സംഗീതസംവിധായകൻ അനിരുദ്ധ് രവിചന്ദറും സൺറൈസേഴ്സ് ഹൈദരാബാദ് സഹഉടമ കാവ്യ മാരനും വിവാഹിതരായി. ഗ്രീസിൽ നടന്ന ആഡംബരപൂർണവും താരനിബിഡവുമായ ചടങ്ങിലാണ് ഇരുവരും ഒന്നിച്ചത്. വിവാഹത്തിന് പിന്നാലെ അനിരുദ്ധ് സമൂഹമാധ്യമത്തിലൂടെ പങ്കുവച്ച ചിത്രങ്ങൾ ഇതിനോടകം തന്നെ വലിയ ശ്രദ്ധ നേടിയിട്ടുണ്ട്.
വിവാഹച്ചടങ്ങിൽ പാരമ്പര്യത്തിന്റെയും അത്യാധുനിക ഫാഷന്റെയും മനോഹരമായ സമന്വയമായിരുന്നു ഇരുവരുടെയും വസ്ത്രധാരണം. പ്രധാന ചടങ്ങിൽ കാവ്യ മാരൻ അണിഞ്ഞത് ഒരു സ്വപ്നതുല്യമായ ഷാംപെയ്ൻ/ബ്ലഷ്-പിങ്ക് കളർ ലെഹങ്കയായിരുന്നു. ഷീർ ഓർഗൻസയും നെറ്റും ചേർത്തു തയ്ച്ച മെർമെയ്ഡ് ശൈലിയിലുള്ള ഈ വസ്ത്രത്തിൽ ത്രെഡ് വർക്കുകൾ, സീക്വിൻസുകൾ, ഫ്ലോറൽ എംബ്രോയ്ഡറി, ക്രിസ്റ്റൽ ബീഡ് ഡിസൈനുകൾ എന്നിവ തിങ്ങിനിറഞ്ഞിരുന്നു. സ്കൂപ്പ് നെക്ക് ലൈനും കാപ് സ്ലീവുകളുമുള്ള ഈ വസ്ത്രത്തിനൊപ്പം ഡയമണ്ട്-പേൾ ചോക്കറും ചെറിയ കമ്മലുകളും നേർത്ത ബ്രേസ്ലെറ്റും ധരിച്ച് മിനിമൽ ലുക്കിലാണ് കാവ്യ പ്രത്യക്ഷപ്പെട്ടത്. ഇതിന് അനുയോജ്യമായി അനിരുദ്ധ് അണിഞ്ഞത് ഒരു റോയൽ ഇന്തോ-വെസ്റ്റേൺ ഔട്ട്ഫിറ്റായിരുന്നു. വെർട്ടിക്കൽ തുന്നലുകളും മെറ്റാലിക് എംബ്രോയ്ഡറിയുമുള്ള ഷാംപെയ്ൻ ഗോൾഡ് ബന്ദ്ഗള ജാക്കറ്റും സിൽക്ക് കുർത്തയും ഇതിന്റെ ഭാഗമായിരുന്നു. സ്വർണ്ണക്കരയുള്ള കമർബന്ദ് ചുറ്റിയ പാരമ്പര്യ പട്ട് വേഷ്ടിയും ചേരുന്ന ബീജ് ജൂത്തികളും നേർത്ത പെൻഡന്റ് ചെയിനും അനിരുദ്ധിന്റെ ലുക്കിന് പൂർണത നൽകി.
വിവാഹചിത്രങ്ങൾക്ക് പിന്നാലെ സ്നേഹത്തിന്റെ ഇമോജിയോടൊപ്പം കാവ്യയോടൊപ്പമുള്ള മറ്റ് ചില ചിത്രങ്ങളും അനിരുദ്ധ് പങ്കുവെച്ചു. ബൊഹീമിയൻ റിസോർട്ട് തീമിലുള്ള ആഘോഷചടങ്ങിൽ തികച്ചും വ്യത്യസ്തവും കണ്ടംപററിയുമായ വസ്ത്രധാരണമാണ് ഇരുവരും തിരഞ്ഞെടുത്തത്. എർത്ത് ടോണിലുള്ള ചോക്ലേറ്റ് ബ്രൗൺ ഹാൽട്ടർനെക് ബോഡീസിലുള്ള അനായാസ സുന്ദരമായ ഗൗണിലാണ് കാവ്യയെ കണ്ടത്. ത്രെഡ് വർക്കുകളും ക്രിസ്റ്റൽ എംബ്രോയ്ഡറികളും നിറഞ്ഞ ഇതിന്റെ മാക്സി സ്കിർട്ടിലെ ടാസൽ പാനലുകളും ബീഡ് ഡ്രോപ്പുകളും മനോഹരമായ ലെയർ ലുക്ക് നൽകി. വുഡൻ വളകളും നീളമുള്ള കമ്മലുകളും ധരിച്ച് ട്രെൻഡി ബൊഹീമിയൻ ലുക്കിലാണ് കാവ്യ ചിത്രത്തിലുള്ളത്.
അതേസമയം, തന്റെ സവിശേഷമായ സംഗീത ലോകത്തെ പ്രതിഫലിപ്പിക്കുന്ന ട്രോപ്പിക്കൽ സുവനീർ സ്റ്റൈൽ ജാക്കറ്റാണ് അനിരുദ്ധ് ഈ ലുക്കിനായി തിരഞ്ഞെടുത്തത്. തെങ്ങുകൾ, അസ്തമയം, തിരമാലകൾ എന്നിവ തുന്നിച്ചേർത്ത ഒരു സ്റ്റേറ്റ്മെന്റ് ജാക്കറ്റായിരുന്നു ഇത്. ഉള്ളിൽ എർത്ത്-ടോൺ ബ്രൗൺ സിൽക്ക് ഷർട്ടിന്റെ ബട്ടണുകൾ തുറന്നിട്ട്, താഴെ അയഞ്ഞ ഫിറ്റിലുള്ള ധോത്തി ട്രൗസറേഴ്സും ധരിച്ചാണ് അദ്ദേഹം എത്തിയത്. ഗോൾഡ് ഷേഡുള്ള സൺഗ്ലാസും അണിഞ്ഞ് തികച്ചും വ്യത്യസ്തമായ ഒരു കാഷ്വൽ ലുക്കിലാണ് അനിരുദ്ധ് പ്രത്യക്ഷപ്പെട്ടത്.
