രാമായണത്തിന്റെ ട്രെയിലറിലെ ഒരു രംഗം ആരാധകരിൽ ഏറെ കൗതുകമുണർത്തിയിട്ടുണ്ട്. സീതയായി അഭിനയിക്കുന്ന സായ് പല്ലവി കൈയിൽ വാളും പരിചയും ഏന്തിനിൽക്കുന്ന രംഗമാണ് ട്രെയിലറിലുള്ളത്. രാമായണത്തിന്റെ മിക്ക പുനരാവിഷ്കാരങ്ങളിലും സീതയെ ശാന്തയും ക്ഷമാശീലയുമായി ചിത്രീകരിക്കാറുള്ളതിനാൽ, താരം ഒരു യോദ്ധാവായി പ്രത്യക്ഷപ്പെട്ടത് എന്തുകൊണ്ടാണെന്ന് പലരും അത്ഭുതപ്പെട്ടു. ഇതിനുള്ള ഉത്തരം പുരാതന ഹൈന്ദവ ഗ്രന്ഥങ്ങളിലുണ്ട്.
മഹർഷി വാല്മീകിയുടെ പരമ്പരാഗത രാമായണത്തിൽ സീതയെ ഒരു യോദ്ധാവായി ചിത്രീകരിക്കുന്നില്ല. പകരം ലങ്കയിലെ തടവുകാലത്ത് കാണിച്ച മാനസിക ശക്തിക്കും ക്ഷമയ്ക്കും ദൈവവിശ്വാസത്തിനുമാണ് പ്രാധാന്യം നൽകിയിട്ടുള്ളത്. എന്നാൽ മറ്റ് ചില പുരാതന ഗ്രന്ഥങ്ങളിലും പ്രാദേശിക പതിപ്പുകളിലും സീതയുടെ വേറിട്ടൊരു രൂപം കാണാനാകും.
വാല്മീകി മഹർഷിയുടേത് എന്ന് തന്നെ കരുതപ്പെടുന്ന ‘അദ്ഭുത രാമായണം’ എന്ന ഗ്രന്ഥത്തിൽ സീതയെ ശ്രീരാമന്റെ പത്നിയായി മാത്രമല്ല, പരമശക്തിയായ ‘ആദിശക്തി’യായിട്ടാണ് വിശേഷിപ്പിക്കുന്നത്. ശ്രീരാമൻ രാവണനെ വധിച്ച ശേഷം, ആയിരം തലയുള്ള സഹസ്ര രാവണൻ എന്ന കൂടുതൽ ശക്തനായ അസുരൻ ഉയർന്നുവരുന്നു. തുടർന്നുണ്ടാകുന്ന യുദ്ധത്തിൽ ശ്രീരാമൻ ബോധരഹിതനായി വീഴുമ്പോൾ, സീത ഭദ്രകാളിയുടെ രൗദ്രരൂപം പൂണ്ട് സഹസ്ര രാവണനെ വധിക്കുകയും തന്റെ ദിവ്യമായ യോദ്ധാവിന്റെ രൂപം വെളിപ്പെടുത്തുകയും ചെയ്യുന്നു എന്നാണ് കഥ.
സീതയുടെ ബാല്യകാലവുമായി ബന്ധപ്പെട്ട മറ്റൊരു കഥയും അവരുടെ അമാനുഷിക ശക്തിയെ വ്യക്തമാക്കുന്നുണ്ട്. വമ്പന്മാരായ രാജാക്കന്മാർക്ക് പോലും അല്പം പോലും അനക്കാൻ കഴിയാതിരുന്ന ശിവന്റെ ‘പിനാകം’ എന്ന വില്ല് സീത ചെറുപ്പത്തിൽ വളരെ എളുപ്പത്തിൽ ഉയർത്തിയിരുന്നു. ഇത് കണ്ടാണ് ഈ വില്ല് ഉയർത്താൻ കഴിയുന്ന ആൾക്ക് മാത്രമേ മകളെ വിവാഹം കഴിച്ചു നൽകൂ എന്ന് ജനകമഹാരാജാവ് തീരുമാനിക്കുന്നത്.
ഈ കഥകളെല്ലാം വ്യക്തമാക്കുന്നത് സീത ഒരു ഉത്തമ രാജ്ഞി മാത്രമല്ല, ദിവ്യശക്തിയുടെയും ധൈര്യത്തിന്റെയും പ്രതീകം കൂടിയായിരുന്നു എന്നാണ്.
നിതേഷ് തിവാരി സംവിധാനം ചെയ്യുന്ന രാമായണത്തിൽ സായ് പല്ലവിയുടെ സീത വാളും പരിചയും ഏന്തിനിൽക്കുന്നതായി കാണിച്ചതിന് പിന്നിലെ കാരണം ഇതായിരിക്കാം. അണിയറപ്രവർത്തകർ ഇതിനെക്കുറിച്ച് ഔദ്യോഗികമായി വിശദീകരിച്ചിട്ടില്ലെങ്കിലും, അധികമാർക്കും അറിയാത്ത അദ്ഭുത രാമായണം പോലുള്ള പുരാണ കഥകളിൽ നിന്ന് പ്രചോദനം ഉൾക്കൊണ്ടാണ് ഈ രംഗം ചിത്രീകരിച്ചിരിക്കുന്നത് എന്ന് കരുതപ്പെടുന്നു.
ഈ ചെറിയ രംഗം ഇപ്പോൾ തന്നെ ആരാധകർക്കിടയിൽ വലിയ ചർച്ചയായിട്ടുണ്ട്. സീതയുടെ ഈ വ്യത്യസ്ത രൂപം സിനിമയിൽ എങ്ങനെ അവതരിപ്പിക്കുമെന്ന് കാണാൻ പലരും ആവേശത്തോടെ കാത്തിരിക്കുകയാണ്.
ജൂലൈ 30-ന് പുലർച്ചെ 4:15-ന് ട്രെയിലർ പുറത്തിറങ്ങിയ നിതേഷ് തിവാരിയുടെ രാമായണം, ഇന്ത്യൻ സിനിമ കണ്ടതിൽ വെച്ച് ഏറ്റവും വലിയ നിർമ്മാണ സംരംഭമായാണ് വിശേഷിപ്പിക്കപ്പെടുന്നത്. 4,000 കോടി രൂപ ബജറ്റിൽ രണ്ട് ഭാഗങ്ങളായി ഒരുങ്ങുന്ന ഈ ചിത്രത്തിൽ അത്യാധുനിക വി.എഫ്.എക്സും (VFX) വമ്പൻ യുദ്ധരംഗങ്ങളുമാണ് ഉൾപ്പെടുത്തിയിരിക്കുന്നത്.
നിർമ്മാതാവ് നമിത് മൽഹോത്രയും സഹനിർമ്മാതാവ് യഷും ചേർന്ന് നിർമ്മിക്കുന്ന ഈ ചിത്രം ഐമാക്സ് (IMAX) ഫോർമാറ്റിലാണ് ചിത്രീകരിച്ചിരിക്കുന്നത്. ഇത്രയും വലിയ ബജറ്റിൽ ഒരുങ്ങുന്നതോടെ ഇന്ത്യൻ സിനിമാ ചരിത്രത്തിലെ തന്നെ ഏറ്റവും ചെലവേറിയ ചിത്രമായി രാമായണം മാറി.
