അണ്ടര്‍-19 ഏഷ്യാ കപ്പിൽ ഞായറാഴ്ച നടന്ന ആവേശകരമായ മത്സരത്തിൽ ഇന്ത്യയെ വീഴ്ത്തി പാകിസ്ഥാൻ ടീം മിന്നുന്ന വിജയം സ്വന്തമാക്കി. വിക്കറ്റ് കീപ്പർ ബാറ്റർ ഹംസ സഹൂറിന്റെ തകർപ്പൻ പുറത്താകാതെയുള്ള സെഞ്ചുറിയാണ് പാകിസ്ഥാന് ജയമൊരുക്കിയത്. ടീം 61 റൺസിന് 5 വിക്കറ്റ് എന്ന നിലയിൽ തകർച്ച നേരിടുമ്പോഴാണ് ഹംസ ക്രീസിലെത്തുന്നത്.
അവസാന നിമിഷം വരെ ക്രീസിൽ നിലയുറപ്പിച്ച ഹംസ, 209 റൺസ് എന്ന വിജയലക്ഷ്യം പിന്തുടർന്ന പാകിസ്ഥാനെ വിജയതീരത്ത് എത്തിക്കുകയായിരുന്നു. വിജയബൗണ്ടറിയോടെ സെഞ്ചുറി തികച്ചതിന് പിന്നാലെ ഹംസയും പാകിസ്ഥാൻ ക്യാമ്പും വിജയം ആഘോഷമാക്കി. ഈ ആഹ്ലാദപ്രകടനത്തിനിടെ താൻ കയ്യിൽ സൂക്ഷിച്ചിരുന്ന ഒരു കുറിപ്പ് ഹംസ ഉയർത്തിക്കാട്ടി.
‘നാളത്തെ മത്സരത്തിൽ 50 റൺസ് ഇൻഷാ അള്ളാ, ഹംസ സഹൂർ, ഞാനാണ് മികച്ചവൻ’ എന്നായിരുന്നു ആ കുറിപ്പിൽ എഴുതിയിരുന്നത്. സ്വന്തം കഴിവിലുള്ള വിശ്വാസം കളിക്കളത്തിൽ പുറത്തെടുത്ത ഹംസ, കുറിപ്പിൽ എഴുതിയതിന്റെ ഇരട്ടി റൺസാണ് മത്സരത്തിൽ അടിച്ചുകൂട്ടിയത്. 54 പന്തിൽ അർദ്ധസെഞ്ചുറി തികച്ച താരം, ടീമിന് വിജയമൊരുക്കിയ ബൗണ്ടറിയിലൂടെ തന്നെയാണ് തന്റെ സെഞ്ചുറിയും തികച്ചത്.
ഇന്ത്യൻ നിരയിൽ അർജുൻ രാജ്പുത് നേടിയ തകർപ്പൻ സെഞ്ചുറിയുടെ (107) തിളക്കമാണ് ഹംസയുടെ പ്രകടനത്തോടെ മങ്ങിയത്. 209 റൺസ് വിജയലക്ഷ്യവുമായി ഇറങ്ങിയ നിലവിലെ ചാമ്പ്യന്മാരായ പാകിസ്ഥാൻ 11 പന്തുകൾ ബാക്കിനിൽക്കെ വിജയം കണ്ടു. 49-ാം ഓവറിൽ എക്സ്ട്രാ കവറിലൂടെ ബൗണ്ടറി പായിച്ച് ഹംസ 108 പന്തിൽ 100 റൺസോടെ പുറത്താകാതെ നിന്ന് പാകിസ്ഥാന്റെ വിജയം കുറിക്കുകയായിരുന്നു.
നേരത്തെ ടോസ് നേടി ബാറ്റിംഗ് തിരഞ്ഞെടുത്ത ഇന്ത്യയെ പാകിസ്ഥാൻ പേസർമാർ തുടക്കത്തിലേ പ്രതിരോധത്തിലാക്കി. ക്യാപ്റ്റൻ ലക്ഷ്യ റായ്ചന്ദാനി (0), ആര്യവീർ സെവാഗ് (22), വി.കെ വിനീത് (8), യഷ്ബർധൻ ചൗഹാൻ (1) എന്നിവർ വേഗത്തിൽ പുറത്തായതോടെ 16.4 ഓവറിൽ 42 റൺസിന് 4 വിക്കറ്റ് എന്ന നിലയിലേക്ക് ഇന്ത്യ തകർന്നു.
