വിവാഹങ്ങൾ രണ്ട് വ്യക്തികളുടെ ഒരുമിച്ചുള്ള ജീവിതത്തിന്റെ തുടക്കമെന്നതിലുപരി വെറും പ്രകടനങ്ങൾക്കും സോഷ്യൽ മീഡിയ റീലുകൾക്കുമായി മാറുന്നു എന്ന വിമർശനം ശക്തമാവുകയാണ്. ഇതിനിടയിലാണ് ആഘോഷങ്ങളുടെ പേരിൽ അരങ്ങേറുന്ന അപകടകരമായ വിവാഹ ട്രെൻഡുകളെ വിമർശിച്ചുകൊണ്ട് മറ്റൊരു വീഡിയോ കൂടി പുറത്തുവന്നിരിക്കുന്നത്.
ഒരു വധൂവരന്മാരുടെ വിവാഹ പ്രവേശനമാണ് (Wedding Entry) വീഡിയോയിലുള്ളത്. എൻട്രി ആകർഷകമാക്കാൻ ഇരുവരുടെയും കൈകളിൽ തീപ്പൊരികൾ ചിതറുന്ന ‘ഫയർ ഗണ്ണുകൾ’ ഉണ്ടായിരുന്നു. എന്നാൽ ഈ പരീക്ഷണം പാളിപ്പോകുകയും വലിയൊരു അപകടത്തിൽ കലാശിക്കുകയുമാണ് ഉണ്ടായത്.
വീഡിയോയിൽ കാണുന്നത് വധുവിനൊപ്പം നടന്നു വരുന്നതിനിടെ വരന്റെ കയ്യിലിരുന്ന ഫയർ ഗൺ പെട്ടെന്ന് പൊട്ടിത്തെറിക്കുകയായിരുന്നു. അപ്രതീക്ഷിതമായ സ്ഫോടനത്തിൽ ഞെട്ടിപ്പോയ വരൻ ഉടൻ തന്നെ ആ ഉപകരണം ദൂരേക്ക് വലിച്ചെറിഞ്ഞു. ഈ ദൃശ്യങ്ങൾ നിമിഷങ്ങൾക്കകം വൈറലായി. ഇത്തരം അഭ്യാസങ്ങൾ വെറും “വിഡ്ഢിത്തം” ആണെന്നാണ് ഭൂരിഭാഗം ആളുകളും പ്രതികരിക്കുന്നത്. ഇത്തരം അപകടകരമായ പ്രവൃത്തികൾ വിവാഹച്ചടങ്ങുകളിൽ നിരോധിക്കണമെന്നും സോഷ്യൽ മീഡിയയിൽ ആവശ്യമുയരുന്നുണ്ട്.
‘ഘർ കെ കലേഷ്’ എന്ന എക്സ് (X) ഹാൻഡിലിലൂടെ പങ്കുവെക്കപ്പെട്ട ഈ വീഡിയോ ഇതിനോടകം നാല് ലക്ഷത്തിലധികം പേർ കണ്ടു കഴിഞ്ഞു. വിവാഹം എന്നത് ഇപ്പോൾ വെറുമൊരു ‘റീൽ ഇവന്റ്’ ആയി മാറിയിരിക്കുകയാണെന്നും കണ്ടന്റ് ക്രിയേഷന് വേണ്ടിയുള്ള ഈ ആവേശം തെറ്റായ വഴിക്കാണ് പോകുന്നതെന്നും പലരും കമന്റ് ചെയ്തു.
“ഇന്ത്യൻ വിവാഹങ്ങളിലെ ബുദ്ധിശൂന്യതയുടെ അങ്ങേയറ്റമാണിത്, ജീവിതത്തിലെ ഏറ്റവും പ്രധാനപ്പെട്ട ദിവസം തീക്കൊള്ളികൊണ്ട് കളിക്കുന്നത് എന്തിനാണ്?” എന്ന് മറ്റൊരു ഉപയോക്താവ് ചോദിച്ചു. ആഡംബരങ്ങൾ കാണിക്കാനുള്ള വ്യഗ്രതയിൽ സ്വന്തം ജീവൻ അപകടത്തിലാക്കുന്ന ഇത്തരം രീതികൾക്ക് പകരം സുരക്ഷിതമായ മാർഗ്ഗങ്ങൾ സ്വീകരിക്കാൻ ദമ്പതികൾ തയ്യാറാകണമെന്നും അഭിപ്രായങ്ങൾ ഉയരുന്നു.
