‘ദേവര: പാർട്ട് 1’ എന്ന ചിത്രത്തിലെ ‘ചുട്ടമല്ലെ’ എന്ന പാട്ടിലെ രംഗങ്ങൾ ഉപയോഗിച്ച് നിർമ്മിച്ച വ്യാജ എ.ഐ (AI) വീഡിയോയ്ക്കെതിരെ പ്രതികരണവുമായി നടി ജാൻവി കപൂർ. സ്ത്രീകളെ അപമാനിക്കാന്‍ സാങ്കേതികവിദ്യ ദുരുപയോഗം ചെയ്യുന്നതിനെതിരെ രംഗത്തുവന്ന താരം, അനുവാദമില്ലാതെ ഇത്തരത്തിലുള്ള വ്യാജ ഉള്ളടക്കങ്ങൾ പ്രചരിപ്പിക്കുന്നത് കടുത്ത ലംഘനമാണെന്ന് വ്യക്തമാക്കി.
ഇതുസംബന്ധിച്ച് വിശദമായ പ്രസ്താവന പുറപ്പെടുവിച്ച ജാൻവി, സ്ത്രീകളെ ലൈംഗികമായി അപമാനിക്കാനും അവരുടെ അനുമതിയില്ലാതെ ഇത്തരം വീഡിയോകൾ നിർമ്മിച്ച് പ്രചരിപ്പിക്കാനും സാങ്കേതികവിദ്യ കുറ്റകരമായി ഉപയോഗിക്കുന്നത് ലൈംഗിക അതിക്രമത്തിന് തുല്യമാണെന്ന് പറഞ്ഞു. സിനിമാരംഗത്തെ മിക്ക സ്ത്രീകളും ഇത്തരം അനുഭവങ്ങളിലൂടെ കടന്നുപോയിട്ടുണ്ടെന്നും ലോകത്തെമ്പാടുമുള്ള സ്ത്രീകൾ കൂടുതൽ കൂടുതൽ ഇതിന് ഇരയാകുന്നുണ്ടെന്നും അവർ കൂട്ടിച്ചേർത്തു.
സ്ത്രീകളുടെ അനുമതിയും (Consent) അവരുടെ ശരീരത്തോടുള്ള ബഹുമാനവും മാനവികതയുടെ അടിസ്ഥാന തത്വങ്ങളാണെന്നും അത് അത്ര സങ്കീർണ്ണമായ വിഷയമല്ലെന്നും ജാൻവി ഊന്നിപ്പറഞ്ഞു. ഒരു സ്ത്രീ അഞ്ച് ദിവസം തുടർച്ചയായി ശരി എന്ന് പറയുകയും ആറാം ദിവസം ‘അല്ല’ എന്ന് പറയുകയും ചെയ്താൽ, ആ നിലപാടിനെ ബഹുമാനിക്കണം. ഒരാൾ ചെറിയ വസ്ത്രം ധരിച്ചു എന്ന് കരുതി അവരുടെ ശരീരത്തെ ചൂഷണം ചെയ്യാനോ അനുവാദമില്ലാതെ ചിത്രീകരിക്കാനോ ആർക്കും അവകാശമില്ല. സ്വന്തം ശരീരത്തെക്കുറിച്ച് തീരുമാനമെടുക്കാനുള്ള പൂർണ്ണ അവകാശം ആ സ്ത്രീക്ക് മാത്രമാണെന്നും അവർ വ്യക്തമാക്കി.
താൻ നേരിട്ട വീഡിയോകൾക്കപ്പുറം, സ്ത്രീകൾ ദിവസേന അനുഭവിക്കുന്ന കടുത്ത യാഥാർത്ഥ്യങ്ങളിലേക്കാണ് ഇത് വിരൽ ചൂണ്ടുന്നതെന്ന് ജാൻവി പറഞ്ഞു. സൈബർ ലോകത്തും സ്ത്രീകൾക്കെതിരെയുള്ള ഭീഷണി വർദ്ധിച്ചു വരികയാണ്. “മകളെ സംരക്ഷിക്കുക” എന്ന് പറയുന്നതിൽ മാത്രമല്ല, മറ്റൊരാളുടെ അതിരുകൾ ലംഘിക്കാൻ തങ്ങൾക്ക് അവകാശമുണ്ടെന്ന ആളുകളുടെ ചിന്താഗതി മാറ്റിയെടുക്കുകയാണ് വേണ്ടതെന്നും നടി അഭിപ്രായപ്പെട്ടു.
ഈ വിഷയത്തിൽ തനിക്കൊപ്പം നിൽക്കുകയും വ്യാജ വീഡിയോയെ ശക്തമായി അപലപിക്കുകയും ചെയ്ത നടൻ ജൂനിയർ എൻ.ടി.ആറിന് ജാൻവി നന്ദി അറിയിച്ചു. ലക്ഷക്കണക്കിന് ആളുകൾ ആരാധിക്കുന്ന ഒരാൾ ഇത്തരം വിഷയങ്ങളിൽ ശബ്ദമുയർത്തുന്നത് വലിയ മാറ്റങ്ങൾ ഉണ്ടാക്കുമെന്ന് അവർ പറഞ്ഞു. കൂടാതെ, ചിരഞ്ജീവി, വിജയ്, ഖുശ്ബു സുന്ദർ എന്നിവർ നൽകിയ പിന്തുണയ്ക്കും വ്യാജ എ.ഐ ഉപയോഗത്തിനെതിരെ ശബ്ദമുയർത്തിയതിനും അവർ നന്ദി രേഖപ്പെടുത്തി. “അവളുടെ ശരീരം. അവളുടെ ചിത്രം. അവളുടെ അതിരുകൾ. അവളുടെ തീരുമാനം,” എന്ന വാക്കുകളോടെയാണ് ജാൻവി തന്റെ പ്രസ്താവന അവസാനിപ്പിച്ചത്.
‘ചുട്ടമല്ലെ’ എന്ന ഗാനരംഗത്തിൽ ജാൻവിയുടെ ദൃശ്യങ്ങൾ എ.ഐ (AI) ഡീപ്ഫേക്ക് സാങ്കേതികവിദ്യ ഉപയോഗിച്ച് അശ്ലീലകരമായ രീതിയിൽ എഡിറ്റ് ചെയ്ത് പ്രചരിപ്പിച്ചതാണ് വിവാദങ്ങൾക്ക് കാരണമായത്. സംഭവം പുറത്തുവന്ന ഉടൻ തന്നെ ജൂനിയർ എൻ.ടി.ആർ ഇതിനെതിരെ ശക്തമായി രംഗത്തുവരികയും കുറ്റക്കാർക്കെതിരെ നിയമനടപടി സ്വീകരിക്കണമെന്ന് ആവശ്യപ്പെടുകയും ചെയ്തിരുന്നു. തുടർന്നാണ് ചലച്ചിത്രരംഗത്തെ പ്രമുഖരായ ചിരഞ്ജീവി, വിജയ് ദേവരകൊണ്ട, ഖുശ്ബു തുടങ്ങിയവരും ജാൻവിക്ക് പിന്തുണയുമായി എത്തിയത്.