തുടർന്ന് പഞ്ചാബിലെ ജലന്ധറിൽ നിന്നുള്ള അർജുൻ രാജ്പുത് ഇന്നിംഗ്സിന്റെ ഉത്തരവാദിത്തം ഏറ്റെടുത്തു. 85 പന്തിൽ 11 ഫോറുകളും 5 സിക്സറുകളും അടങ്ങുന്നതായിരുന്നു രാജ്പുതിന്റെ പ്രകടനം. വിക്കറ്റ് കീപ്പർ അൻവയ് ദ്രാവിഡിനൊപ്പം (10) 44 റൺസും, മനാൽ ചൗഹാനൊപ്പം (11) 64 റൺസും കൂട്ടിച്ചേർക്കാൻ രാജ്പുതിന് കഴിഞ്ഞു. ഈ കൂട്ടുകെട്ടുകളിലെ ഭൂരിഭാഗം റൺസും രാജ്പുതാണ് സ്കോർ ചെയ്തത്.
എന്നാൽ 36-ാം ഓവറിൽ 170 റൺസിൽ നിൽക്കെ രാജ്പുത് പുറത്തായതോടെ ഇന്ത്യ വീണ്ടും തകർച്ചയിലായി. യഷ്വീർ ഗൗഡ് (4), മോഹിത് ഉൾവ (7) എന്നിവർ വേഗത്തിൽ മടങ്ങിയതോടെ ഇന്ത്യ 195/9 എന്ന നിലയിലായി. തുടർന്ന് കാവ്യ പട്ടേലും (23) ഇഷാൻ സൂദും (2 നോട്ട് ഔട്ട്) ചേർന്ന് അവസാന വിക്കറ്റിൽ കൂട്ടിച്ചേർത്ത 13 റൺസാണ് ഇന്ത്യയെ 46.3 ഓവറിൽ 208 റൺസിൽ എത്തിച്ചത്.
കുറഞ്ഞ സ്കോർ പ്രതിരോധിക്കാനിറങ്ങിയ ഇന്ത്യൻ ബൗളർമാർ ശക്തമായി തിരിച്ചടിച്ചു. ഇഷാൻ സൂദും മോഹിത് ഉൾവയും ചേർന്ന് പാകിസ്ഥാൻ ഓപ്പണർമാരെ പുറത്താക്കിയപ്പോൾ, മനാൽ ചൗഹാൻ അബ്ദുൾ ഖാദിറിനെയും അഹമ്മദ് ഹുസൈനെയും പുറത്താക്കി. കാവ്യ പട്ടേൽ നായകൻ ഫർഹാൻ യൂസഫിനെയും മടക്കിയതോടെ 14.4 ഓവറിൽ 61 റൺസിന് 5 വിക്കറ്റ് എന്ന നിലയിൽ പാകിസ്ഥാൻ തകർന്നു.
തുടർന്ന് ഹംസ സഹൂർ ആക്രമിച്ചു കളിക്കാൻ തുടങ്ങി. കാവ്യ പട്ടേൽ, മോഹിത് ഉൾവ, യഷ്വീർ ഗൗഡ് എന്നിവർക്കെതിരെ ഹംസ സിക്സറുകൾ പറത്തിയപ്പോൾ മറുതലയ്ക്കൽ ഹസ്നൈൻ അബ്ബാസ് ദാർ പിന്തുണ നൽകി. ആറാം വിക്കറ്റിൽ ഇരുവരും ചേർന്ന് കൂട്ടിച്ചേർത്ത 107 റൺസ് മത്സരം പാകിസ്ഥാന് അനുകൂലമാക്കി.
എന്നാൽ തന്റെ അവസാന ഓവറിൽ ഹസ്നൈൻ ദാറിനെ (38) പുറത്താക്കി മനാൽ ചൗഹാൻ (3-32) ഇന്ത്യക്ക് വീണ്ടും പ്രതീക്ഷ നൽകി. തൊട്ടുപിന്നാലെ സയ്യമിനെ ഉൾവ കൂടി പുറത്താക്കിയതോടെ 3 വിക്കറ്റുകൾ ബാക്കിനിൽക്കെ പാകിസ്ഥാന് ജയിക്കാൻ 26 റൺസ് കൂടി വേണമെന്ന അവസ്ഥയായി.
എന്നാൽ സമ്മർദ്ദത്തിന് വഴങ്ങാതെ ഒൻപതാം നമ്പറിലിറങ്ങിയ നിഖാബ് ഷഫീഖിന് വിക്കറ്റ് നഷ്ടപ്പെടാതെ കാത്ത ഹംസ, അവസരം കിട്ടിയപ്പോഴൊക്കെ ബൗണ്ടറികൾ നേടി പാകിസ്ഥാനെ വിജയത്തിലെത്തിച്ചു. ഓപ്പണർ ഉസ്മാൻ ഖാന്റെ രണ്ട് ക്യാച്ചുകൾ തുടക്കത്തിൽ കൈവിട്ടതും 48-ാം ഓവറിൽ ഇഷാൻ സൂദ് രണ്ട് വൈഡുകൾ വഴങ്ങിയതും ഇന്ത്യക്ക് തിരിച്ചടിയായി.
