അഹമ്മദാബാദ്, ഫെബ്രുവരി 22: ഞായറാഴ്ച അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന നിർണ്ണായകമായ ഐസിസി ടി20 ലോകകപ്പ് 2026 സൂപ്പർ 8 പോരാട്ടത്തിൽ ദക്ഷിണാഫ്രിക്കയോട് ഇന്ത്യ പരാജയപ്പെട്ടതിന് പിന്നാലെ മുൻ പാകിസ്ഥാൻ ഇതിഹാസം മുഹമ്മദ് യൂസഫ് പ്രതികരണവുമായി രംഗത്തെത്തി. ഇന്ത്യൻ ടീമിനെ പരിഹസിച്ച യൂസഫ്, ഇന്ത്യയുടെ ഈ തോൽവിക്ക് പിന്നിൽ മുൻ പാകിസ്ഥാൻ പേസർ മുഹമ്മദ് ആമിറാണെന്ന് അവകാശപ്പെട്ടു.
തന്റെ ഔദ്യോഗിക സോഷ്യൽ മീഡിയ അക്കൗണ്ടിലൂടെയാണ് മുഹമ്മദ് യൂസഫ് ഇന്ത്യൻ ടീമിനെ ട്രോളിയത്. മുഹമ്മദ് ആമിർ കളിക്കാരനായിരുന്നപ്പോൾ മൈതാനത്ത് വെച്ച് ഇന്ത്യൻ ടീമിനെ വേട്ടയാടിയിരുന്നെന്നും, ഇപ്പോൾ സ്റ്റുഡിയോയിലിരുന്ന് അവരെ വിറപ്പിക്കുകയാണെന്നും അദ്ദേഹം പറഞ്ഞു. നിലവിൽ ടെലിവിഷൻ ഷോകളിൽ ക്രിക്കറ്റ് താരങ്ങളെയും ടീമുകളെയും കുറിച്ച് ആമിർ നിരന്തരം അഭിപ്രായങ്ങൾ പ്രകടിപ്പിക്കാറുണ്ട്.
അഭിഷേക് ശർമ്മ ഒരു ‘സ്ലോഗർ’ (അലക്ഷ്യമായി ബാറ്റ് വീശുന്നവൻ) മാത്രമാണെന്ന് ആമിർ ഒരു ഷോയിൽ പറഞ്ഞത് വലിയ വിവാദങ്ങൾക്ക് വഴിവെച്ചിരുന്നു. ഇതിന് പിന്നാലെ മുൻ ഇന്ത്യൻ താരങ്ങൾ ആമിറിനെതിരെ രംഗത്തെത്തുകയും ചെയ്തിരുന്നു. ഇന്ത്യക്ക് ഇത്തവണ സെമിഫൈനലിൽ എത്താൻ കഴിയില്ലെന്നും ദക്ഷിണാഫ്രിക്ക ഇന്ത്യയേക്കാൾ മികച്ച ടീമാണെന്നും ആമിർ പ്രവചിച്ചിരുന്നു.
ഈ ചർച്ചകൾ മുൻനിർത്തി മുഹമ്മദ് യൂസഫ് തന്റെ സോഷ്യൽ മീഡിയയിൽ കുറിച്ചത് ഇങ്ങനെയാണ്: “ഓയ് ആമിർ, നീ ഒരു ശല്യം തന്നെ! നീ ഇന്ത്യയെ മൈതാനത്ത് വെച്ച് പീഡിപ്പിച്ചു, ഇപ്പോൾ സ്റ്റുഡിയോയിൽ ഇരുന്ന് അവരെ വിറപ്പിക്കുന്നു. അവരെ ഒന്ന് ശ്വാസം വിടാൻ അനുവദിക്കൂ, അവർ ഇപ്പോൾ തന്നെ വലിയ സമ്മർദ്ദത്തിലാണ്. കഴിഞ്ഞ ടി20 ലോകകപ്പിലെ ഫൈനലിസ്റ്റുകളായ ദക്ഷിണാഫ്രിക്ക നിർത്തിയിടത്തുനിന്ന് തന്നെ തുടങ്ങിയിരിക്കുന്നു. മികച്ച ടീമാണവർ! അവരുടെ ടോപ്പ് ഓർഡർ പതറിയെങ്കിലും ലോവർ ഓർഡർ രക്ഷിച്ചെടുത്തു, പന്തടക്കവും അപാരമായിരുന്നു.” ബാറ്റിംഗ്, ബോളിംഗ്, ഫീൽഡിംഗ് തുടങ്ങി എല്ലാ മേഖലകളിലും ആധിപത്യം പുലർത്തിയ ദക്ഷിണാഫ്രിക്കയുടെ പ്രകടനത്തെ അദ്ദേഹം പ്രശംസിച്ചു.
188 റൺസ് വിജയലക്ഷ്യം പിന്തുടർന്ന ഇന്ത്യ 18.5 ഓവറിൽ വെറും 111 റൺസിന് പുറത്തായതോടെയാണ് 76 റൺസിന്റെ തോൽവി വഴങ്ങിയത്. പവർപ്ലേയിൽ തന്നെ മുൻനിര വിക്കറ്റുകൾ നഷ്ടമായ ഇന്ത്യക്ക് പിന്നീട് മത്സരത്തിലേക്ക് തിരിച്ചുവരാൻ സാധിച്ചില്ല. ദക്ഷിണാഫ്രിക്കൻ ബൗളർമാരുടെ കൃത്യതയാർന്ന ബൗളിംഗ് മത്സരത്തിന്റെ നിർണ്ണായക ഘട്ടങ്ങളിൽ ഇന്ത്യയെ വരിഞ്ഞുമുറുക്കി.
