പലരും തങ്ങളുടെ പേരക്കുട്ടികളുടെ വളർച്ചയുടെ ഓരോ ഘട്ടങ്ങളും ആഘോഷിക്കുന്ന പ്രായത്തിൽ, ആദ്യമായി ഒരു പേരക്കുട്ടിയുടെ മുത്തശ്ശനായി മാറി ഗിന്നസ് ലോക റെക്കോർഡ് നേടിയിരിക്കുകയാണ് നോർമണ്ട് ടുസിഗ്നന്റ് എന്ന 96-കാരനായ അമേരിക്കൻ സ്വദേശി. തന്റെ 92-ാം വയസ്സിൽ ആദ്യത്തെ പേരക്കുട്ടിയെ സ്വന്തമാക്കിയതിനാണ് ഇദ്ദേഹത്തിന് ഈ ലോക റെക്കോർഡ് ലഭിച്ചത്.
2022 സെപ്റ്റംബർ 22-ന് മാഡിസൺ എന്ന പെൺകുഞ്ഞ് ജനിക്കുമ്പോൾ നോർമണ്ടിന് 92 വയസ്സും 24 ദിവസവുമായിരുന്നു പ്രായം. കൊച്ചുമകൾ ജനിച്ച് നാല് വർഷത്തോളത്തിന് ശേഷം, 2026 ഓഗസ്റ്റിൽ അദ്ദേഹത്തിന്റെ 96-ാം ജന്മദിനാഘോഷങ്ങൾക്കിടയിലാണ് ഗിന്നസ് വേൾഡ് റെക്കോർഡ്സ് ഈ നേട്ടം ഔദ്യോഗികമായി അംഗീകരിച്ചത്.
നോർമണ്ടും ഭാര്യ മേരി ലൂയിസും 1990-ലാണ് തങ്ങളുടെ ഏക മകളായ കെറിയെ സ്വാഗതം ചെയ്യുന്നത്. മൂന്ന് പതിറ്റാണ്ടുകൾക്ക് ശേഷം മാഡിസൺ ജനിച്ചതോടെ കുടുംബത്തിൽ പുതിയൊരു സന്തോഷം കൂടി എത്തിച്ചേർന്നു. താൻ ഗർഭിണിയാണെന്ന വിവരമറിഞ്ഞപ്പോൾ അച്ഛൻ വലിയ സന്തോഷത്തോടും വികാരനിർഭരമായ അഭിമാനത്തോടുമാണ് പ്രതികരിച്ചതെന്ന് മകൾ കെറി ഓർക്കുന്നു.
നേരത്തെ ഈ റെക്കോർഡ് കൈവശം വെച്ചിരുന്നത് 91 വയസ്സും 209 ദിവസവും പ്രായമുള്ളപ്പോൾ മുത്തശ്ശനായ ഓസ്‌ട്രേലിയക്കാരനായ ചാൾസ് സ്മിത്തായിരുന്നു. ചാൾസ് സ്മിത്തിനേക്കാൾ ആറുമാസം കൂടുതൽ പ്രായമുള്ളപ്പോഴാണ് നോർമണ്ട് കൊച്ചുമകളെ സ്വന്തമാക്കിയത്. കുടുംബത്തിന്റെ ആഗ്രഹപ്രകാരമാണ് ഗിന്നസ് റെക്കോർഡിനായി ഇവർ അപേക്ഷ സമർപ്പിച്ചത്.
കാഴ്ചയിലും കേൾവിയിലും ചെറിയ ബുദ്ധിമുട്ടുകൾ ഉണ്ടെങ്കിലും, തന്റെ പേരക്കുട്ടിയോടൊപ്പം സമയം ചെലവഴിക്കാൻ 96-കാരനായ നോർമണ്ട് എപ്പോഴും മുന്നിലുണ്ട്. രണ്ടുപേരും ഒന്നിച്ച് കളിക്കുകയും, പാർക്കുകളിലൂടെ ഓടിനടക്കുകയും, പലഹാരങ്ങൾ കഴിക്കുകയും ചെയ്യാറുണ്ട്. മകൾ മാഡിസണെ കൂട്ടി സ്വിമ്മിംഗ് പൂളിൽ സമയം ചെലവഴിക്കാനും ഇദ്ദേഹത്തിന് ഏറെ ഇഷ്ടമാണ്.
ഒരു ക്ലിനിക്കൽ സൈക്കോളജിസ്റ്റായി വിരമിച്ച ആളാണ് നോർമണ്ട്. വായന, പസിലുകൾ നിർദ്ധാരണം ചെയ്യൽ, മ്യൂസിയങ്ങൾ സന്ദർശിക്കൽ എന്നിവയാണ് ഇദ്ദേഹത്തിന്റെ പ്രധാന വിനോദങ്ങൾ. തന്റെ പുസ്തകപ്രേമം കൊച്ചുമകൾക്കും പകർന്നുനൽകാൻ അച്ഛന് സാധിക്കുമെന്നാണ് മകൾ കെറിയുടെ പ്രതീക്ഷ.
