ഒഡീഷയിലെ ധെൻകനാൽ ജില്ലയിലുള്ള പ്രശസ്ത വിനോദസഞ്ചാര കേന്ദ്രമായ കപിലാഷിലേക്കുള്ള റോഡിൽ വെച്ച്, യാത്ര ചെയ്യുകയായിരുന്ന യുവദമ്പതികളെ ഒരു സംഘം ആളുകൾ തടഞ്ഞുനിർത്തി ആക്രമിക്കുകയും അപമാനിക്കുക7 ചെയ്യുന്നതിന്റെ ദൃശ്യങ്ങൾ സാമൂഹിക മാധ്യമങ്ങളിൽ പ്രചരിക്കുന്നു. ഇത് ഈ പ്രദേശ സന്ദർശിക്കുന്ന വിനോദസഞ്ചാരികളുടെ സുരക്ഷയെക്കുറിച്ചുള്ള ആശങ്കകൾ വർദ്ധിപ്പിച്ചിട്ടുണ്ട്. ബീഹാറിലെ ജമുയിയിൽ പ്രായപൂർത്തിയാകാത്ത ആൺകുട്ടിയും പെൺകുട്ടിയും സമാനമായ രീതിയിൽ ആക്രമിക്കപ്പെടുകയും അപമാനിക്കപ്പെടുകയും ചെയ്ത സംഭവത്തിന് തൊട്ടുപിന്നാലെയാണ് ഈ പുതിയ വാർത്ത പുറത്തുവന്നിരിക്കുന്നത്.
റിപ്പോർട്ടുകൾ പ്രകാരം ബൈക്കിൽ കപിലാഷിലേക്ക് യാത്ര ചെയ്യുകയായിരുന്ന ദമ്പതികളെ ഒരു കൂട്ടം ആളുകൾ വഴിയരികിൽ തടഞ്ഞുനിർത്തുകയായിരുന്നു. പുറത്തുവന്ന വീഡിയോയിൽ നിരവധി ആളുകൾ ഇവരെ വളഞ്ഞുനിൽക്കുന്നതും, യുവാവിനെ ക്രൂരമായി മർദ്ദിക്കുന്നതും കാണാം. സംഘത്തിലുണ്ടായിരുന്ന ചിലർ ഒപ്പമുണ്ടായിരുന്ന യുവതിയോട് മോശമായി പെരുമാറുകയും ചെയ്തു. തങ്ങളെ ഉപദ്രവിക്കരുതെന്നും പോകാൻ അനുവദിക്കണമെന്നും യുവതി കരഞ്ഞു അപേക്ഷിക്കുന്നുണ്ടെങ്കിലും അക്രമികൾ അത് വകവെയ്ക്കാതെ ഉപദ്രവം തുടരുകയായിരുന്നു. ഈ തർക്കത്തിലേക്ക് നയിച്ച കാരണം എന്താണെന്നോ, ഇവർക്ക് അക്രമികളെ മുൻപ് പരിചയമുണ്ടായിരുന്നോ എന്ന കാര്യം വ്യക്തമല്ല.
സംഭവത്തിൽ ഉൾപ്പെട്ട ചിലരെ തിരിച്ചറിഞ്ഞിട്ടുണ്ടെന്നും അന്വേഷണത്തിന് ശേഷം കുറ്റക്കാർക്കെതിരെ ശക്തമായ നടപടി സ്വീകരിക്കുമെന്നും ഗോൺഡിയ ഇൻസ്പെക്ടർ ഇൻ ചാർജ് പ്രതാപ് ദലേയ് അറിയിച്ചു. സംഭവത്തിന്റെ പൂർണ്ണമായ വിവരങ്ങൾ പുറത്തുകൊണ്ടുവരാൻ പോലീസ് അന്വേഷണം നടത്തിവരികയാണ്.
കഴിഞ്ഞ സെപ്റ്റംബർ 19-നാണ് ബീഹാറിലെ ജമുയിയിൽ പ്രായപൂർത്തിയാകാത്ത കുട്ടികൾക്ക് നേരെ സമാനമായ അതിക്രമം നടന്നത്. ഈ സംഭവത്തിന്റെ ദൃശ്യങ്ങൾ പുറത്തുവന്നതോടെ വലിയ ജനരോഷമാണ് ഉയർന്നത്. തുടർന്ന് പോലീസ് കേസിൽ ഉൾപ്പെട്ട മൂന്ന് പേരെ അറസ്റ്റ് ചെയ്യുകയും മറ്റുള്ളവർക്കായി തിരച്ചിൽ ഊർജ്ജിതമാക്കുകയും ചെയ്തു. ഒരു വനിതാ പോലീസ് ഉദ്യോഗസ്ഥയുടെ നേതൃത്വത്തിലുള്ള പ്രത്യേക അന്വേഷണ സംഘമാണ് ബീഹാറിലെ കേസ് അന്വേഷിക്കുന്നത്.
