Health

ബൈക്ക് ടാക്സി ; പല തലകളിൽ കയറിയിറങ്ങുന്ന ഹെൽമറ്റുകൾ സുരക്ഷിതമാണോ? നൂറുകണക്കിന് ബാക്ടീരിയകളും ഫംഗസുകളും!

തിരക്കേറിയ നഗരവീഥികളിലൂടെയുള്ള ഹ്രസ്വദൂര യാത്രകൾക്ക് ബൈക്ക് ടാക്സികൾ ഇന്ന് വളരെ സൗകര്യപ്രദമായ ഒരു മാർഗമായി മാറിയിട്ടുണ്ട്. എന്നാൽ ഒന്നോ രണ്ടോ മിനിറ്റിനുള്ളിൽ ബൈക്ക് ടാക്സി ബുക്ക് ചെയ്യാൻ കഴിയുമെങ്കിലും, യാത്രയ്ക്കിടെ പലരും ശ്രദ്ധിക്കാതെ പോകുന്ന ഒരു കാര്യമുണ്ട്; അത് യാത്രക്കാർക്ക് നൽകുന്ന ഹെൽമറ്റാണ്. സ്വന്തം ഹെൽമറ്റ് ഒരാൾ മാത്രമാണ് ഉപയോഗിക്കുന്നതും വൃത്തിയാക്കുന്നതും. എന്നാൽ ബൈക്ക് ടാക്സികളിൽ നൽകുന്ന ഹെൽമറ്റുകൾ ഒരു ദിവസം തന്നെ പല ആളുകളാണ് ഉപയോഗിക്കുന്നത്.

ഹെൽമറ്റിന്റെ ഉൾഭാഗം യാത്രക്കാരന്റെ തലയുമായും പ്രത്യേകിച്ച് നെറ്റിയുമായും മുഖവുമായും നേരിട്ട് സമ്പർക്കത്തിൽ വരുന്നു. പലപ്പോഴും ഇതിൽ വിയർപ്പും എണ്ണമയവും അഴുക്കും പറ്റിപ്പിടിച്ചിരിക്കും. കൃത്യമായ ശുചീകരണമില്ലാതെ ഹെൽമറ്റ് വീണ്ടും വീണ്ടും ഉപയോഗിക്കുന്നത് അതിൽ ബാക്ടീരിയകളും ഫംഗസുകളും വളരുന്നതിന് കാരണമാകും.

2021-ൽ ‘മൈക്രോഓർഗാനിസംസ്’ എന്ന ജേണലിൽ പ്രസിദ്ധീകരിച്ച, നേപ്പാളിലെ മോട്ടോർ സൈക്കിൾ യാത്രക്കാർ ഉപയോഗിക്കുന്ന 130 ഹെൽമറ്റുകളെക്കുറിച്ചുള്ള പഠനത്തിൽ ഇവയിൽ ബാക്ടീരിയകളുടെയും ഫംഗസുകളുടെയും സാന്നിധ്യം കണ്ടെത്തിയിരുന്നു. ആകെ 392 ബാക്ടീരിയകളെയും 346 ഫംഗസുകളെയുമാണ് കണ്ടെത്തിയത്. മാത്രമല്ല, സ്വന്തം ഹെൽമറ്റുകളെ അപേക്ഷിച്ച് പൊതുവായി ഉപയോഗിക്കുന്ന ഹെൽമറ്റുകളിൽ സൂക്ഷ്മാണുക്കളുടെ പ്രവർത്തനം കൂടുതലാണെന്നും വ്യക്തമായി. പതിവായി വൃത്തിയാക്കുന്ന ഹെൽമറ്റുകളേക്കാൾ കൂടുതൽ ബാക്ടീരിയകളും ഫംഗസുകളും കഴുകാത്തതും വൃത്തിയാക്കാത്തതുമായ ഹെൽമറ്റുകളിലാണ് ഉള്ളത്.

