലദേശ് ബോളർ, ഹെൽമറ്റും ഗ്ലൗസും വലിച്ചെറിഞ്ഞ് താരം- വീഡിയോ

മിർപുർ∙ പാക്കിസ്ഥാൻ–ബംഗ്ലാദേശ് രണ്ടാം ഏകദിനത്തിനിടെ ഗ്രൗണ്ടിൽ അരങ്ങേറിയത് അപ്രതീക്ഷിത നാടകങ്ങൾ. മാന്യതയുടെ പേരിൽ പന്തെടുത്തു നൽകാൻ ശ്രമിച്ച പാക്ക് ബാറ്റർ സൽമാൻ അലി ആഗയെ ബംഗ്ലാദേശ് ബോളർ മെഹ്ദി ഹസൻ മിറാസ് റൺഔട്ടാക്കിയതാണ് വൻ വിവാദമായത്.

അപ്രതീക്ഷിതമായി പുറത്തായതിന്റെ ഞെട്ടലിലും രോഷത്തിലും ഹെൽമറ്റും ഗ്ലൗസും ഗ്രൗണ്ടിൽ വലിച്ചെറിഞ്ഞാണ് താരം മടങ്ങിയത്. ബംഗ്ലാദേശ് താരത്തിന്റെ തന്ത്രപരമായ നീക്കം പാക്ക് പാളയത്തെ ഒന്നടങ്കം സ്തബ്ധരാക്കി.

ട്വന്റി20 ലോകകപ്പിലെ പരാജയഭാരം പേറി ബംഗ്ലാദേശിലെത്തിയ പാക്കിസ്ഥാന് ആദ്യ മത്സരത്തിലും തോൽവി നേരിടേണ്ടി വന്നിരുന്നു. ഈ സമ്മർദ്ദത്തിനിടെയാണ് സൽമാൻ ആഗയുടെ റൺഔട്ട് സമൂഹമാധ്യമങ്ങളിൽ ചർച്ചയാകുന്നത്. 39-ാം ഓവറിലെ നാലാം പന്തിലായിരുന്നു സംഭവം. മുഹമ്മദ് റിസ്‌വാൻ ഡിഫൻഡ് ചെയ്ത പന്ത് നോൺ സ്ട്രൈക്കേഴ്സ് എൻഡിലേക്ക് ഉരുണ്ടുനീങ്ങി. ക്രീസിന് പുറത്തായിരുന്ന സൽമാൻ ആഗ സഹായമെന്ന നിലയിൽ പന്തെടുക്കാൻ കുനിഞ്ഞതും മെഹ്ദി ഹസൻ മിറാസ് പന്ത് പിടിച്ചെടുത്ത് ബെയ്ൽസ് ഇളക്കി അപ്പീൽ ചെയ്യുകയായിരുന്നു.

ബംഗ്ലാദേശ് താരത്തിന്റെ നീക്കത്തിൽ പകച്ചുപോയ പാക്ക് ബാറ്റർക്ക് പ്രതികരിക്കാൻ പോലും സമയം ലഭിച്ചില്ല. ഔട്ട് വിധിച്ചതോടെ ക്രോധം അടക്കാനാവാതെയാണ് സൽമാൻ ആഗ ഡ്രസ്സിങ് റൂമിലേക്ക് മടങ്ങിയത്. വഴിനീളെ തന്റെ ഹെൽമറ്റും ഗ്ലൗസും വലിച്ചെറിഞ്ഞ താരം ഗ്രൗണ്ടിന് പുറത്തെത്തിയ ശേഷവും രോഷപ്രകടനം തുടർന്നു. ക്രിക്കറ്റ് ലോകത്ത് സ്പിരിറ്റ് ഓഫ് ഗെയിമിനെക്കുറിച്ചുള്ള പുതിയ ചർച്ചകൾക്ക് ഈ സംഭവം തിരികൊളുത്തിയിട്ടുണ്ട്.

പുറത്താകുമ്പോൾ 62 പന്തിൽ 64 റൺസുമായി മികച്ച നിലയിലായിരുന്നു സൽമാൻ ആഗ. മത്സരത്തിൽ ആദ്യം ബാറ്റ് ചെയ്ത പാക്കിസ്ഥാൻ 47.3 ഓവറിൽ 274 റൺസിന് ഓൾഔട്ടായി. മത്സരത്തിൽ ബംഗ്ലാദേശിനെ 128 റൺസിന് തകർത്ത് പാക്കിസ്ഥാൻ ഉജ്ജ്വല വിജയം നേടി. മാസ് സദാഖത്തും ഹാരിസ് റൗഫും മൂന്ന് വിക്കറ്റുകൾ വീതം വീഴ്ത്തിയ മിന്നും പ്രകടനമാണ് പാക്കിസ്ഥാന് കരുത്തായത്. മോശം കാലാവസ്ഥയെത്തുടർന്ന് കളി തടസ്സപ്പെട്ടതോടെ ബംഗ്ലാദേശിന്റെ വിജയലക്ഷ്യം പുനർനിശ്ചയിച്ചിരുന്നു.

പുനർനിശ്ചയിച്ച 243 റൺസ് ലക്ഷ്യവുമായി മറുപടി ബാറ്റിങ്ങിനിറങ്ങിയ ബംഗ്ലാദേശ് വെറും 114 റൺസിന് പുറത്തായി. പാക്ക് ബോളർമാരുടെ കൃത്യതയാർന്ന ആക്രമണത്തിന് മുന്നിൽ ബംഗ്ലാദേശ് ബാറ്റർമാർക്ക് അടിപതറുകയായിരുന്നു. ഈ വിജയത്തോടെ മൂന്ന് മത്സരങ്ങളടങ്ങിയ പരമ്പരയിൽ പാക്കിസ്ഥാൻ 1-1ന് ഒപ്പമെത്തി. ഞായറാഴ്ച നടക്കുന്ന നിർണ്ണായകമായ ഫൈനൽ പോരാട്ടമാകും ഇനി പരമ്പര വിജയികളെ നിശ്ചയിക്കുക.