മലിനമായ പച്ചപ്പാൽ കുടിച്ചതിനെത്തുടർന്ന് ബ്രൂസെല്ലോസിസ് (Brucellosis) എന്ന ബാക്ടീരിയ ബാധ പിടിപെട്ട് 33-കാരന് ഹൃദയസ്തംഭനമുണ്ടായി. ഏകദേശം 20 ദിവസത്തോളം നീണ്ടുനിന്ന പനിക്ക് ശേഷമാണ് ഈ അണുബാധ യുവാവിന്റെ ഹൃദയത്തെ ബാധിച്ചത്. വർഷങ്ങളായി സ്ഥിരമായി പച്ച എരുമപ്പാൽ കുടിക്കുകയും അസിഡിറ്റിക്കായി ആന്റാസിഡ് ഗുളികകൾ കഴിക്കുകയും ചെയ്തിരുന്നയാളാണ് ഇദ്ദേഹം. ഇതാണ് ഇത്രയും ഗുരുതരമായ ആരോഗ്യപ്രശ്നത്തിന് കാരണമായതെന്നാണ് വിദഗ്ധർ ചൂണ്ടിക്കാണിക്കുന്നത്.
ബ്രൂസെല്ല ബാക്ടീരിയ മൂലമുണ്ടാകുന്ന ഒരു അണുബാധയാണ് ബ്രൂസെല്ലോസിസ്. രോഗബാധിതരായ മൃഗങ്ങളുമായുള്ള സമ്പർക്കത്തിലൂടെയോ അല്ലെങ്കിൽ തിളപ്പിക്കാത്ത പാൽ, പാൽ ഉൽപന്നങ്ങൾ എന്നിവ കഴിക്കുന്നതിലൂടെയോ ആണ് മനുഷ്യരിലേക്ക് ഇത് പകരുന്നത്. പനി, അമിതമായ വേർപ്പ്, ക്ഷീണം, തലവേദന, പേശികളിലും സന്ധികളിലും ഉണ്ടാകുന്ന വേദന എന്നിവയാണ് പ്രധാന ലക്ഷണങ്ങൾ. ചില അപൂർവ്വ സാഹചര്യങ്ങളിൽ ഇത് ശരീരത്തിലെ മറ്റ് അവയവങ്ങളെയും ഹൃദയത്തെയും ബാധിക്കാം. ഈ യുവാവിന്റെ കാര്യത്തിൽ, ബാക്ടീരിയ ഹൃദയത്തിലെത്തി ഉള്ളിലെ പാളികളെയും വാൽവുകളെയും ബാധിക്കുന്ന ‘ഇൻഫെക്റ്റീവ് എൻഡോകാർഡൈറ്റിസ്’ ഉണ്ടാക്കുകയും തുടർന്ന് ഹൃദയസ്തംഭനത്തിലേക്ക് നയിക്കുകയുമായിരുന്നു.
മൃഗങ്ങളിൽ നിന്ന് മനുഷ്യരിലേക്ക് പടരുന്ന രോഗമാണിത്. പശു, ആട്, എരുമ തുടങ്ങിയ വളർത്തുമൃഗങ്ങളിൽ ഈ ബാക്ടീരിയ ഉണ്ടാകാം. പാലിലെ ഹാനികരമായ രോഗാണുക്കളെ നശിപ്പിക്കുന്ന പാസ്ചറൈസേഷൻ (തിളപ്പിക്കുന്ന പ്രക്രിയ) നടത്താത്തതുകൊണ്ടാണ് പച്ചപ്പാൽ ഉപയോഗിക്കുന്നത് അപകടകരമാകുന്നത്. ബ്രൂസെല്ല കൂടാതെ ഇ-കോളി, സാൽമൊണെല്ല തുടങ്ങിയ മറ്റ് അപകടകാരികളായ ബാക്ടീരിയകളും പച്ചപ്പാലിൽ ഉണ്ടാകാൻ സാധ്യതയുണ്ട്.
അണുബാധ ഉണ്ടായി ആഴ്ചകൾക്കോ മാസങ്ങൾക്കോ ശേഷമായിരിക്കും പലപ്പോഴും ലക്ഷണങ്ങൾ പുറത്തുവരുന്നത്. കൃത്യമായ ചികിത്സ ലഭിച്ചില്ലെങ്കിൽ സന്ധിവാതം, കരൾ, പ്ലീഹ (spleen) എന്നിവയിലെ വീക്കം, മെനിഞ്ചൈറ്റിസ്, ഹൃദയാഘാതം തുടങ്ങിയ ഗുരുതരമായ രോഗങ്ങളിലേക്ക് ഇത് നയിക്കാം.
പച്ചപ്പാലും അത് ഉപയോഗിച്ചുണ്ടാക്കുന്ന മറ്റ് പാൽ ഉൽപ്പന്നങ്ങളും പൂർണ്ണമായും ഒഴിവാക്കുക എന്നതാണ് ഇതിൽ നിന്ന് രക്ഷപ്പെടാനുള്ള പ്രധാന വഴി. പ്രത്യേകിച്ച് കുട്ടികൾ, ഗർഭിണികൾ, വയോധികർ, രോഗപ്രതിരോധ ശേഷി കുറഞ്ഞവർ എന്നിവർ തിളപ്പിച്ചതോ പാസ്ചറൈസ് ചെയ്തതോ ആയ പാൽ മാത്രമേ ഉപയോഗിക്കാവൂ. പാൽ കുടിക്കുന്നത് കൊണ്ടല്ല, മറിച്ച് ശുദ്ധീകരിക്കാത്ത പാലിലെ അപകടകാരികളായ ബാക്ടീരിയകളാണ് ഇത്തരം ഗുരുതരമായ അണുബാധയ്ക്ക് കാരണമാകുന്നത്.
