രാമായണം വാർത്തകളിൽ നിറയുമ്പോൾ, ശ്രീരാമന്റെ കഥാപാത്രത്തിനായുള്ള രൺബീർ കപൂറിന്റെ തയാറെടുപ്പുകളും ഏറെ ശ്രദ്ധ നേടിയിട്ടുണ്ട്. ചിത്രത്തിലെ വേഷത്തിനായി നടൻ മദ്യപാനവും പുകവലിയും ഉപേക്ഷിക്കുകയും പൂർണ്ണമായും സസ്യാഹാരത്തിലേക്ക് മാറുകയും ചെയ്തതായി റിപ്പോർട്ടുകളുണ്ട്. അദ്ദേഹം സാത്വിക ഭക്ഷണരീതി പിന്തുടരാൻ തുടങ്ങിയത് അദ്ദേഹത്തിന്റെ ഭക്ഷണക്രമത്തെക്കുറിച്ച് അറിയാൻ ആരാധകരിൽ വലിയ ആകാംക്ഷ ഉണ്ടാക്കിയിട്ടുണ്ട്.
എന്നാൽ രൺബീറിന്റെ ദൈനംദിന ഭക്ഷണശീലങ്ങൾ ആളുകൾ കരുതുന്നത് പോലെ അത്ര കണിശതയുള്ളതല്ല. വീട്ടിലുണ്ടാക്കുന്ന ഭക്ഷണത്തിനോടുള്ള താൽപ്പര്യം, രാവിലത്തെ ഭക്ഷണരീതിയിലുള്ള മാറ്റങ്ങൾ, മധുരത്തോടുള്ള കൗതുകം, ഭക്ഷണത്തിൽ വരുത്തുന്ന ചില ഇളവുകൾ എന്നിവയെക്കുറിച്ച് അടുത്തിടെ പിങ്ക് വില്ലയ്ക്ക് നൽകിയ അഭിമുഖത്തിൽ അദ്ദേഹം സംസാരിച്ചിരുന്നു.
നിതേഷ് തിവാരി സംവിധാനം ചെയ്ത രാമായണത്തിൽ ശ്രീരാമനായി അഭിനയിക്കുന്നതിനായി രൺബീർ മദ്യപാനവും പുകവലിയും ഉപേക്ഷിക്കുകയും സസ്യാഹാരം ശീലിക്കുകയും ചെയ്തതായി നിരവധി മാധ്യമങ്ങൾ റിപ്പോർട്ട് ചെയ്യുന്നു. പുലർച്ചെയുള്ള വർക്കൗട്ടുകൾക്കും ധ്യാനത്തിനുമൊപ്പം അദ്ദേഹം സാത്വിക ഭക്ഷണക്രമവും പിന്തുടരുന്നുണ്ട്.
കഴിഞ്ഞ വർഷം പാപ്പരാസി ഹാൻഡ്‌ലായ വിറൽ ഭയാനിയും ഈ കഥാപാത്രത്തിനായി നടൻ സസ്യാഹാരിയായി മാറിയതിനെക്കുറിച്ചും മദ്യം ഉപേക്ഷിച്ചതിനെക്കുറിച്ചും പോസ്റ്റ് പങ്കുവെച്ചിരുന്നു. 40 വയസ്സ് തികഞ്ഞതിനും അച്ഛനായതിനും ശേഷം ആരോഗ്യത്തിൽ കൂടുതൽ ശ്രദ്ധ കേന്ദ്രീകരിക്കുന്നതിന്റെ ഭാഗം കൂടിയാണ് ഈ ജീവിതശൈലി മാറ്റങ്ങൾ.
99 ശതമാനവും കഴിക്കുന്നത് വീട്ടിലെ ഭക്ഷണം
ചെയ്യുന്ന കഥാപാത്രത്തിനനുസരിച്ചാണ് തന്റെ ഭക്ഷണരീതി മാറാറുള്ളതെന്ന് രൺബീർ പറയുന്നു. ഒരു വേഷത്തിനായി പ്രത്യേക രീതിയിൽ ശരീരം രൂപപ്പെടുത്തുമ്പോൾ ഭക്ഷണത്തിൽ മാറ്റം വരുത്തേണ്ടി വരാറുണ്ട്. എങ്കിലും വീട്ടിലുണ്ടാക്കുന്ന ഭക്ഷണമാണ് താൻ എപ്പോഴും കഴിക്കാറുള്ളത്.
താൻ “99 ശതമാനവും വീട്ടിലെ ഭക്ഷണമാണ് കഴിക്കാൻ ശ്രമിക്കാറുള്ളത്” എന്ന് രൺബീർ വ്യക്തമാക്കുന്നു.