ഹെൽമറ്റുകൾ വൃത്തിയാക്കേണ്ടത് അത്യാവശ്യമാണെന്ന് ഇത് തെളിയിക്കുന്നു. എങ്കിലും, ഹെൽമറ്റിന്റെ ഉപരിതലത്തിൽ സൂക്ഷ്മാണുക്കൾ ഉണ്ടെന്നതുകൊണ്ട് മാത്രം അത് ഉപയോഗിക്കുമ്പോൾ അണുബാധ ഉണ്ടാകണമെന്നില്ല. ഇതിന് പിന്നിൽ മറ്റ് പല ഘടകങ്ങളും പ്രവർത്തിക്കുന്നുണ്ട്.

അഴുക്കുള്ളതോ നനഞ്ഞതോ കൃത്യമായി പരിപാലിക്കാത്തതോ ആയ ഹെൽമറ്റുകൾ പതിവായി ഉപയോഗിക്കുന്നത് നിലവിലുള്ള തലയോട്ടിയിലെയോ ചർമ്മത്തിലെയോ പ്രശ്നങ്ങൾ കൂടുതൽ വഷളാകാനുള്ള സാധ്യത വർദ്ധിപ്പിക്കും. വൃത്തിയില്ലാത്ത പ്രതലങ്ങളിലൂടെ സൂക്ഷ്മാണുക്കൾ പകരാനും സാധ്യതയുണ്ട്. തലയോട്ടിയിലെ രോഗങ്ങൾ, ചർമ്മത്തിലെ അണുബാധകൾ, അല്ലെങ്കിൽ പ്രതിരോധശേഷി കുറഞ്ഞ ചർമ്മം എന്നിവയുള്ളവർക്ക് ഈ പ്രശ്നം കൂടുതൽ ഗുരുതരമായേക്കാം. എങ്കിലും, പൊതുവായി ഉപയോഗിക്കുന്ന ഹെൽമറ്റുകൾ യാത്രക്കാരിൽ എത്രത്തോളം അണുബാധകൾക്ക് കാരണമാകുന്നു എന്നതിനെക്കുറിച്ച് കൃത്യമായ പഠനങ്ങൾ കുറവാണ്. അതിനാൽ, ഹെൽമറ്റ് ധരിക്കാതിരിക്കാനുള്ള ഒരു കാരണമായി ഇതിനെ കാണുന്നതിന് പകരം, എളുപ്പത്തിൽ പ്രതിരോധിക്കാൻ കഴിയുന്ന ഒരു ശുചിത്വ പ്രശ്നമായി വേണം ഇതിനെ കാണാൻ.

നിങ്ങൾ പതിവായി ബൈക്ക് ടാക്സി ഉപയോഗിക്കുന്ന ആളാണെങ്കിൽ കഴിയുന്നതും സ്വന്തമായി ഒരു ഹെൽമറ്റ് കരുതുന്നതാണ് നല്ലത്. അതിന് കഴിയില്ലെങ്കിൽ ചില ലളിതമായ മുൻകരുതലുകൾ എടുക്കാവുന്നതാണ്:

