പനീറിലും ടോഫുവിലും നടക്കുന്ന മായം ചേർക്കലിനെക്കുറിച്ച് ആശങ്കപ്പെടുന്നവർക്ക് കൂടുതൽ പോഷകഗുണമുള്ള മികച്ചൊരു ബദൽ ഭക്ഷണവുമായി രംഗത്തെത്തിയിരിക്കുകയാണ് ബംഗളൂരു ആസ്ഥാനമായുള്ള ‘ഹലോ ടെമ്പെ’ (Hello Tempayy) എന്ന സ്റ്റാർട്ടപ്പ്. സിദ്ധാർത്ഥ് രാമസുബ്രഹ്മണ്യൻ, മാളവിക എസ്. വി. എന്നിവർ ചേർന്ന് 2021-ൽ ആരംഭിച്ച ഈ സംരംഭം, സോയാബീൻ ഫെർമന്റ് ചെയ്ത് ഉണ്ടാക്കുന്ന ഇന്തോനേഷ്യൻ പരമ്പരാഗത ഭക്ഷണമായ ‘ടെമ്പെ’ (Tempeh) ആണ് വിപണിയിൽ എത്തിക്കുന്നത്. 100 ഗ്രാം ടെമ്പെയിൽ 21 ഗ്രാം പ്രോട്ടീൻ അടങ്ങിയിട്ടുണ്ട്. ഇത് പനീറിനേക്കാളും (15 ഗ്രാം) ടോഫുവിനേക്കാളും (14 ഗ്രാം) കൂടുതലാണ്.
കുടുംബത്തിലെ ഒരംഗത്തിന്റെ ആരോഗ്യപ്രശ്നങ്ങളെ തുടർന്ന് ഭക്ഷണക്രമത്തിൽ വരുത്തിയ മാറ്റങ്ങളാണ് ഇത്തരം ഫെർമന്റഡ് ഭക്ഷണങ്ങളെക്കുറിച്ച് അന്വേഷിക്കാൻ ദമ്പതികളെ പ്രേരിപ്പിച്ചത്. പിന്നീട് നെതർലാൻഡ്‌സ് സന്ദർശന വേളയിൽ ടെമ്പെയുടെ ഗുണങ്ങളെക്കുറിച്ച് കൂടുതൽ മനസ്സിലാക്കിയ ഇരുവരും ഇന്ത്യയിലും ഇത് അവതരിപ്പിക്കാൻ തീരുമാനിക്കുകയായിരുന്നു. കൃത്രിമ പദാർത്ഥങ്ങളോ പ്രിസർവേറ്റീവുകളോ ഇല്ലാതെ പൂർണ്ണമായും ശുദ്ധമായ രീതിയിലാണ് ഇത് നിർമ്മിക്കുന്നത്.
3.5 കോടി രൂപ മുതൽമുടക്കിൽ കേവലം 4 അംഗങ്ങളുമായി ആരംഭിച്ച ഈ സംരംഭം, ഇന്ത്യൻ പാചകരീതികൾക്ക് അനുയോജ്യമായ രീതിയിലാണ് ടെമ്പെ പുനർനിർമ്മിച്ചെടുത്തത്. റെഡി-ടു-കുക്ക്, ഫ്രോസൺ വിഭാഗങ്ങളിൽ ക്യൂബുകൾ, ക്രംബിളുകൾ, മോമോസ്, കബാബുകൾ, പറാത്തകൾ എന്നിവ ഇവർ ലഭ്യമാക്കുന്നുണ്ട്. തുടക്കത്തിൽ പ്രതിമാസം 1,500 പാക്കറ്റുകൾ മാത്രം വിറ്റിരുന്ന ഇവർ, ഇപ്പോൾ പ്രതിമാസം 3 ലക്ഷത്തിലധികം പാക്കറ്റുകൾ വിറ്റഴിക്കുന്നു. 2026-ഓടെ ഈ ബ്രാൻഡിന്റെ വാർഷിക വരുമാനം (ARR) 50 കോടി രൂപ കടന്നു.