രാവിലെ ഭക്ഷണം കഴിക്കാൻ ഏറെ ഇഷ്ടപ്പെടുന്ന ആളാണ് താനെന്നും അദ്ദേഹം പറഞ്ഞു. എങ്കിലും ദിവസവും രാവിലെ കഴിക്കുന്ന ആഹാരത്തിൽ മാറ്റങ്ങൾ വരാറുണ്ട്. ചില ദിവസങ്ങളിൽ പോഹയാണെങ്കിൽ മറ്റ് ചില ദിവസങ്ങളിൽ പ്രോട്ടീൻ ഷേക്കായിരിക്കും കഴിക്കുക. ചിലപ്പോൾ രാവിലത്തെ ഭക്ഷണം ഒഴിവാക്കാറുമുണ്ട്.
സിനിമയിലെ വേഷങ്ങൾക്കായി ചില ഭക്ഷണങ്ങൾ വേണ്ടെന്നുവെക്കാറുണ്ടെങ്കിലും മധുരപലഹാരങ്ങൾ കഴിക്കുന്നത് രൺബീർ പൂർണ്ണമായി നിർത്തിയിട്ടില്ല.
എല്ലാ രാത്രിയിലും ഒരു കഷണം ചോക്ലേറ്റ് കഴിക്കാൻ തനിക്ക് ഇഷ്ടമാണെന്ന് അദ്ദേഹം പിങ്ക് വില്ലയോട് പറഞ്ഞു. ഡാർക്ക് ചോക്ലേറ്റാണോ ഇഷ്ടമെന്ന് ചോദിച്ചാൽ അല്ലെന്നാണ് ഉത്തരം, മിൽക്ക് ചോക്ലേറ്റാണ് അദ്ദേഹത്തിന് കൂടുതൽ പ്രിയം.
ചീസ് കേക്കാണ് മറ്റൊരു പ്രിയപ്പെട്ട മധുരം. തന്റെ ഡയറ്റ് തെറ്റിക്കാൻ പോലും മടിയില്ലാത്ത ഒരു വിഭവമാണ് ചീസ് കേക്കെന്ന് അദ്ദേഹം സമ്മതിക്കുന്നു.
സാധാരണയായി വീട്ടിലെ ഭക്ഷണം കഴിക്കാനാണ് രൺബീറിന് ഇഷ്ടമെങ്കിലും ചിലപ്പോഴൊക്കെ ഇഷ്ടമുള്ള മറ്റു ഭക്ഷണങ്ങളും കഴിക്കാറുണ്ട്. ഡയറ്റിൽ ഇളവ് വരുത്തുന്ന ദിവസങ്ങളിൽ പിസ്സയോ ചൈനീസ് ഭക്ഷണങ്ങളോ ആണ് അദ്ദേഹം ഓർഡർ ചെയ്യാറുള്ളത്.
ഐസ് ബാത്തും സാവൂനയും ഉൾപ്പെടുന്ന ഫിറ്റ്നസ് രീതികൾ
ഭക്ഷണം മാത്രമല്ല രൺബീറിന്റെ ഇപ്പോഴത്തെ ആരോഗ്യ സംരക്ഷണത്തിന്റെ ഭാഗം. ഫിറ്റ്നസ്, വീണ്ടെടുക്കൽ (recovery), മൊത്തത്തിലുള്ള ആരോഗ്യം എന്നിവയിൽ തനിക്ക് താൽപ്പര്യം കൂടിയിട്ടുണ്ടെന്ന് അദ്ദേഹം പറഞ്ഞു. ഐസ് ബാത്ത്, സാവൂന, ഓക്സിജൻ ചേംബർ ഉപയോഗിച്ചുള്ള ഹൈപ്പർബാറിക് ഓക്സിജൻ തെറാപ്പി (HBOT), റെഡ് ലൈറ്റ് തെറാപ്പി എന്നിവ അദ്ദേഹത്തിന്റെ ഫിറ്റ്നസ് രീതിയിൽ ഉൾപ്പെടുന്നു.
ഒന്നര വർഷത്തോളം റൊട്ടി കഴിക്കാതെ രൺബീർ
നടന്റെ മുൻകാല അഭിമുഖങ്ങളിൽ ഒന്നിൽ നിന്ന് ലഭിച്ച മറ്റൊരു രസകരമായ വിവരമുണ്ട്. 2022-ൽ ആജ് തക്കിന് നൽകിയ അഭിമുഖത്തിൽ, രൺബീർ ഒന്നര വർഷത്തോളം റൊട്ടി കഴിക്കാതെ ഇരുന്നിട്ടുണ്ടെന്ന് അദ്ദേഹത്തിന്റെ ഫിറ്റ്നസ് ട്രെയിനറായ ശിവോഹം വെളിപ്പെടുത്തിയിരുന്നു.
