ഇന്ത്യൻ സൂപ്പർ ഫാസ്റ്റ് ബൗളർ ജസ്പ്രീത് ബുംറയുടേതിന് സമാനമായ ബൗളിങ് ആക്ഷനിലൂടെ ശ്രീലങ്കൻ നവാഗത സ്പിന്നർ സചിന്ദു കൊളൊംബാഗെ സോഷ്യൽ മീഡിയയിൽ തരംഗമാകുന്നു. ചൊവ്വാഴ്ച ഡർഹാമിലെ റിവർസൈഡ് ഗ്രൗണ്ടിൽ നടന്ന ഇംഗ്ലണ്ട് – ശ്രീലങ്ക ഒന്നാം ഏകദിന മത്സരത്തിലാണ് സചിന്ദു ശ്രീലങ്കയ്ക്കായി അന്താരാഷ്ട്ര ക്രിക്കറ്റിൽ അരങ്ങേറ്റം കുറിച്ചത്.
ബുംറയുമായി താരതമ്യപ്പെടുത്തുന്നുണ്ടെങ്കിലും, കൊളൊംബാഗെ ഒരു സ്പിന്നറും ബുംറ ഫാസ്റ്റ് ബൗളറുമാണെന്നതും ഇവരുടെ ബൗളിങ് ആക്ഷനുകൾ പൂർണ്ണമായും ഒന്നല്ല എന്നതും ശ്രദ്ധേയമാണ്. സോഷ്യൽ മീഡിയയിലെ ക്രിക്കറ്റ് ആരാധകരാണ് പ്രധാനമായും ഇരുവരെയും തമ്മിൽ താരതമ്യം ചെയ്യുന്നത്.
ക്രീസിലേക്ക് ഓടിയടുക്കുമ്പോഴും പന്ത് എറിയുന്നതിന് മുൻപായി കൈകൾ ചലിപ്പിക്കുമ്പോഴുമുള്ള കൊളൊംബാഗെയുടെ വിചിത്രമായ ശൈലിയാണ് ഇതിന് പ്രധാന കാരണം. പന്തെറിയാൻ ഓടിയെത്തുമ്പോൾ പന്ത് കൃത്യമായി കണ്ണിനും നെറ്റിക്കും നേരെ പിടിക്കുന്ന ശൈലിയാണ് കൊളൊംബാഗെയുടേത്. ബുംറയും പന്തെറിയാൻ എത്തുമ്പോൾ സമാനമായ രീതിയിലാണ് പന്ത് പിടിക്കുന്നത്. പന്ത് റിലീസ് ചെയ്യുമ്പോൾ ഇരുവരുടെയും ശരീരത്തിന്റെ പൊസിഷനിലും സാമ്യതകളുണ്ട്.
ഈ സാമ്യതകൾ കണ്ടതോടെയാണ് ബുംറയുടെ പ്രശസ്തമായ ബൗളിങ് ആക്ഷനുമായി കൊളൊംബാഗെയുടെ ശൈലിയെ ആരാധകർ ഉപമിക്കാൻ തുടങ്ങിയത്. ചിലർ ഇദ്ദേഹത്തെ “സ്പിൻ എറിയുന്ന ബുംറ” എന്ന് തമാശയായി വിശേഷിപ്പിച്ചപ്പോൾ മറ്റു ചിലർ മുൻ ഇന്ത്യൻ സ്പിന്നർ അനിൽ കുംബ്ലെയുമായാണ് താരതമ്യം ചെയ്തത്.
തന്റെ ഈ വ്യത്യസ്തമായ ബൗളിങ് ആക്ഷനിലൂടെ ഇംഗ്ലണ്ടിന്റെ വെറ്ററൻ ബാറ്റർ ജോ റൂട്ടിന്റെ വിക്കറ്റ് വീഴ്ത്താനും കൊളൊംബാഗെയ്ക്ക് സാധിച്ചു. ജോ റൂട്ടിനെ ക്ലീൻ ബൗൾഡാക്കിയാണ് അദ്ദേഹം അന്താരാഷ്ട്ര കരിയറിലെ തന്റെ ആദ്യ വിക്കറ്റ് അക്കൗണ്ടിലാക്കിയത്.
തന്റെ കന്നി മത്സരത്തിൽ തന്നെ ജോ റൂട്ട്, ജോസ് ബട്ട്ലർ, ജാമി ഓവർട്ടൺ എന്നിവരുടെ വിക്കറ്റുകൾ ഉൾപ്പെടെ 10 ഓവറിൽ 44 റൺസിന് 3 വിക്കറ്റ് വീഴ്ത്തി മികച്ച പ്രകടനമാണ് സചിന്ദു കൊളൊംബാഗെ പുറത്തെടുത്തത്. ഈ മികച്ച ബൗളിങ് പ്രകടനത്തിന്റെ കരുത്തിൽ 265 റൺസ് പ്രതിരോധിച്ച ശ്രീലങ്ക, ഇംഗ്ലണ്ടിനെ 48.1 ഓവറിൽ ഓൾഔട്ടാക്കുകയും ചെയ്തു.