  • ധരിക്കാൻ പോകുന്ന ഹെൽമറ്റ് അഴുക്കുള്ളതോ നനഞ്ഞതോ ദുർഗന്ധമുള്ളതോ അല്ലെന്നും അതിന്റെ ഉൾഭാഗത്തിന് കേടുപാടുകൾ ഇല്ലെന്നും ഉറപ്പുവരുത്തുക.
  • ഹെൽമറ്റിന്റെ കൃത്യമായ അളവിനെയും സുരക്ഷയെയും ബാധിക്കാത്ത രീതിയിൽ, വൃത്തിയുള്ള ഒരു തുണിയോ തൊപ്പിയോ തലയിൽ ധരിച്ച ശേഷം ഹെൽമറ്റ് ഉപയോഗിക്കുക.
  • ഉൾഭാഗത്തെ പാഡിംഗ് നന്നായി കഴുകി ഉണക്കാതെ സ്വന്തം ഹെൽമറ്റുകൾ മറ്റുള്ളവർക്ക് ഉപയോഗിക്കാൻ നൽകരുത്.
  • നൽകുന്ന ഹെൽമറ്റ് അഴുക്കുള്ളതോ നനഞ്ഞതോ ആണെങ്കിൽ, വൃത്തിയായി സൂക്ഷിച്ചിട്ടുള്ള മറ്റൊരു ഹെൽമറ്റ് ആവശ്യപ്പെടുക.
  • സുരക്ഷാ കവചങ്ങൾക്ക് കേടുപാടുകൾ വരാത്ത രീതിയിൽ, നിർമ്മാതാക്കളുടെ നിർദ്ദേശങ്ങൾക്കനുസരിച്ച് ഹെൽമറ്റുകൾ കൃത്യമായ ഇടവേളകളിൽ അണുവിമുക്തമാക്കാൻ ബൈക്ക് ടാക്സി ഡ്രൈവർമാർ ശ്രദ്ധിക്കണം.
  • ബാക്ടീരിയകൾ വളരാനുള്ള സാധ്യതയുള്ളതിനാൽ ഓരോ ഉപയോഗത്തിന് ശേഷവും ഹെൽമറ്റുകൾ നന്നായി ഉണങ്ങിയെന്ന് ഉറപ്പുവരുത്തണം.

ശുചിത്വത്തിന് വേണ്ടി റോഡ് സുരക്ഷയിൽ വിട്ടുവീഴ്ച ചെയ്യാൻ പാടില്ല എന്ന കാര്യം പ്രത്യേകം ഓർക്കണം. ഹെൽമറ്റ് തലയ്ക്ക് കൃത്യമായി പാകമാകുന്നതും സുരക്ഷാ മാനദണ്ഡങ്ങൾ പാലിച്ച് കൃത്യമായി ലോക്ക് ചെയ്തതുമായിരിക്കണം. ശരിയായ രീതിയിൽ ഹെൽമറ്റ് ധരിക്കുന്നത് ജീവൻ രക്ഷിക്കാനുള്ള സാധ്യത ആറിരട്ടിയിലധികം വർദ്ധിപ്പിക്കുമെന്നും തലച്ചോറിനേൽക്കുന്ന പരിക്കുകളുടെ സാധ്യത 74 ശതമാനം വരെ കുറയ്ക്കുമെന്നും ലോകാരോഗ്യ സംഘടന വ്യക്തമാക്കുന്നു.

മൊബൈൽ ആപ്പുകൾ വഴിയുള്ള ഇത്തരം യാത്രാസൗകര്യങ്ങൾ നഗരജീവിതത്തിന്റെ ഭാഗമായി മാറിക്കൊണ്ടിരിക്കുന്ന സാഹചര്യത്തിൽ, ഹെൽമറ്റ് ശുചിത്വത്തിന് സേവനദാതാക്കളും യാത്രക്കാരും ഒരുപോലെ പ്രാധാന്യം നൽകേണ്ടതുണ്ട്. ബൈക്ക് ടാക്സികളുടെ ഉപയോഗം തടയുകയോ സുരക്ഷാ ഉപകരണങ്ങളുടെ ഗുണനിലവാരം കുറയ്ക്കുകയോ അല്ല ഇതിന്റെ ലക്ഷ്യം. മറിച്ച്, റോഡ് സുരക്ഷയും വ്യക്തിശുചിത്വവും പരസ്പരം ബന്ധപ്പെട്ടിരിക്കുന്നു എന്ന് തിരിച്ചറിഞ്ഞുകൊണ്ട് യാത്രകൾ കൂടുതൽ സുരക്ഷിതമാക്കുക എന്നതാണ്.