മഴക്കാലത്ത് ലോകത്തിൽ നിന്ന് ഒറ്റപ്പെട്ടുപോകുന്ന വാദ്രഫ്നഗർ ബ്ലോക്കിലെ വിദ്യാലയത്തിലേക്ക് എത്താൻ ഛത്തീസ്ഗഡിലെ രണ്ട് അധ്യാപികമാർ നടത്തുന്നത് അസാധ്യമെന്നു തോന്നുന്ന ഒരു അതിസാഹസിക യാത്രയാണ് ഇപ്പോള്‍ സോഷ്യല്‍ മീഡിയയുടെ ശ്രദ്ധ പിടിച്ചു പറ്റുന്നത്. മോറാൻ, ഇരിയ എന്നീ നദികളുടെ സംഗമസ്ഥാനത്തിന് അപ്പുറത്താണ് ധൗർപൂർ എന്ന ഗ്രാമം സ്ഥിതിചെയ്യുന്നത്.
മഴക്കാലത്ത് വെള്ളം കയറുന്ന ഈ നദി കടന്ന് നടന്നു മാത്രമേ ഇവിടേക്ക് എത്താൻ സാധിക്കൂ. എന്നാൽ സന്ധ്യ ഹൽദാർ, കർമിള ടോപ്പോ എന്നീ അധ്യാപികമാർക്ക് ഈ അപകടനടത്തം തങ്ങളുടെ ജോലിയുടെ ഭാഗം മാത്രമാണ്. ഒമ്പത് മാസം പ്രായമുള്ള തന്റെ കുഞ്ഞിനെയും കയ്യിലേന്തി, അരയ്ക്കൊപ്പം വെള്ളത്തിലൂടെ നീന്തിയാണ് കർമിള ഈ നദി മുറിച്ചുകടക്കുന്നത്.
വാഹനങ്ങൾക്ക് പോകാൻ കഴിയുന്ന അവസാന സ്ഥലമായ മർണയിൽ ഇവർ തങ്ങളുടെ സ്കൂട്ടറുകൾ പാർക്ക് ചെയ്യുന്നു. തുടർന്ന് മൂന്ന് കിലോമീറ്ററോളം കുത്തനെ കിടക്കുന്ന പാറക്കെട്ടുകളും കുന്നുകളും നിറഞ്ഞ വഴിയിലൂടെ കാൽനടയായി യാത്ര തിരിക്കുന്നു. ഇതിനുശേഷമാണ് നദി മുറിച്ചുകടക്കേണ്ടത്.
“ഞങ്ങൾ മർണയിൽ സ്കൂട്ടറുകൾ വെച്ച ശേഷം മൂന്ന് കിലോമീറ്റർ കുന്നിൻപാത നടന്ന്, നദി കടന്നാണ് സ്കൂളിലെത്തുന്നത്” – സന്ധ്യ പറഞ്ഞു. എന്നാൽ എല്ലാ ദിവസവും സ്കൂളിൽ എത്താൻ കഴിയാറില്ല. നദിയിൽ വെള്ളം കുറവുള്ള ദിവസങ്ങളിൽ ഇവർ നദി കടക്കും., എന്നാൽ ഒഴുക്ക് കൂടുതലുള്ള ദിവസങ്ങളിൽ വഴിയിൽ വെച്ച് തന്നെ തിരിച്ചുമടങ്ങേണ്ടി വരും.
യാത്ര എത്ര ദുഷ്കരമാണെങ്കിലും തങ്ങളെ കാത്തിരിക്കുന്ന കൊച്ചുകുട്ടികളുടെ സന്തോഷം കാണുമ്പോൾ ഈ കഷ്ടപ്പാടെല്ലാം മറക്കുമെന്ന് അധ്യാപികമാർ പറയുന്നു. കൃത്യമായി സ്കൂളിലെത്താനും കുട്ടികൾക്ക് വിദ്യാഭ്യാസം നൽകാനും കഴിയാത്ത ദിവസങ്ങളിൽ വലിയ വിഷമം തോന്നാറുണ്ടെന്നും, തങ്ങളെ കാണുമ്പോൾ കുട്ടികളുടെ മുഖത്തുണ്ടാകുന്ന പുഞ്ചിരിയാണ് മുന്നോട്ട് പോകാൻ പ്രചോദനമെന്നും സന്ധ്യ കൂട്ടിച്ചേർത്തു. 2014 മുതൽ ഈ സ്കൂളിൽ ജോലി ചെയ്യുന്ന കർമിള, മഴക്കാലത്ത് ഈ വഴിയിലൂടെ പോകരുതെന്ന് പലരും ഉപദേശിക്കാറുണ്ടെന്ന് പറയുന്നു.
കുഞ്ഞിനെയും കയ്യിലേന്തി വെള്ളത്തിലൂടെ നടക്കുന്ന ഇവരുടെ ദൃശ്യങ്ങൾ വാർത്തയായതോടെയാണ് സംഭവം ബൽറാംപൂർ കളക്ടർ ചന്ദൻ സഞ്ജയ് ത്രിപാഠിയുടെ ശ്രദ്ധയിൽപ്പെടുന്നത്. തങ്ങളുടെ ജീവൻ പോലും പണയം വെച്ച് ജോലി ചെയ്യുന്ന ഈ അധ്യാപികമാരുടെ സമർപ്പണബോധത്തെ കളക്ടർ പ്രശംസിച്ചു. ഇത്തരത്തിലുള്ള അധ്യാപകർ അപൂർവ്വമാണെന്നും, ഇവരുടെ കഠിനാധ്വാനം ജില്ലയിലെ മറ്റ് അധ്യാപകർക്ക് വലിയൊരു മാതൃകയാണെന്നും, ഇവരെ ആദരിക്കുന്നത് ജില്ലയ്ക്ക് തന്നെ വലിയൊരു അഭിമാനമാണെന്നും കളക്ടർ വ്യക്തമാക്കി.
